- ಸಿಎ ವಿಜಯಲಕ್ಷ್ಮೀ ಬಿ. ವಿ., ಚಾರ್ಟರ್ಡ್ ಅಕೌಟೆಂಟ್
ಎಲ್ಲರೂ ಆದಾಯ ತೆರಿಗೆಯ ರಿಟರ್ನ್ಸ್ (ITR) ಸಲ್ಲಿಸಬೇಕೇ?
ವಿವಿಧ ಆದಾಯ ಮೂಲಗಳಾದ ಸಂಬಳ, ಬಾಡಿಗೆ, ವ್ಯವಹಾರಗಳಿಂದ ಬಂದ ಲಾಭ, ಆಸ್ತಿ (ನಿವೇಶನ, ಮನೆ, ಷೇರು, ಕೃಷಿ ಭೂಮಿ ಇತರೆ ಸ್ಥಿರಾಸ್ತಿ - ಚರಾಸ್ತಿ ) ಮಾರಾಟದಿಂದ ಬರುವ ಲಾಭ, ಕೃಷಿ ಆದಾಯ, ಬಡ್ಡಿ, ಡಿವಿಡೆಂಡ್, ಉಡುಗೊರೆ ಇತ್ಯಾದಿಗಳ ಮೊತ್ತ ಮೂಲ ವಿನಾಯಿತಿಯ ಮಿತಿಗಿಂತಲೂ ಹೆಚ್ಚಿಗೆ ಇದ್ದಲ್ಲಿ ಆದಾಯ ತೆರಿಗೆ ರಿಟರ್ನ್ಸ್ ಅನ್ನು ಕಡ್ಡಾಯವಾಗಿ ಸಲ್ಲಿಸಬೇಕು. ಮೂಲ ವಿನಾಯಿತಿಯ ಮಿತಿಯ ಲೆಕ್ಕಚಾರಕ್ಕೆ ಯಾವುದೇ ರೀತಿಯ ಡಿಡಕ್ಷನ್ ಗಳನ್ನು (ಮನೆ ಖರೀದಿಯ ಸಾಲದ ಬಡ್ಡಿ, ಎಲ್‌ಐಸಿ, ಟ್ಯೂಷನ್ ಫೀ, ಭವಿಷ್ಯ ನಿಧಿ ಮತ್ತು ಕಾಯ್ದೆಯನ್ವಯವಿರುವ ಇತರೆ ಡಿಡಕ್ಷನ್ಸ್) ಕಳೆಯದೆ ಇರುವ ಆದಾಯವನ್ನು ಪರಿಗಣಿಸಬೇಕಾಗುತ್ತದೆ. ಮೂಲ ವಿನಾಯಿತಿಯ ಮಿತಿಯು ಈ ಕೆಳಕಂಡಂತಿದೆ:| ವರ್ಗೀಕರಣದ ವಿವರ | ಮೂಲ ವಿನಾಯಿತಿಯ ಮಿತಿ |
| 80 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ವ್ಯಕ್ತಿಗಳಿಗೆ / ಸಂಸ್ಥೆಗಳಿಗೆ / ಟ್ರಸ್ಟ್ ಗಳಿಗೆ | ರೂ. 3 ಲಕ್ಷ |
| 80 ವರ್ಷಕ್ಕಿಂತ ಮೇಲ್ಪಟ್ಟ ವ್ಯಕ್ತಿಗಳಿಗೆ | ರೂ. 5 ಲಕ್ಷ |
| ಕಂಪನಿ, ಪಾಲುದಾರಿಕಾ ಸಂಸ್ಥೆ ಮತ್ತು ಸಹಕಾರ ಸಂಘಗಳಿಗೆ | ಆದಾಯ ಶೂನ್ಯವಿದ್ದರೂ ಆದಾಯ ತೆರಿಗೆ ರಿಟರ್ನ್ಸ ಸಲ್ಲಿಸುವುದು ಕಡ್ಡಾಯ |
ಆದಾಯ ತೆರಿಗೆ ಕಾಯ್ದೆಯನ್ವಯ ಆದಾಯ ಮೂಲ ವಿನಾಯಿತಿ ಮಿತಿಯೊಳಗಿದ್ದರೂ ಸಹ ITR ಅನ್ನು ಫೈಲ್ ಮಾಡಬೇಕಾದ ಕೆಲವು ಷರತ್ತುಗಳು ಹೀಗಿವೆ
- ಒಂದು ಆರ್ಥಿಕ ವರ್ಷದಲ್ಲಿ ಒಬ್ಬ ವ್ಯಕ್ತಿಯು ಒಂದು ಅಥವಾ ಹೆಚ್ಚಿನ ಉಳಿತಾಯ ಬ್ಯಾಂಕ್ ಖಾತೆಗಳಲ್ಲಿ ರೂ. 50 ಲಕ್ಷಗಳನ್ನು ಠೇವಣಿ ಮಾಡಿದರೆ.
