ഹൈലൈറ്റ്:
- 28 കമ്പനികൾ ഡിവിഡന്റ് നൽകുന്നു
- 4 ഓഹരികൾ 50ലധികം രൂപ കൈമാറും
- വരുന്നയാഴ്ചയിൽ എക്സ്-ഡിവിഡന്റ് തീയതി
സ്വരാജ് എൻജിൻസ്
ട്രാക്ടറുകൾക്ക് ആവശ്യമായ വിവിധ ശേഷിയിലുള്ള ഡീസൽ എൻജിനുകളും മറ്റ് ഹൈ-ടെക് എൻജിനുകളുടെ ഘടകങ്ങളും നിർമിച്ചു നൽകുന്ന ഓട്ടോ ആൻസിലറീസ് കമ്പനിയാണ് സ്വരാജ് എൻജിൻസ് ലിമിറ്റഡ് (BSE: 500407, NSE: SWARAJENG). 2023-24 സാമ്പത്തിക വർഷത്തേക്കുള്ള ഫൈനൽ ഡിവിഡന്റ് ആയി പ്രതിയോഹരി 95 രൂപ വീതം നൽകുമെന്നാണ് കമ്പനിയുടെ പ്രഖ്യാപനം. ഇതിന്റെ ഭാഗമായുള്ള എക്സ്-ഡിവിഡന്റ് തീയതി ജൂൺ 28 ആകുന്നു. എല്ലാ വർഷവും മുടങ്ങാതെ നിക്ഷേപകർക്ക് ലാഭവിഹിതം നൽകുന്ന സ്മോൾ ക്യാപ് ഓഹരിയാണിത്. കഴിഞ്ഞ വർഷം ഓഹരിയൊന്നിന് 92 രൂപ വീതമായിരുന്നു ഡിവിഡന്റ് ഇനത്തിൽ കൈമാറിയത്. നിലവിൽ ഓഹരിയുടെ ഡിവിഡന്റ് യീൽഡ് 3.11 ശതമാനമാകുന്നു. ഇത് മികച്ച ഡിവിഡന്റ് നിലവാരമാണ്. അതേസമയം സ്വരാജ് എൻജിൻസ് ഓഹരികൾ 3,050 രൂപ നിലവാരത്തിലാണ് വെള്ളിയാഴ്ച ട്രേഡ് ചെയ്യപ്പെട്ടത്.
ടാറ്റ എലക്സി
ഓട്ടോമോട്ടീവ്, ഹെൽത്ത്കെയർ, ട്രാൻസ്പോർട്ടേഷൻ, ബ്രോഡ്കാസ്റ്റ്, കമ്മ്യൂണിക്കേഷൻസ് തുടങ്ങിയ വ്യവസായ മേഖലകളിലേക്ക് ഡിസൈനിങ്, ടെക്നോളജി സേവനങ്ങൾ നൽകുന്ന ടാറ്റ ഗ്രൂപ്പ് ഐടി കമ്പനിയാണ് ടാറ്റ എലക്സി ലിമിറ്റഡ് (BSE: 500408, NSE: TATAELXSI). കഴിഞ്ഞ സാമ്പത്തിക വർഷത്തേക്കുള്ള അന്തിമ ലാഭവിഹിതമായി ഓഹരിയൊന്നിന് 70 രൂപ വീതം നൽകുമെന്നാണ് ടാറ്റ എലക്സിയുടെ അറിയിപ്പ്. ഇതിന്റെ ഭാഗമായുള്ള എക്സ്-ഡിവിഡന്റ് തീയതിയായി ജൂൺ 25 ആണ് നിശ്ചയിച്ചിരിക്കുന്നത്. മുടക്കമില്ലാതെ ഓഹരി ഉടമകൾക്ക് ലാഭവിഹിതം കൈമാറുന്ന മിഡ് ക്യാപ് ഓഹരിയാണിത്. കഴിഞ്ഞ വർഷം ഓഹരിയൊന്നിന് 60.60 രൂപ വീതമായിരുന്നു, ഡിവിഡന്റ് ഇനത്തിൽ നിക്ഷേപകർക്ക് നൽകിയത്. അതേസമയം ടാറ്റ എലക്സി ഓഹരികൾ 7,100 രൂപ നിലവാരത്തിലാണ് നിലവിൽ വ്യാപാരം ചെയ്യപ്പെടുന്നത്.
