ಹೈಲೈಟ್ಸ್‌:
- ಅಮೆರಿಕಾದ ಷೇರುಪೇಟೆಯಲ್ಲಿ ಅಬ್ಬರದ ವಹಿವಾಟು ನಡೆಸುತ್ತಿದೆ ಎನ್ವಿಡಿಯಾ ಷೇರು
- ವಿಶ್ವದ ಅತ್ಯಂತ ಮೌಲ್ಯಯುತ ಕಂಪನಿಯಾಗಿ ಹೊರಹೊಮ್ಮಿದೆ ಸೆಮಿಕಂಡಕ್ಟರ್ ಚಿಪ್ ತಯಾರಕ
- ಮೈಕ್ರೋಸಾಫ್ಟ್ ಅನ್ನೇ ಹಿಂದಿಕ್ಕಿ ವಿಶ್ವದ ನಂಬರ್ 1 ಕಂಪನಿಯಾಗಿದೆ ಎನ್ವಿಡಿಯಾ
ವಿಶ್ವದ ಅತ್ಯಂತ ಮೌಲ್ಯಯುತ ಕಂಪನಿಯಾಗಿ ಹೊರಹೊಮ್ಮಿದೆ ಸೆಮಿಕಂಡಕ್ಟರ್ ಚಿಪ್ ತಯಾರಕ ಎನ್ವಿಡಿಯಾ
ಸೆಮಿಕಂಡಕ್ಟರ್, ಚಿಪ್ ಹಾಗೂ ಎಐನಲ್ಲಿ ಮುಂದಿರುವ ಎನ್ವಿಡಿಯಾ!
ಜಿಪಿಯು (ಗ್ರಾಫಿಕ್‌ ಪ್ರೊಸೆಸಿಂಗ್‌ ಯುನಿಟ್‌), ಎಐ, ರೊಬೊಟಿಕ್ಸ್, ಆಟೊನೊಮಸ್‌ ವಾಹನಗಳು ಮತ್ತು ಉದಯೋನ್ಮುಖ ತಂತ್ರಜ್ಞಾನಕ್ಕೆ ಬೇಕಾದ ಚಿಪ್‌ಗಳನ್ನು ತಯಾರಿಸುವಲ್ಲಿ ಪರಿಣತಿ ಸಾಧಿಸಿದರುವ ಎನ್ವಿಡಿಯಾ ಕಾರ್ಪೊರೇಷನ್ ಷೇರುಗಳು ಮಂಗಳವಾರ ಶೇ. 3ರಷ್ಟು ಏರಿಕೆ ಕಂಡಿದ್ದು 135.58 ಡಾಲರ್‌ಗೆ ತಲುಪಿವೆ. ಇದರಿಂದ ಕಂಪನಿಯ ಮಾರುಕಟ್ಟೆ ಮೌಲ್ಯ 110 ಬಿಲಿಯನ್ ಡಾಲರ್‌ನಷ್ಟು ಏರಿಕೆ ಕಂಡಿದ್ದು, 3.335 ಟ್ರಿಲಿಯನ್‌ ಡಾಲರ್‌ಗೆ ತಲುಪಿದೆ. ಈ ಮೂಲಕ ಆಪಲ್‌, ಮೈಕ್ರೋಸಾಫ್ಟ್ ಮೊದಲಾದ ದೈತ್ಯ ಕಂಪನಿಗಳನ್ನೇ ಹಿಂದಿಕ್ಕಿ ಜಗತ್ತಿನ ಅತ್ಯಂತ ಮೌಲ್ಯಯುತ ಕಂಪನಿ ಎನಿಸಿಕೊಂಡಿದೆ.
ಎನ್ವಿಡಿಯಾ ಷೇರು ಮೂರು ಪಟ್ಟು ಏರಿಕೆ
ಮೈಕ್ರೋಸಾಫ್ಟ್ ಷೇರುಗಳು ಈ ವರ್ಷ ಶೇ. 19ರಷ್ಟು ಏರಿಕೆಯಾಗಿದ್ದರೆ, ಇದೇ ವೇಳೆ ಎನ್ವಿಡಿಯಾ ಷೇರುಗಳು ಮೂರು ಪಟ್ಟು ಏರಿಕೆ ಕಂಡಿವೆ.ಎನ್ವಿಡಿಯಾದಲ್ಲಿ 1999ರಲ್ಲಿ 10000 ಹೂಡಿಕೆ ಮಾಡಿದ್ರೆ, ಈಗ ನೀವು ಕೋಟ್ಯಧಿಪತಿ!