- ಒಂದು ಅಥವಾ ಹೆಚ್ಚಿನ ಚಾಲ್ತಿ ಖಾತೆಗಳಲ್ಲಿ ರೂ. 1 ಕೋಟಿ ಅಥವಾ ಅದಕ್ಕಿಂತ ಹೆಚ್ಚಿನ ಹಣವನ್ನು ಠೇವಣಿ ಮಾಡಿದರೆ.
- ವ್ಯಾಪಾರದಲ್ಲಿ ರೂ. 60 ಲಕ್ಷಕ್ಕಿಂತ ಹೆಚ್ಚಿನ ವಾರ್ಷಿಕ ಮಾರಾಟ ವಹಿವಾಟು ಮಾಡಿದರೆ.
- ಒಂದು ಆರ್ಥಿಕ ವರ್ಷದಲ್ಲಿ ವೃತ್ತಿಪರ ಆದಾಯವು ರೂ. 10 ಲಕ್ಷಗಳನ್ನು ಮೀರಿದರೆ.
- ಒಬ್ಬ ವ್ಯಕ್ತಿಯ ವಿದ್ಯುತ್ ಬಿಲ್ ರೂ. 1 ಲಕ್ಷಕ್ಕಿಂತ ಹೆಚ್ಚಿದ್ದರೆ.
- ಒಬ್ಬ ವ್ಯಕ್ತಿಯ TDS/TCS ರೂ. 25,000/- ಕ್ಕಿಂತ ಹೆಚ್ಚಿದ್ದರೆ, ಆದರೆ, ಈ ಮಿತಿ ಹಿರಿಯ ನಾಗರಿಕರಿಗೆ ರೂ. 50,000/- ಇದೆ.
- ಒಬ್ಬ ವ್ಯಕ್ತಿಯು ವಿದೇಶದಲ್ಲಿ ಆಸ್ತಿಯನ್ನು ಹೊಂದಿದ್ದರೆ ಅಥವಾ ವಿದೇಶದಲ್ಲಿ ಆಸ್ತಿಯ ಫಲಾನುಭವಿಯಾಗಿದ್ದರೆ.
- ಪ್ರಯಾಣಕ್ಕಾಗಿ ರೂ. 2 ಲಕ್ಷ ಅಥವಾ ಅದಕ್ಕಿಂತ ಹೆಚ್ಚು ಖರ್ಚು ಮಾಡಿದರೆ, ಅಂತಹ ವ್ಯಕ್ತಿಗಳು ಐಟಿಆರ್ ಅನ್ನು ಕಡ್ಡಾಯವಾಗಿ ಸಲ್ಲಿಸಬೇಕು.