മഹാരാഷ്ട്ര സ്കൂട്ടേർസ്
ബജാജ് ഗ്രൂപ്പിന്റെ ഭാഗമായ ഓട്ടോ ആൻസിലറീസ് കമ്പനിയാണ് മഹാരാഷ്ട്ര സ്കൂട്ടേർസ് ലിമിറ്റഡ് (BSE: 500266, NSE: MAHSCOOTER). വാഹന നിർമാണത്തിനു ആവശ്യമായ വിവിധ ഘടകങ്ങൾ നിർമിക്കുന്നതിനോടൊപ്പം അൺരജിസ്റ്റേഡ് കോർ ഇൻവെസ്റ്റ്മെന്റ് കമ്പനിയായും പ്രവർത്തിക്കുന്നു. 2023-24 സാമ്പത്തിക വർഷത്തേക്കുള്ള ഫൈനൽ ഡിവിഡന്റ് ആയി പ്രതിയോഹരി 60 രൂപ വീതം നൽകുമെന്നാണ് മഹാരാഷ്ട്ര സ്കൂട്ടേർസിന്റെ പ്രഖ്യാപനം. ഇതിന്റെ ഭാഗമായുള്ള എക്സ്-ഡിവിഡന്റ് തീയതി ജൂൺ 28 ആകുന്നു. ഇതിന് മുൻപ് 2023 സെപ്റ്റംബർ മാസത്തിൽ ഇടക്കാല ലാഭവിഹിതമായി 110 രൂപ വീതവും 2023 ജൂണിൽ അന്തിമ ലാഭവിഹിതമായി 60 രൂപ വീതവും നിക്ഷേപകർക്ക് നൽകിയിരുന്നു. മുടങ്ങാതെ ലാഭവിഹിതം കൈമാറുന്ന ഈ സ്മോൾ ക്യാപ് ഓഹരിയുടെ ഡിവിഡന്റ് യീൽഡ് 2.05 ശതമാനമാണ്. മെച്ചപ്പെട്ട ഡിവിഡന്റ് നിലവാരമാണിത്. അതേസമയം മഹാരാഷ്ട്ര സ്കൂട്ടേർസ് ഓഹരികൾ 8,300 രൂപ നിലവാരത്തിലാണ് വെള്ളിയാഴ്ച ട്രേഡ് ചെയ്യപ്പെട്ടത്.
സെറ സാനിറ്ററിവെയർ
ബാത്ത്റൂം ഫിറ്റിങ്ങുകളും ടൈലുകളും ഉൾപ്പെടെയുള്ള ബിൽഡിങ് പ്രോഡക്ടുകൾ നിർമിക്കുന്ന പ്രമുഖ കമ്പനിയാണ് സെറ സാനിറ്ററിവെയർ ലിമിറ്റഡ് (BSE: 532443, NSE: CERA). 2023-24 സാമ്പത്തിക വർഷത്തേക്കുള്ള അന്തിമ ലാഭവിഹിതമായി ഓഹരിയൊന്നിന് 60 രൂപ വീതം നൽകുമെന്നാണ് സെറ സാനിറ്ററിവെയർ കമ്പനിയുടെ അറിയിപ്പ്. ഇതിന്റെ ഭാഗമായുള്ള എക്സ്-ഡിവിഡന്റ് തീയതിയായി ജൂൺ 25നാണ് നിശ്ചയിച്ചിരിക്കുന്നത്. മുടക്കമില്ലാതെ ഓഹരി ഉടമകൾക്ക് ലാഭവിഹിതം നൽകുന്ന മിഡ് ക്യാപ് ഓഹരിയുമാണിത്. കഴിഞ്ഞ വർഷം ഡിവിഡന്റ് ഇനത്തിൽ പ്രതിയോഹരി 60.60 രൂപ വീതം നിക്ഷേപകർക്ക് കൈമാറിയിരുന്നു. നിലവിൽ 9,100 രൂപ നിലവാരത്തിലാണ് സെറ സാനിറ്ററിവെയർ ഓഹരികൾ വ്യാപാരം ചെയ്യപ്പെടുന്നത്.