ಎನ್ವಿಡಿಯಾ ಕಾರ್ಪ್‌ನಲ್ಲಿ 1999ರಲ್ಲಿ ತನ್ನ ಐಪಿಒ ತೆರೆದಿತ್ತು.ಈ ವೇಳೆ ಪ್ರತಿ ಷೇರಿಗೆ 12 ಡಾಲರ್ ದರದಲ್ಲಿ ಷೇರು ಹಂಚಿಕೆ ಮಾಡಿತ್ತು. ಗೇಮಿಂಗ್ ಮತ್ತು ಹೊಸ-ಯುಗದ ತಂತ್ರಜ್ಞಾನದ ಚಿಪ್‌ಗಳ ಅಭಿವೃದ್ಧಿಯಿಂದಾಗಿ ನಂತರದ ದಿನಗಳಲ್ಲಿ ಹಲವು ಬಾರಿ ಎನ್ವಿಡಿಯಾ ಷೇರುಗಳು ಗಗನಕ್ಕೇರಿದ್ದವು.
1999ರಲ್ಲಿ ಒಂದು ಡಾಲರ್ ಮೌಲ್ಯ 43 ರೂ. ಆಗಿತ್ತು. ಹಾಗಾಗಿ ನೀವು 10,000 ರೂ. ಹೂಡಿಕೆ ಮಾಡಿದರೆ ನಿಮಗೆ ಎನ್ವಿಡಿಯಾದ 19 ಷೇರುಗಳು ಸಿಗುತ್ತಿದ್ದವು. ಈವರೆಗೆ ಎನ್ವಿಡಿಯಾ ಕಾರ್ಪ್‌ ತನ್ನ ಹೂಡಿಕೆದಾರರಿಗೆ ಪ್ರತಿಫಲ ನೀಡಲು ಮತ್ತು ಹೂಡಿಕೆದಾರರಿಗೆ ತನ್ನ ಷೇರುಗಳನ್ನು ಹೊಂದುವುದನ್ನು ಸುಲಭವಾಗಿಸಲು ಹಲವು ಬಾರಿ ಷೇರು ವಿಭಜನೆಗಳನ್ನು ಘೋಷಿಸಿದೆ.
2000ನೇ ಇಸವಿಗೂ ಮುನ್ನ ಅಂದರೆ ಷೇರು ವಿಭಜನೆ ಪೂರ್ವದಲ್ಲಿ ಎನ್ವಿಡಿಯಾದ ಒಂದು ಷೇರು ಖರೀದಿಸಿದ್ದರೆ, ಇಂದು ನಿಮ್ಮ ಕೈಯಲ್ಲಿ 480 ಎನ್ವಿಡಿಯಾ ಷೇರುಗಳು ಇರುತ್ತಿದ್ದವು. ಇದರರ್ಥ ಐಪಿಒದಲ್ಲಿ ಖರೀದಿಸಿದ 19 ಷೇರುಗಳು ಕಂಪನಿಯ 9,120 ಷೇರುಗಳಾಗಿ ಬದಲಾಗುತ್ತಿದ್ದವು,
ಸದ್ಯ ಎನ್ವಿಡಿಯಾದ ಒಂದು ಷೇರಿನ ದರ 135 ಡಾಲರ್ ಆಗಿದೆ. ಇದರಿಂದ ಆಗಿನ 19 ಷೇರುಗಳ ಮೌಲ್ಯ ಈಗ 1.231 ಮಿಲಿಯನ್‌ ಡಾಲರ್ ಆಗಲಿದೆ. ಈಗಿನ ಡಾಲರ್ ವಿನಿಮಯ ದರ 83.40 ರೂ. ಲೆಕ್ಕದಲ್ಲಿ ಇದರ ಮೌಲ್ಯ ಬರೋಬ್ಬರಿ 10.3 ಕೋಟಿ ರೂ. ಆಗಿದೆ.
ಹಾಗಾಗಿ ನೀವೇನಾದರೂ 1999ರಲ್ಲಿ ಎನ್ವಿಡಿಯಾದಲ್ಲಿ 10,000 ರೂ. ಹೂಡಿಕೆ ಮಾಡಿದ್ದರೆ, ಸುಮಾರು 25 ವರ್ಷಗಳ ನಂತರ ಅದೇ ಹೂಡಿಕೆ ಮೌಲ್ಯ 10.3 ಕೋಟಿ ರೂ. ಆಗುತ್ತಿತ್ತು.