ಕೆಲವು ಷರತ್ತುಗಳ ಪ್ರಕಾರ ಇವರೂ ಕೂಡ ITR ಸಲ್ಲಿಸುವುದು ಸೂಕ್ತ
ಈ ಷರತ್ತುಗಳೊಂದಿಗೆ ಕೆಳಗೆ ನಮೂದಿಸಿರುವ ವ್ಯವಹಾರಗಳನ್ನು ಮಾಡಿದ್ದರೆ, ಅದರ ಕುರಿತ ಮಾಹಿತಿ ಆದಾಯ ತೆರಿಗೆ ಇಲಾಖೆಗೆ ತಲುಪಿರುತ್ತದೆ, ರಿಟರ್ನ್ಸ ಸಲ್ಲಿಸದೇ ಇದ್ದಾಗ, ವ್ಯವಹಾರ ಮಾಡಿದ ಮೊತ್ತದ ಆದಾಯ ಮೂಲವನ್ನು ಕೇಳಿ ಇಲಾಖೆಯು ನೋಟೀಸ್ ಕಳುಹಿಸುವ ಸಾಧ್ಯತೆ ಹೆಚ್ಚಿರುತ್ತದೆ, ಹಾಗಾಗಿ ಇಂತಹ ವ್ಯವಹಾರಗಳನ್ನು ಮಾಡಿದಲ್ಲಿ, ಆದಾಯ ತೆರಿಗೆ ರಿಟರ್ನ ಸಲ್ಲಿಸುವುದು ಸೂಕ್ತ.- ಬ್ಯಾಂಕ್ ಡ್ರಾಫ್ಟ್‌ಗಳು, ಪೇ ಆರ್ಡರ್ಸ್‌, ಪೂರ್ವ-ಪಾವತಿಸಿದ ಉಪಕರಣಗಳ ಅಥವಾ ಬ್ಯಾಂಕರ್‌ನ ಚೆಕ್‌ಗಳನ್ನು ಖರೀದಿಸಲು ನಗದು ರೂಪದಲ್ಲಿ ಮಾಡಿದ ಪಾವತಿಯು ರೂ. 10 ಲಕ್ಷಗಳನ್ನು ಮೀರಿದರೆ.
- ಒಂದು ಅಥವಾ ಹೆಚ್ಚು ಚಾಲ್ತಿ ಖಾತೆಯಲ್ಲಿ ನಗದು ಠೇವಣಿ ಅಥವಾ ನಗದು ಹಿಂಪಡೆಯುವಿಕೆಗಳು (ಬೇರರ್ ಚೆಕ್ ಗಳು ಸೇರಿ) ಒಂದು ಹಣಕಾಸು ವರ್ಷದಲ್ಲಿ ರೂ. 50 ಲಕ್ಷಗಳನ್ನು ಮೀರಿದರೆ.
- ಒಂದು ಅಥವಾ ಹೆಚ್ಚು ಉಳಿತಾಯ ಖಾತೆಯಲ್ಲಿ ನಗದು ಠೇವಣಿ ಒಂದು ಹಣಕಾಸು ವರ್ಷದಲ್ಲಿ ರೂ. 10 ಲಕ್ಷಗಳನ್ನು ಮೀರಿದರೆ.
- ಒಂದು ಅಥವಾ ಹೆಚ್ಚು ನಿಶ್ಚಿತ ಠೇವಣೆಗಳಲ್ಲಿ ಒಂದು ಹಣಕಾಸು ವರ್ಷದಲ್ಲಿ ರೂ. 10 ಲಕ್ಷಗಳನ್ನು ಮೀರಿದ ಠೇವಣಿ ಮಾಡಿದರೆ.
- ಕ್ರೆಡಿಟ್ ಕಾರ್ಡ ಪಾವತಿಗಳು ಒಂದು ಆರ್ಥಿಕ ವರ್ಷದಲ್ಲಿ -
- (i) ನಗದಲ್ಲಿ ರೂ. ಒಂದು ಲಕ್ಷ ಮೀರಿದರೆ ಅಥವಾ
- (ii) ಬೇರೆ ಯಾವುದೇ ವಿಧಾನದಿಂದ ರೂ. 10 ಲಕ್ಷ ಗಳನ್ನು ಮೀರಿದರೆ.
- ಷೇರು / ಮ್ಯೂಚುಯಲ್ ಫಂಡ್/ ಬಾಂಡ್‌/ ಡಿಬೆಂಚರ್‌ಗಳನ್ನು/ಖರೀದಿಸಲು ಒಂದು ಹಣಕಾಸು ವರ್ಷದಲ್ಲಿ ರೂ. 10 ಲಕ್ಷ ಮೀರಿದ ಪಾವತಿ ಮಾಡಿದರೆ.
- ವಿದೇಶಿ ಕರೆನ್ಸಿ / ಕ್ರೆಡಿಟ್ / ಡೆಬಿಟ್ ಮೂಲಕ ಪಾವತಿಗಳು ರೂ. 10 ಲಕ್ಷಗಳನ್ನು ಮೀರಿದರೆ
- ರೂ. 30 ಲಕ್ಷಕ್ಕೂ ಮೀರಿದ ಸ್ಥಿರಾಸ್ತಿಯ ಖರೀದಿ ಮಾಡಿದರೆ.
