കുട്ടിക്കാലത്ത് മകന് വേണ്ടി ഒരു സൈക്കിള്‍ വാങ്ങി നല്‍കാന്‍ പോലും ജൂപ്പള്ളി രാമേശ്വര് റാവുവിന്റെ പിതാവിന് സാധിച്ചിരുന്നില്ല. അതിനാല്‍ അദ്ദേഹം സ്‌കൂളില്‍ പോകാന്‍ കിലോമീറ്ററുകളോളം നടന്നിരുന്നു. അതിനാല്‍ തന്നെ ഭാവിയില്‍ മികച്ച വിജയം കൈവരിക്കണമെന്ന മോഹം ചെറുപ്പത്തിലെ അദ്ദേഹത്തിന്റെ മനസിലുണ്ടായിരുന്നു.
പില്‍ക്കാലത്ത് 50,000 രൂപ നിക്ഷേപവുമായി അദ്ദേഹം നടത്തിയ ഒരു നീക്കമാണ് ജീവിതം തന്നെ മാറ്റിമറിച്ചത്. ഇന്ന് ഹൈദരാബാദിലെ ഒരു പ്രമുഖ റെസിഡന്‍ഷ്യല്‍, കൊമേഴ്സ്യല്‍ പ്രോപ്പര്‍ട്ടി ഡെവലപ്മെന്റ് സ്ഥാപനമായ മൈ ഹോം കണ്‍സ്ട്രക്ഷന്‍സിന്റെ ഉടമയാണ് ജൂപ്പള്ളി. സിമെന്റ്, വിദ്യാഭ്യാസം തുടങ്ങി അദ്ദേഹത്തിന്റെ പോര്‍ട്ട്‌ഫോളിയോ ഇന്നു വൈവിധ്യമാണ്. ഫോര്‍ബ്‌സ് റിപ്പോര്‍ട്ട് പ്രകാരം അദ്ദേഹത്തിന്റെ നിലവിലെ ആസ്തി 18,330 കോടി രൂപയാണ്.
സ്‌കൂള്‍ വിദ്യാഭ്യാസം പൂര്‍ത്തിയാക്കാന്‍ പാടുപെട്ട രാമേശ്വര റാവു തുടര്‍പഠനത്തിനായാണ് ഹൈദരാബാദിലെത്തിയത്. ഹൈദരാബാദില്‍ ഹോമിയോപ്പതിയില്‍ വിദ്യാഭ്യാസം തുടര്‍ന്നു. പഠനം പൂര്‍ത്തിയാക്കിയ ശേഷം ദില്‍സുഖ് നഗറില്‍ അദ്ദേഹമൊരു ഹോമിയോ ക്ലിനിക്ക് തുടങ്ങി. ഹൈദരാബാദില്‍ റിയല്‍ എസ്റ്റേറ്റ് ബിസിനസ് തഴച്ചുവളരുന്ന സമയമായിരുന്നു ഇത്.
വീടുകള്‍ക്ക് നേരിട്ട ഉയര്‍ന്ന ഡിമാന്‍ഡ് ഭൂമിയുടെ വില വാനോളം ഉയര്‍ത്തി. മേഖലയില്‍ പ്രവര്‍ത്തിച്ചിരുന്ന ഒരു സുഹൃത്തിന്റെ ഉപദേശ പ്രകാരം അദ്ദേഹം ഒരു സ്ഥലത്തിനായി 50,000 രൂപ നിക്ഷേപിച്ചു. മൂന്ന് വര്‍ഷത്തിന് ശേഷം 1,50,000 രൂപയ്ക്ക് ആ സ്ഥലം അദ്ദേഹം വിറ്റു. ഈ നേട്ടം അദ്ദേഹത്തെ ഹോമിയോപ്പതി പ്രാക്ടീസില്‍ നിന്ന് അകറ്റി. തുടര്‍ന്ന് മുഴുവന്‍ സമയവും റിയല്‍ എസ്റ്റേറ്റില്‍ ശ്രദ്ധ ആകര്‍ഷിച്ചു.
1981 ലാണ് അദ്ദേഹം മൈ ഹോം ഗ്രൂപ്പ് സ്ഥാപിച്ചത്. ഇന്ന് ഹൈദരാബാദിലെ ഏറ്റവും വലിയ റിയല്‍ എസ്റ്റേറ്റ് കമ്പനികളിലൊന്നാണ് ഇത്. സയന്‍സില്‍ ബിരുദവും, ഹോമിയോപ്പതിക് മെഡിസിന്‍ ആന്‍ഡ് സര്‍ജറിയില്‍ ഡോക്ടറേറ്റും (ഡിഎച്ച്എംഎസ്) നേടിയ റാവു ആണ് ഇന്ന് റിയല്‍ എസ്റ്റേറ്റ് കിംഗ് ആയി വിലസുന്നത്.
തുടക്കത്തില്‍ വാണിജ്യ, റെസിഡന്‍ഷ്യല്‍ പ്രോപ്പര്‍ട്ടികള്‍ വികസിപ്പിക്കുന്നതിലായിരുന്നു അദ്ദേഹത്തിന്റെ ശ്രദ്ധ. ഇന്നു വൈവിധ്യവല്‍ക്കരിച്ച പോര്‍ട്ട്‌ഫോളിയോയില്‍ അവസരങ്ങള്‍ തേടുന്നു. രണ്ട് പതിറ്റാണ്ടായി സിമെന്റ് കമ്പനിയായ മഹാ സിമെന്റ്‌സിന്റെ ചുക്കാന്‍ അദ്ദേഹത്തിന്റെ കൈവശമാണ്. കൂടാതെ മൈ ഹോം കണ്‍സ്ട്രക്ഷന്‍സിന്റെ ചെയര്‍മാനുമാണ്. ഏറ്റവും പുതിയ റിപ്പോര്‍ട്ടുകള്‍ പ്രകാരം ഈ കമ്പനിയുടെ വിറ്റുവരവ് 4,000 കോടി രൂപയാണ്.
What is TDS: ആർക്കെല്ലാം TDS ഫയൽ ചെയ്യാം
