ಈ ಬಾರಿ ಭಾರ್ತಿ ಏರ್ಟೆಲ್ ಅತಿ ದೊಡ್ಡ ಮೊತ್ತದ ಹರಾಜುದಾರರಾಗಿ ಹೊರಹೊಮ್ಮಿದೆ. 900, 1800 ಮತ್ತು 2100 ಮೆಗಾ ಹರ್ಟ್ಜ್ ಬ್ಯಾಂಡ್‌ಗಳಲ್ಲಿನ ಸ್ಪೆಕ್ಟ್ರಮ್ ಅನ್ನು ಭಾರ್ತಿ ಏರ್ಟೆಲ್ ಖರೀದಿಸಿದೆ. ಟೆಲಿಕಾಂ ಕ್ಷೇತ್ರದಲ್ಲಿ ಏರ್‌ಟೆಲ್‌ಗೆ ತೀವ್ರ ಪೈಪೋಟಿ ನೀಡುತ್ತಿರುವ ರಿಲಯನ್ಸ್ ಜಿಯೋ 1800 ಮೆಗಾ ಹರ್ಟ್ಜ್ ಬ್ಯಾಂಡ್‌ನಲ್ಲಿ 5ಜಿ ತರಂಗಾಂತರವನ್ನು ಖರೀದಿಸಿರುವುದಾಗಿ ವರದಿಯಾಗಿದೆ. ಇನ್ನು ವೊಡಾಫೋನ್ ಐಡಿಯಾ 900, 1800 ಮತ್ತು 2500 ಮೆಗಾ ಹರ್ಟ್ಜ್ ಬ್ಯಾಂಡ್‌ನಲ್ಲಿ ಸ್ಪೆಕ್ಟ್ರಮ್ ಖರೀದಿ ನಡೆಸಿದೆ.
ಪ್ರಮುಖವಾಗಿ ಬಳಕೆಯಲ್ಲಿರುವ ತರಂಗಾಂತರ ಬ್ಯಾಂಡ್‌ಗಳ ಅವಧಿ ಮುಕ್ತಾಯವಾಗುತ್ತಿರುವ ವಲಯಗಳಲ್ಲಿ ಏರ್ಟೆಲ್ ಮತ್ತು ವೊಡಾಫೋನ್ ಐಡಿಯಾ ಸ್ಪೆಕ್ಟ್ರಮ್ ಖರೀದಿ ನಡೆಸಿವೆ. ಸ್ಪೆಕ್ಟ್ರಮ್ ಅನ್ನು 20 ವರ್ಷಗಳ ಅವಧಿಗೆ ನೀಡಲಾಗುತ್ತಿದೆ. ಯಶಸ್ವಿ ಬಿಡ್‌ ಮಾಡುವವರು ಹಣವನ್ನು 20 ಸಮಾನ ವಾರ್ಷಿಕ ಕಂತುಗಳಲ್ಲಿ ಪಾವತಿ ಮಾಡುವ ಸೌಲಭ್ಯವನ್ನು ಹೊಂದಿರುತ್ತಾರೆ. ರಿಲಯನ್ಸ್ ಜಿಯೋ ಸ್ಪೆಕ್ಟ್ರಮ್ ಹರಾಜಿಗಾಗಿ 3,000 ಕೋಟಿ ರೂ.ಗಳನ್ನು ಠೇವಣಿ ಮಾಡಿತ್ತು. ಭಾರ್ತಿ ಏರ್ಟೆಲ್ 1,050 ಕೋಟಿ ರೂ.ಗಳನ್ನು ಮತ್ತು ವೊಡಾಫೋನ್ ಐಡಿಯಾ 300 ಕೋಟಿ ರೂ.ಗಳನ್ನು ಠೇವಣಿ ಇರಿಸಿವೆ.
