- ಸಿಎ ವಿಜಯಲಕ್ಷ್ಮೀ ಬಿ. ವಿ., ಚಾರ್ಟರ್ಡ್ ಅಕೌಟೆಂಟ್
ಕರ್ನಾಟಕದಲ್ಲಿ ಗರಿಷ್ಠ ಎಷ್ಟು ಬಡ್ಡಿ ವಿಧಿಸಲು ಅವಕಾಶವಿದೆ?
ಭದ್ರತೆಯ ಸಾಲಗಳಿಗೆ ಅಂದರೆ ಆಸ್ತಿ ಅಥವಾ ಚಿನ್ನವನ್ನು ಭದ್ರತೆ ಇಟ್ಟು ಪಡೆಯುವ ಸಾಲಕ್ಕೆ ವಾರ್ಷಿಕ ಗರಿಷ್ಠ 14% ಹಾಗೂ ಭದ್ರತಾರಹಿತ ಸಾಲಗಳಿಗೆ ವಾರ್ಷಿಕ ಗರಿಷ್ಠ 16% ಬಡ್ಡಿದರವನ್ನು ರಾಜ್ಯ ಸರ್ಕಾರವು ನಿಗಧಿಪಡಿಸಿದೆ. ಆದರೆ ಕಾಯ್ದೆ / ಅಧಿಸೂಚನೆಯಲ್ಲಿ ಸುಸ್ತಿ ಬಡ್ಡಿಯ ಬಗ್ಗೆ ಯಾವುದೇ ಮಿತಿ ಅಥವಾ ಚೌಕಟ್ಟನ್ನು ನಿಗಧಿಪಡಿಸಿಲ್ಲ. ಈ ಮಿತಿಗಿಂತಲೂ ಹೆಚ್ಚು ಬಡ್ಡಿ ವಿಧಿಸಿದರೆ ಜೈಲು ಶಿಕ್ಷೆ ಮತ್ತು ದಂಡಕ್ಕೆ ಗುರಿಯಾಗುತ್ತಾರೆ.ಈ ಬಗ್ಗೆ ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸುವ ಹಿನ್ನೆಲೆಯಲ್ಲಿ, ಸಂಸ್ಥೆಗಳು ಸರ್ಕಾರ ನಿಗಧಿಪಡಿಸಿರುವ ಬಡ್ಡಿದರದ ಬಗ್ಗೆ ತಾವು ವ್ಯವಹರಿಸುತ್ತಿರುವ ಕಛೇರಿಗಳಲ್ಲಿ ಸೂಚನಾ ಫಲಕಗಳನ್ನು ಮಾಡಿಸಿ, ನಗದು ಕಪಾಟಿನ ಪಕ್ಕದಲ್ಲಿ ಕಡ್ಡಾಯವಾಗಿ ಪ್ರದರ್ಶಿಸಬೇಕೆಂದು ಸ್ಪಷ್ಟ ಸೂಚನೆಯನ್ನು ನೀಡಲಾಗಿದೆ.
ಗರಿಷ್ಠ 28% ವರೆಗೆ ಬಡ್ಡಿ ವಿಧಿಸಿರುವ ಕುರಿತು ದೂರು ಬಂದಿವೆ
ಆದರೆ, ಯಾವುದೇ ಲೇವಾದೇವಿ / ಗಿರವಿ / ಹಣಕಾಸು ಸಂಸ್ಥೆಗಳು ಈ ರೀತಿ ಬಡ್ಡಿ ನಿಗಧಿಪಡಿಸಿರುವ ನಾಮಫಲಕವನ್ನು ಅಂಗಡಿಗಳಲ್ಲಿ ಪ್ರದರ್ಶಿಸಿರುವುದಿಲ್ಲ. ಸರ್ಕಾರವು ಅಧಿಸೂಚನೆಯ ಮೂಲಕ ನಿಗಧಿಪಡಿಸಿರುವ ಬಡ್ಡಿ ವಿಧಿಸದೆ, ಎರಡೆರಡು ರಸೀದಿ ಪುಸ್ತಕಗಳನ್ನು ನಿರ್ವಹಣೆ ಮಾಡಿ, ಗರಿಷ್ಠ 28% ವರೆಗೆ ಬಡ್ಡಿ ವಿಧಿಸಿ, ಸಾರ್ವಜನಿಕರನ್ನು ವಂಚಿಸಿ, ಹಣ ಸುಲಿಗೆ ಮಾಡುತ್ತಿರುವುದಾಗಿ ಹಲವು ದೂರುಗಳು ಸ್ವೀಕೃತವಾಗಿರುತ್ತದೆ.ಈ ಹಿನ್ನಲೆಯಲ್ಲಿ ಜಿಲ್ಲಾ ಉಪನಿಬಂಧಕರುಗಳು ಮತ್ತು ಉಪವಿಭಾಗೀಯ ಸಹಾಯಕ ನಿಬಂಧಕರುಗಳು ಲೇವಾದೇವಿ/ಗಿರವಿ/ಹಣಕಾಸು ಸಂಸ್ಥೆಗಳ ಪರಿವೀಕ್ಷಣೆ ಕೈಗೊಂಡು. ತ್ರೈಮಾಸಿಕವಾಗಿ ಪರಿವೀಕ್ಷಣಾ ವರದಿಗಳನ್ನು ಸಲ್ಲಿಸುವಂತೆ ಕರ್ನಾಟಕ ರಾಜ್ಯ ಸಹಕಾರ ಸಂಘಗಳ ನಿಬಂಧಕರಾದ ಕ್ಯಾಪ್ಟನ್ ಡಾ.ಕೆ. ರಾಜೇಂದ್ರ ಸೂಚಿಸಿದ್ದಾರೆ.