മറ്റ് ഡിവിഡന്റ് ഓഹരികൾ
പുതിയ വ്യാപാര ആഴ്ചയിൽ മറ്റ് ആറ് ഓഹരികൾ കൂടി പത്തിലധികം രൂപ ലാഭവിഹിതമായി നിക്ഷേപകർക്ക് നൽകുന്നുണ്ട്. ഇതിൽ ബജാജ് ഹോൾഡിങ്സ് ആൻഡ് ഇൻവെസ്റ്റ്മെന്റ്സ് ഓഹരികൾ ഫൈനൽ ഡിവിഡന്റ് ഇനത്തിൽ 21 രൂപ വീതം കൈമാറും. ഇതിനായുള്ള റെക്കോഡ് തീയതിയും എക്സ്-ഡിവിഡന്റ് തീയതിയും ജൂൺ 28 ആകുന്നു. പ്രമുഖ സ്വകാര്യ ബാങ്കിങ് സ്ഥാപനമായ ഇൻഡസിൻഡ് ബാങ്ക് 16.50 രൂപ വീതം അന്തിമ ലാഭവിഹിതമായി നൽകുന്നുണ്ട്. ഇതിന്റെയും റെക്കോഡ് തീയതി ജൂൺ 28 ആണ്. സമാനമായി ആർപിജി ലൈഫ് സയൻസസ് ഓഹരികൾ 16 രൂപ വീതം ഫൈനൽ ഡിവിഡന്റ് ഇനത്തിൽ നിക്ഷേപകർക്ക് കൈമാറും. ഇതിന്റെ റെക്കോഡ് തീയതിയും എക്സ്-ഡിവിഡന്റ് തീയതിയും ജൂൺ 28 ആകുന്നു.
നിപ്പോൺ ലൈഫ് ഇന്ത്യ അസറ്റ് മാനേജ്മെന്റ് ഓഹരികൾ 11 രൂപ വീതം അന്തിമ ലാഭവിഹിതമായി നൽകും. ഇതിന്റെ റെക്കോഡ് തീയതി ജൂൺ 28 ആണ്. സമാനമായി ടാറ്റ ഗ്രൂപ്പ് ഓഹരിയായ ടൈറ്റൻ കമ്പനി 11 രൂപ വീതം ഫൈനൽ ഡിവിഡന്റ് ഇനത്തിൽ നൽകുന്നു. ഇതിന്റെ എക്സ്-ഡിവിഡന്റ് തീയതി ജൂൺ 27 ആകുന്നു. പ്രമുഖ സ്പെഷ്യാൽറ്റി കെമിക്കൽസ് കമ്പനിയായ ആൽക്കൈൽ അമിൻസ് കെമിക്കൽസ് ഓഹരികൾ അന്തിമ ലാഭവിഹിതമായി പ്രതിയോഹരി 10 രൂപ വീതം നൽകും. ഇതിന്റെ എക്സ്-ഡിവിഡന്റ് തീയതി ജൂൺ 25നാണ് നിശ്ചയിച്ചിരിക്കുന്നത്.
(Disclaimer: മേൽസൂചിപ്പിച്ച വിവരം പഠനാവശ്യാർത്ഥം പങ്കുവെച്ചതാണ്. ഇതു നിക്ഷേപത്തിനുള്ള ഉപദേശമോ നിർദേശമോ അല്ല. ഓഹരി നിക്ഷേപം വിപണിയുടെ ലാഭനഷ്ട സാധ്യതകൾക്ക് വിധേയമാണ്. ഓഹരിയിൽ നിക്ഷേപിക്കുന്നതിന് മുൻപ്, സെബി അംഗീകൃത സാമ്പത്തിക വിദഗ്ധരുടെ സേവനം നിങ്ങൾക്ക് തേടാവുന്നതാണ്.)
ഓഹരി ഉടമകൾക്ക് 30 വർഷത്തോളമായി മുടങ്ങാതെ ലാഭവിഹിതം നൽകുന്ന 4 കമ്പനികൾ