ಈ ವರ್ಷದ ಹರಾಜಿನಲ್ಲಿ ಸರಕಾರವು 10.5 ಗಿಗಾ ಹರ್ಟ್ಜ್‌ನ 5ಜಿ ತರಂಗಾಂತರಗಳನ್ನು 96,238.45 ಕೋಟಿ ರೂಪಾಯಿಗೆ ಮೀಸಲಿರಿಸಿದೆ. ಮಂಗಳವಾರ ಶುರುವಾದ ಹರಾಜು ಪ್ರಕ್ರಿಯೆಯಲ್ಲಿ ಮೊದಲ ದಿನ ಐದು ಸುತ್ತು ಹರಾಜು ನಡೆದಿತ್ತು. ಬೇಡಿಕೆ ಬಾರದ ಕಾರಣದಿಂದ ಎರಡನೇ ದಿನ ಒಂದೇ ಸುತ್ತಿನಲ್ಲಿ ಹರಾಜು ಪ್ರಕ್ರಿಯೆ ಮುಕ್ತಾಯವಾಗಿರುವುದಾಗಿ ತಿಳಿದು ಬಂದಿದೆ. ದೂರಸಂಪರ್ಕ ಇಲಾಖೆಯು ತರಂಗಾಂತರ ಹರಾಜು ಗಡುವನ್ನು 19 ದಿನಗಳವರೆಗೆ ವಿಸ್ತರಿಸಿತ್ತು. ಈ ಮೊದಲು ಜೂನ್ 6 ರಂದು ಹರಾಜು ನಡೆಯಬೇಕಿತ್ತು. ಅನಂತರ ಜೂನ್ 6 ರಿಂದ ಜೂನ್ 25ಕ್ಕೆ ಮುಂದೂಡಲಾಗಿತ್ತು.
2022ರಲ್ಲಿ 1.5 ಲಕ್ಷ ಕೋಟಿ ರೂ. ಸಂಗ್ರಹ
2022ರ ಜುಲೈನಲ್ಲಿ ಕೇಂದ್ರ ಸರಕಾರವು 5ಜಿ ತರಂಗಾಂತರಗಳ ಹರಾಜಿನಿಂದ 1,50,173 ಕೋಟಿ ರೂಪಾಯಿ ಸಂಗ್ರಹಿಸಿತ್ತು. 2021ರ ಮಾರ್ಚ್‌ನಲ್ಲಿ ನಡೆದಿದ್ದ 4ಜಿ ಹರಾಜು ಪ್ರಕ್ರಿಯೆಯಲ್ಲಿ 77,814 ಕೋಟಿ ರೂಪಾಯಿ ಸಂಗ್ರಹಿಸಲಾಗಿತ್ತು.2022ರಲ್ಲಿ ಏಳು ದಿನಗಳವರೆಗೂ 5ಜಿ ತರಂಗಾಂತರ ಹರಾಜು ಪ್ರಕ್ರಿಯೆ ನಡೆದಿತ್ತು. ಒಟ್ಟು 1.5 ಲಕ್ಷ ಕೋಟಿಯ ಸ್ಪೆಕ್ಟ್ರಮ್‌ನಲ್ಲಿ ಮುಕೇಶ್‌ ಅಂಬಾನಿಯವರ ಜಿಯೋ ಅತಿ ದೊಡ್ಡ ಬಿಡ್ಡರ್‌ ಆಗಿತ್ತು. 88,078 ಕೋಟಿ ರೂಪಾಯಿ ಖರ್ಚು ಮಾಡಿ ಲಭ್ಯವಿದ್ದ ಸ್ಪೆಕ್ಟ್ರಮ್ ಬ್ಯಾಂಡ್‌ಗಳ ಪೈಕಿ ಅರ್ಧದಷ್ಟು ಪಾಲನ್ನು ತನ್ನದಾಗಿಸಿಕೊಂಡಿತ್ತು. ಭಾರ್ತಿ ಏರ್ಟೆಲ್ 43,084 ಕೋಟಿ ರೂಪಾಯಿ ಹಾಗೂ ವೊಡಾಫೋನ್ ಐಡಿಯಾ 18,799 ಕೋಟಿ ಮೌಲ್ಯದ ಸ್ಪೆಕ್ಟ್ರಮ್ ಖರೀದಿ ಮಾಡಿದ್ದವು.
