2023ರ ಏಪ್ರಿಲ್‌ನಲ್ಲಿ 17.2 ಲಕ್ಷ ಉದ್ಯೋಗಿಗಳು ಇಪಿಎಫ್‌ಒ ಸೇರಿದ್ದರು. ಇದು ಏಪ್ರಿಲ್ 2018ರಲ್ಲಿ ಮೊದಲ ವೇತನದಾರರ ಡೇಟಾವನ್ನು ಪ್ರಕಟಿಸಿದಾಗಿನಿಂದ ಅಂದರೆ ಕಳೆದ 72 ತಿಂಗಳುಗಳಲ್ಲೇ ತಿಂಗಳೊಂದರಲ್ಲಿ ದಾಖಲಾದ ಉದ್ಯೋಗಿಗಳ ಅತ್ಯಧಿಕ ಸೇರ್ಪಡೆಯಾಗಿದೆ. ಗುರುವಾರ ಬಿಡುಗಡೆಯಾದ ಕಾರ್ಮಿಕ ಮತ್ತು ಉದ್ಯೋಗ ಸಚಿವಾಲಯದ ತಾತ್ಕಾಲಿಕ ದತ್ತಾಂಶಗಳು ಇದನ್ನು ಹೇಳಿವೆ.
ನಿವ್ವಳ ಸದಸ್ಯರ ಸೇರ್ಪಡೆಯಲ್ಲಿ 31.29% ಏರಿಕೆ
ಹಿಂದಿನ ತಿಂಗಳು ಅಂದರೆ ಮಾರ್ಚ್ 2024ಕ್ಕೆ ಹೋಲಿಸಿದರೆ ಏಪ್ರಿಲ್‌ನಲ್ಲಿ ನಿವ್ವಳ ಸದಸ್ಯರ ಸೇರ್ಪಡೆಯಲ್ಲಿ ಶೇ. 31.29ರಷ್ಟು ಬೆಳವಣಿಗೆ ದಾಖಲಾಗಿದೆ. ಕಾರ್ಮಿಕ ಮತ್ತು ಉದ್ಯೋಗ ಸಚಿವಾಲಯ ನೀಡಿದ ಮಾಹಿತಿ ಪ್ರಕಾರ, ಏಪ್ರಿಲ್ 2023ಕ್ಕೆ ಹೋಲಿಸಿದರೆ ನಿವ್ವಳ ಸದಸ್ಯರ ಸೇರ್ಪಡೆಯಲ್ಲಿ ಶೇ. 10ರಷ್ಟು ಬೆಳವಣಿಗೆ ಕಂಡುಬಂದಿದೆ.ಸದಸ್ಯರ ಸೇರ್ಪಡೆಯ ಈ ಬೆಳವಣಿಗೆಗೆ ಹಲವಾರು ಕಾರಣಗಳಿವೆ. ಅವುಗಳಲ್ಲಿ ಹೆಚ್ಚಿದ ಉದ್ಯೋಗಾವಕಾಶಗಳು, ಉದ್ಯೋಗಿ ಪ್ರಯೋಜನಗಳ ಬಗ್ಗೆ ಹೆಚ್ಚಿದ ಅರಿವು ಮತ್ತು ಇಪಿಎಫ್‌ಒದ ಕಾರ್ಯಕ್ರಮಗಳ ಪ್ರಭಾವ ಪ್ರಮುಖವಾಗಿವೆ.
ಹೊಸ ಸದಸ್ಯರ ಸಂಖ್ಯೆಯಲ್ಲಿ ಭಾರೀ ಏರಿಕೆ
ಇಪಿಎಫ್‌ಒ ಸೇರುತ್ತಿರುವ ಉದ್ಯೋಗಿಗಳ ಸಂಖ್ಯೆ ತಿಂಗಳಿಂದ ತಿಂಗಳಿಗೆ ಏರಿಕೆ ಕಾಣುತ್ತಲೇ ಇದೆ. ಈ ವರ್ಷದ ಏಪ್ರಿಲ್‌ನಲ್ಲಿ 8.87 ಲಕ್ಷ ಹೊಸ ಸದಸ್ಯರು ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆ ಸೇರಿದ್ದಾರೆ.ಅಂಕಿ-ಅಂಶಗಳ ಪ್ರಕಾರ ಹೊಸ ಸದಸ್ಯರಲ್ಲಿ 18 ರಿಂದ 25 ವರ್ಷ ವಯಸ್ಸಿನವರು ಹೆಚ್ಚಿನ ಸಂಖ್ಯೆಯಲ್ಲಿದ್ದಾರೆ. ಏಪ್ರಿಲ್ 2024ರಲ್ಲಿ ಇಪಿಎಫ್‌ಒಗೆ ಹೊಸದಾಗಿ ಸೇರಿದ ಒಟ್ಟು ಸದಸ್ಯರಲ್ಲಿ ಇವರ ಸಂಖ್ಯೆ ಶೇ. 55.50ರಷ್ಟಿದೆ. ಸಂಘಟಿತ ಉದ್ಯೋಗಕ್ಕೆ ಸೇರುತ್ತಿರುವ ಬಹುಪಾಲು ಸದಸ್ಯರು ಯುವಕರು ಎಂಬುದನ್ನು ಇದು ತೋರಿಸುತ್ತಿದೆ. ಮುಖ್ಯವಾಗಿ ಇವರು ಮೊದಲ ಬಾರಿಗೆ ಉದ್ಯೋಗ ಪಡೆದವರಾಗಿದ್ದಾರೆ.
ವೇತನದಾರರ ದತ್ತಾಂಶದ ಲಿಂಗ-ವಾರು ವಿಶ್ಲೇಷಣೆಯ ಪ್ರಕಾರ 8.87 ಲಕ್ಷ ಹೊಸ ಸದಸ್ಯರಲ್ಲಿ ಸುಮಾರು 2.49 ಲಕ್ಷ ಸದಸ್ಯರು ಮಹಿಳೆಯರಾಗಿದ್ದಾರೆ. ಅಲ್ಲದೆ, ಏಪ್ರಿಲ್ ತಿಂಗಳಲ್ಲಿ ನಿವ್ವಳ ಮಹಿಳಾ ಸದಸ್ಯರ ಸೇರ್ಪಡೆ ಸರಿಸುಮಾರು 3.91 ಲಕ್ಷ ಆಗಿತ್ತು. ಇದು ಮಾರ್ಚ್ 2024ರ ಹಿಂದಿನ ತಿಂಗಳಿಗೆ ಹೋಲಿಸಿದರೆ ಸರಿಸುಮಾರು ಶೇ. 35.06ರಷ್ಟು ಬೆಳವಣಿಗೆಯನ್ನು ತೋರಿಸುತ್ತದೆ.
