ರಾಜ್ಯ ಸರಕಾರ ಫೆ.16ರಂದು ಬಜೆಟ್‌ನಲ್ಲಿ ಅಖಂಡ ತುಮಕೂರನ್ನು ವಿಭಜಿಸಿ ಹೊಸ ಜಿಲ್ಲೆ ಘೋಷಿಸುವ ಸಾಧ್ಯತೆ ಕಂಡುಬಂದಿದೆ. ಇತ್ತೀಚೆಗೆ ಸರಕಾರ ಹೊರಡಿಸಿರುವ ಸುತ್ತೋಲೆಯಲ್ಲಿ ತುಮಕೂರು ಹಾಗೂ ಬೆಳಗಾವಿ ಜಿಲ್ಲೆಗಳ ವ್ಯಾಪ್ತಿಯನ್ನು ಪುನರ್‌ ರಚಿಸುವ ಬಗ್ಗೆ ಉಲ್ಲೇಖಿಸಿದ್ದು, ಇದು ಬಜೆಟ್‌ನಲ್ಲಿ ಹೊಸ ಜಿಲ್ಲೆಗಳ ಘೋಷಣೆಯ ಸುಳಿವು ನೀಡಿದೆ. 1S908ರ ನೋಂದಣಿ ಕಾಯ್ದೆಯ ಸೆಕ್ಷನ್‌ 5ರ 1 ಹಾಗೂ 2ನೇ ಉಪ ವಿಧಿಯಡಿ ದತ್ತವಾದ ಅಧಿಕಾರ ಬಳಸಿ ತುಮಕೂರು ಹಾಗೂ ಬೆಳಗಾವಿ ಜಿಲ್ಲಾ ರಚನೆ ಸಂಬಂಧ ಚಾಲ್ತಿಯಲ್ಲಿರುವ ಅಧಿಸೂಚನೆಯನ್ನು ಫೆಬ್ರವರಿ 8ರಂದು ರದ್ದುಪಡಿಸಿ, ಸರಕಾರ ಆದೇಶ ಹೊರಡಿಸಿದೆ.

ಇದು ಹೊಸ ಜಿಲ್ಲಾ ರಚನೆಗೆ ಸುದ್ದಿಗಳಿಗೆ ಬಲ ತುಂಬಿದೆ. ಅಖಂಡ ತುಮಕೂರು ವಿಭಜನೆಗೆ ಸಂಬಂಧಿಸಿದಂತೆ ಮೂರು ಪ್ರತ್ಯೇಕ ಜಿಲ್ಲೆಯ ಕೂಗಿದೆ. ಮಧುಗಿರಿ, ತಿಪಟೂರು ಹಾಗೂ ಶಿರಾ ಜಿಲ್ಲೆಯಾಗಲು ರೇಸ್‌ನಲ್ಲಿವೆ. ವಿಶೇಷವಾಗಿ ಮಧುಗಿರಿ ಜಿಲ್ಲೆ ಘೋಷಣೆಗೆ ಗೃಹಸಚಿವ ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವ ಡಾ.ಜಿ.ಪರಮೇಶ್ವರ್‌ ಹಾಗೂ ಸಹಕಾರಿ ಸಚಿವ ಕೆ.ಎನ್‌.ರಾಜಣ್ಣ ಬಲವಿದೆ.

Karnataka Budget 2024: ಇಂದು (ಫೆ.16) ಬೆಳಗ್ಗೆ 10:15ಕ್ಕೆ ಸಿಎಂ ಸಿದ್ದರಾಮಯ್ಯ ದಾಖಲೆಯ 15ನೇ ಬಜೆಟ್‌ ಮಂಡನೆ

ರಾಜಣ್ಣ ಪ್ರತಿನಿಧಿಸುವ ಮಧುಗಿರಿ ಹಾಗೂ ಪರಮೇಶ್ವರ್‌ ಪ್ರತಿನಿಸುವ ಕೊರಟಗೆರೆ ಎರಡೂ ಕ್ಷೇತ್ರಗಳು ಸಂಭಾವ್ಯ ಮಧುಗಿರಿ ಜಿಲ್ಲಾ ವ್ಯಾಪ್ತಿಗೆ ಒಳಪಡುತ್ತವೆ. ಹೀಗಾಗಿ ಇಬ್ಬರು ಸಚಿವರ ಒಲವು ಮಧುಗಿರಿ ಜಿಲ್ಲಾ ಘೋಷಣೆ ಬಗ್ಗೆಯೇ ಇದೆ. ತಿಪಟೂರು ಶಾಸಕ ಕೆ.ಷಡಕ್ಷರಿ ತಿಪಟೂರು ಜಿಲ್ಲೆಗೆ ಹಾಗೂ ಶಿರಾ ಶಾಸಕ ಟಿ.ಬಿ.ಜಯಚಂದ್ರ ಶಿರಾ ಜಿಲ್ಲೆಗೆ ಪಟ್ಟು ಹಿಡಿದಿದ್ದಾರೆ.

ಪಾವಗಡ ಭಾಗದ ಜನ ಜಿಲ್ಲಾ ಕೇಂದ್ರ ತುಮಕೂರಿಗೆ ಬಂದು ಹೋಗಲು ಒಂದು ದಿನವನ್ನೇ ಮೀಸಲಿಡಬೇಕು. ಮಧುಗಿರಿ, ಶಿರಾಕ್ಕೂ ತುಮಕೂರು ಜಿಲ್ಲಾ ಕೇಂದ್ರ ದೂರ. ತಿಪಟೂರಿನ ಗಡಿಭಾಗದ ಗ್ರಾಮಗಳ ಜನ ತುಮಕೂರಿಗೆ ಬರಲು 100 ಕಿ.ಮೀ. ಪ್ರಯಾಣಿಸಬೇಕು. ಜನಸಾಮಾನ್ಯರು ಮಾತ್ರವಲ್ಲದೆ ಅಧಿಕಾರಿಗಳು ಕೂಡಾ ಜಿಲ್ಲಾ ಮಟ್ಟದ ಕಚೇರಿಗಳಿಗೆ ಅಲೆಯುವುದು ಕಷ್ಟ. ಹೀಗಾಗಿ ವಿಭಜನೆ ಅನಿವಾರ್ಯ.