- ಸರಕು ಅಥವಾ ಸೇವೆಗಳಿಗಾಗಿ ರೂ. 2 ಲಕ್ಷಕ್ಕಿಂತ ಹೆಚ್ಚಿನ ನಗದು ಪಾವತಿ ಮಾಡಿದರೆ.
ಆದಾಯ ತೆರಿಗೆ ರಿಟರ್ನ್ಸ್ (ITR) ಸಲ್ಲಿಸುವಿಕೆಯ ಪ್ರಯೋಜನಗಳೇನು?
- ದೇಶದ ಅಭಿವೃದ್ಧಿಗಾಗಿ ಪ್ರಜೆಗಳು ನೀಡುವ ತಮ್ಮ ಆದಾಯದ ಪಾಲು ತೆರಿಗೆಯಾಗಿರುತ್ತದೆ, ತೆರಿಗೆ ಪಾವತಿ ಕೇವಲ ಕರ್ತವ್ಯವಲ್ಲ, ತೆರಿಗೆದಾರರ ಹೆಮ್ಮೆ.
- TDS ಅನ್ನು ವ್ಯಕ್ತಿಗೆ ಅನ್ವಯಿಸುವ ತೆರಿಗೆಗಿಂತ ಅಧಿಕವಾಗಿ ಕಡಿತಗೊಳಿಸಿದ್ದರೆ, ಅದನ್ನು ITR ಫೈಲ್ ಮಾಡುವ ಮೂಲಕ ಮರುಪಾವತಿಯನ್ನು ಪಡೆಯಬಹುದು.
- ನಿಗದಿತ ಸಮಯದೊಳಗೆ ITR ಫೈಲ್‌ಮಾಡುವುದರಿಂದ ನಷ್ಟವಿದ್ದರೆ ಅದನ್ನು ಮುಂದಿನ ವರ್ಷಗಳಲ್ಲಿ ಬರುವ ಲಾಭಕ್ಕೆ ಪ್ರತಿಭಾರ ಮಾಡಿ, ತೆರಿಗೆಯನ್ನು ಕಡಿಮೆ ಪಾವತಿಸಬಹುದು.
- ಬ್ಯಾಂಕ್ ಗಳು ಸಾಲವನ್ನು ನೀಡುವಾಗ ಆದಾಯದ ಪುರಾವೆಯಾಗಿ ITR ಅನ್ನು ಕೇಳುತ್ತಾರೆ, ಆದಾಯ ತೆರಿಗೆ ರಿಟರ್ನ ಸಲ್ಲಿಸಿದ್ದಲ್ಲಿ, ಸುಲಭವಾಗಿ ಸಾಲ ಅನುಮೋದನೆಗೊಳ್ಳುತ್ತದೆ.
- ಹೆಚ್ಚಿನ ರಾಯಭಾರಿ ಕಚೇರಿಗಳು ವೀಸಾಕ್ಕೆ ಅರ್ಜಿ ಸಲ್ಲಿಸುವಾಗ ಹಿಂದಿನ ವರ್ಷಗಳ ನಿಮ್ಮ ಆದಾಯ ತೆರಿಗೆ ರಿಟರ್ನ್‌ಗಳನ್ನು ಕೇಳುತ್ತಾರೆ, ಹೀಗೆ ITR ಇದ್ದಲ್ಲಿ ತ್ವರಿತವಾಗಿ ವೀಸಾ ದೊರಕುತ್ತದೆ.
2023-24 ಆರ್ಥಿಕ ವರ್ಷದ ITR ಅನ್ನು ಫೈಲ್ ಮಾಡಲು ಕೊನೆಯ ದಿನಾಂಕ ಯಾವುದು?