ಹಣಕಾಸು ಮಾರುಕಟ್ಟೆಯನ್ನು ಸಂಘಟಿತ ಮತ್ತು ಅಸಂಘಟಿತ ವಲಯಗಳಾಗಿ ವರ್ಗೀಕರಿಸಲಾಗಿದೆ. ಸಂಘಟಿತ ವಲಯವು ಬ್ಯಾಂಕುಗಳು, ಹಣಕಾಸು ಸಂಸ್ಥೆಗಳು ಮತ್ತು ಇತರೆ ನಿಯಂತ್ರಿತ ಘಟಕಗಳನ್ನು ಒಳಗೊಂಡರೆ, ಅಸಂಘಟಿತ ವಲಯವು ಲೇವಾದೇವಿದಾರರು, ಗಿರವಿದಾರರು, ಚಿಟ್ ಫಂಡ್‌ಗಳು, ಪತ್ತಿನ ಸಹಕಾರ ಸಂಘಗಳು ಮತ್ತು ಇತರೆ ಅನೌಪಚಾರಿಕ ಹಣಕಾಸು ಮಧ್ಯವರ್ತಿಗಳನ್ನು ಒಳಗೊಂಡಿರುತ್ತದೆ. ಸಂಘಟಿತ ವಲಯ ಕಾನೂನು ಚೌಕಟ್ಟಿನ ಅಡಿಯಲ್ಲಿ ಕಾರ್ಯನಿರ್ವಹಿಸುತ್ತದೆ ಮತ್ತು ಅವುಗಳು ನೀಡುವ ಸಾಲದಿಂದ ಹಿಡಿದು ಠೇವಣಿ- ಹೂಡಿಕೆಗಳವರೆಗೂ ಸಂಪೂರ್ಣ ಪರಿವೀಕ್ಷಣೆ ಭಾರತೀಯ ರಿಸರ್ವ್‌ ಬ್ಯಾಂಕ್ ಸುರ್ಪದಿಗೆ ಬರುತ್ತದೆ, ಆದರೆ ಅಸಂಘಟಿತ ವಲಯವನ್ನು ಪರಿವೀಕ್ಷಿಸಲು ರಿಸರ್ವ್‌ ಬ್ಯಾಂಕ್ ನಂತಹ ನಿಯಂತ್ರಕ ಸಂಸ್ಥೆ ಇರುವುದಿಲ್ಲ.
ಭಾರತದಲ್ಲಿ ಸುಮಾರು ಅರ್ಧದಷ್ಟು ಆರ್ಥಿಕ ಚಟುವಟಿಕೆಗಳು ಅಸಂಘಟಿತ ವಲಯಗಳಲ್ಲಿ ನಡೆಯುತ್ತಿದೆ, ಇದರಿಂದ ಹಲವಾರು ರೀತಿಯ ಆರ್ಥಿಕ ವಂಚನೆಗಳು ನಡೆಯುತ್ತಿವೆ, ಇದನ್ನು ತಡೆಯಲು ಕೆಲವು ಕಾನೂನುಗಳನ್ನು ರೂಪಿಸಲಾಗಿದ್ದು, ಅದರಲ್ಲಿ ಕರ್ನಾಟಕ ಮಿತಿಮೀರಿದ ಬಡ್ಡಿದರ ವಿಧಿಸುವಿಕೆಯ ನಿಷೇಧ ಕಾಯ್ದೆ, 2003 ಮತ್ತು ಕರ್ನಾಟಕ ಲೇವಾದೇವಿದಾರರ ಅಧಿನಿಯಮ 1961ರ ಪ್ರಕರಣ 28ರ ರೀತ್ಯ ಲೇವಾದೇವಿದಾರರು, ಗಿರವಿದಾರರು ಹಾಗೂ ಹಣಕಾಸು ಸಂಸ್ಥೆಗಳು ಸಾಲದ ಮೇಲೆ ವಿಧಿಸಬಹುದಾದ ಗರಿಷ್ಡ ಬಡ್ಡಿಯನ್ನು ಕಾಲಕಾಲಕ್ಕೆ ನಿಗಧಿಪಡಿಸಲು ರಾಜ್ಯ ಸರ್ಕಾರಕ್ಕೆ ಅಧಿಕಾರವನ್ನು ನೀಡಿದೆ.