ITR ಸಲ್ಲಿಸಲು ಕೊನೆಯ ದಿನಾಂಕ ಪ್ರತಿ ವರ್ಷ 31 ಜುಲೈ ಆಗಿರುತ್ತದೆ. ನಿಗದಿತ ಸಮಯದೊಳಗೆ ಸಲ್ಲಿಸಲು ಸಾಧ್ಯವಾಗದೇ ಇದ್ದರೆ, ಬಡ್ಡಿ ಮತ್ತು ದಂಡದೊಂದಿಗೆ ಡಿಸೆಂಬರ್ 31 ರ ಒಳಗಾಗಿ ಸಲ್ಲಿಸಬಹುದು. ತೆರಿಗೆ ಲೆಕ್ಕ‌ಪರಿಶೋಧನೆಗೆ ಒಳಪಟ್ಟ ವ್ಯಕ್ತಿಗಳಾಗಿದ್ದರೆ 31ನೇ ಅಕ್ಟೋಬರ್ 2024ರವರೆಗೂ ಸಮಯವಿರುತ್ತದೆ.ITR ಅನ್ನು ನಿಗದಿತ ದಿನಾಂಕದೊಳಗೆ ಸಲ್ಲಿಸದಿದ್ದರೆ ಆಗುವ ಅಡ್ಡ ಪರಿಣಾಮಗಳು
ITR ಅನ್ನು 2024ರ ಜುಲೈ 31ರೊಳಗೆ ಸಲ್ಲಿಸದಿದ್ದರೆ ಲೇಟ್ ಫೈಲಿಂಗ್ ಶುಲ್ಕವಾಗಿ ರೂ. 5,000/- (ರೂ. 5 ಲಕ್ಷಕ್ಕಿಂತ ಹೆಚ್ಚಿನ ಆದಾಯದವರು) ಹಾಗೂ ರೂ. 1,000/- (ರೂ. 5 ಲಕ್ಷಕ್ಕಿಂತ ಕಡಿಮೆ ಆದಾಯದವರು)ಪಾವತಿಸಬೇಕಾಗುತ್ತದೆ.ತಡವಾಗಿ ಸಲ್ಲಿಸಿದ ಅವಧಿಗೆ ತೆರಿಗೆದಾರರು ಪ್ರತಿ ತಿಂಗಳು 1% ಬಡ್ಡಿಯನ್ನು ಪಾವತಿಸಬೇಕು.
ತೆರಿಗೆ ಅಧಿಕಾರಿಗಳು ತೆರಿಗೆ ವಂಚನೆ ಎಂದು ಕೂಡ ಪರಿಗಣಿಸಬಹುದು ಹಾಗೂ 6 ತಿಂಗಳಿಂದ 7 ವರ್ಷಗಳವರೆಗೆ ಜೈಲು ಶಿಕ್ಷೆಯನ್ನು ಎದುರಿಸಬೇಕಾಗುತ್ತದೆ.
ಆದಾಯ ತೆರಿಗೆ ರಿಟರ್ನ್ಸ್ ಸಲ್ಲಿಸುವುದು ಕೇವಲ ಕಾನೂನು ಬಾಧ್ಯತೆ ಮಾತ್ರವಲ್ಲದೆ ಪ್ರಜೆಗಳು ರಾಷ್ಟ್ರಕ್ಕಾಗಿ ತೋರುವ ಆರ್ಥಿಕ ದೇಶಪ್ರೇಮವಾಗಿರುತ್ತದೆ. ಆದಾಯ ತೆರಿಗೆ ರಿಟರ್ನ್ಸ ಯಾರು, ಯಾಕೆ ಮತ್ತು ಯಾವಾಗ ಸಲ್ಲಿಸಬೇಕು ಎಂಬುದನ್ನು ಅರ್ಥಮಾಡಿಕೊಳ್ಳುವ ಮೂಲಕ ತೆರಿಗೆದಾರರು ದಂಡವನ್ನು ತಪ್ಪಿಸಬಹುದು ಮತ್ತು ರಾಷ್ಟ್ರ ನಿರ್ಮಾಣಕ್ಕೆ ಕೊಡುಗೆ ನೀಡಬಹುದು. ನೆನಪಿಡಿ, ಸಕಾಲಿಕ ಮತ್ತು ನಿಖರವಾದ ತೆರಿಗೆ ಸಲ್ಲಿಸುವಿಕೆ ದೇಶದ ಹಣಕಾಸಿನ ಸುವ್ಯವಸ್ಥೆಯನ್ನು ಕಾಪಾಡುವಲ್ಲಿ ಮಹತ್ವದ ಪಾತ್ರವನ್ನು ವಹಿಸುತ್ತದೆ.
