ഹൈലൈറ്റ്:
- ആദായി നികുതി ലാഭിക്കാനുള്ള 6 മാർഗങ്ങൾ
- അധിക നിക്ഷേപമില്ലാതെയും നികുതി ബാധ്യത കുറയ്ക്കാം
- ചെലവുകളിൽ നിന്നും കിഴിവ് ക്ലെയിം ചെയ്യാം
1. കുട്ടികളുടെ വിദ്യാഭ്യാസ ചെലവ്
ഇന്ത്യയിലെ ആദായ നികുതി നിയമത്തിൽ, കുട്ടികളുടെ പഠനത്തിനായി ചെലവഴിക്കുന്ന പണത്തിന് നികുതി ഇളവും ആനുകൂല്യങ്ങളും അനുവദിക്കുന്നുണ്ട്. രാജ്യത്ത് പ്രവർത്തിക്കുന്ന സർവകലാശാല, കോളേജ്, സ്കൂൾ, മറ്റ് വിദ്യാഭ്യാസ സ്ഥാപനങ്ങൾ എന്നിവിടങ്ങളിൽ പഠിക്കുന്ന മക്കൾക്കുവേണ്ടി ചെലവഴിക്കുന്ന ഒന്നരലക്ഷം വരെയുള്ള തു‌കയ്ക്ക് നികുതി ഇളവ് ലഭിക്കും. ഒരു വ്യക്തിയുടെ രണ്ട് കുട്ടികളുടെ വരെ വിദ്യാഭ്യാസ ചെലവുകൾക്കാണ് 80-സി വകുപ്പ് പ്രകാരം ഈ നികുതി ആനുകൂല്യം ലഭിക്കുക. ചെറിയ കുട്ടികളുടെ പ്ലേ-സ്കൂൾ, പ്രീ-നഴ്സറി, നഴ്സറി ക്ലാസുകൾക്കു വേണ്ടിയുള്ള ട്യൂഷൻ ഫീസിനും നികുതി ഇളവ് അർഹതയുള്ളതാണ്. എന്നാൽ, വിദ്യാഭ്യാസ സ്ഥാപനത്തിന്റെ വികസന ഫീസ്, സംഭാവന പോലെയുള്ള ചെലവുകൾ നികുതി കിഴിവിന്റെ പരിയിൽ വരുന്നതല്ല.
2. ചാരിറ്റി ഡൊണേഷൻ
സമൂഹത്തിന്റെ പിന്തുണയും സഹായവും ആവശ്യമുള്ളവർക്ക് കൈത്താങ്ങാകുന്ന സന്നദ്ധ സംഘടനകൾക്കും ധർമ്മസ്ഥാപനങ്ങൾക്കും സംഭാവന അല്ലെങ്കിൽ ധനസഹായം നൽകുന്നതിലൂടെ സാമൂഹിക ഉത്തരവാദിത്വം നിറവേറ്റുന്നവർ നിരവധിയാണ്. ആദായ നികുതി നിയമത്തിലെ 80-ജി വകുപ്പ് പ്രകാരം, അംഗീകൃത ധർമ്മ സ്ഥാപനങ്ങൾക്ക് നൽകുന്ന സംഭാവനകൾക്ക് നികുതി കിഴിവിനുള്ള അർഹതയുണ്ട്. നിശ്ചിത വ്യവസ്ഥകൾക്ക് വിധേയമായി സംഭാവന നൽകിയ തുകയുടെ 50 മുതൽ 100 ശതമാനം വരെ ആദായ നികുതിയിൽ കിഴിവ് നേടാനാകും. ഈ കിഴിവ് ക്ലെയിം ചെയ്യുന്നതിനായി, സംഭാവന സ്വീകരിച്ചവരുടെ പേര്, പാൻ നമ്പർ, മേൽവിലാസം, സംഭാവന നൽകിയ തുക സംബന്ധിച്ച വിശദാംശങ്ങൾ കൂടി റിട്ടേൺ ഫയൽ ചെയ്യുമ്പോൾ നൽകണം.
3. മെഡിക്കൽ ഇൻഷുറൻസ് പ്രീമീയം
ഇന്നത്തെ കാലത്ത് ചികിത്സാ ചെലവുകൾ നേരിടുന്നതിനായി ഹെൽത്ത് ഇൻഷുറൻസിനെ ആശ്രയിക്കുന്നവരാണ് വരുമാനക്കാരിൽ ഭൂരിപക്ഷം പേരും. ആദായ നികുതി നിയമത്തിന്റെ 80-ഡി വകുപ്പ് പ്രകാരം, ഹെൽത്ത് ഇൻഷുറൻസ് പോളിസികളുടെ പ്രീമിയം ഇനത്തിൽ ചെലവിടുന്ന പണത്തിന് നികുതി ഇളവ് ലഭിക്കുന്നതാണ്. അവരവർക്കു വേണ്ടിയും പങ്കാളി, കുട്ടികൾ, രക്ഷിതാക്കൾ എന്നിവർക്കു വേണ്ടി എടുക്കുന്നതുമായ മെഡിക്കൽ ഇൻഷുറൻസ് പോളിസികളുടെ ചെലവിന് നികുതി കിഴിവ് ലഭിക്കും. പോളിസിയുടെ തരം, പോളിസി എടുക്കുന്നവരുടെ പ്രായം എന്നിവ പരിഗണിച്ചാകും നികുതി കിഴിവിന്റെ പരിധി നിശ്ചയിക്കപ്പെടുന്നത്. 60 വയസ്സിൽ താഴെയുള്ള വ്യക്തിക്ക് ഒരു വർഷം പരമാവധി 25,000 രൂപ വരെയും മുതിർന്ന പൗരന്മാർക്ക് 50,000 രൂപ വരെയും മെഡിക്കൽ ഇൻഷുറൻസ് പ്രീമിയം നൽകിയതിൽ നികുതി ഇളവ് നോടാനാകും.
4. ഭവന വായ്പ തിരിച്ചടവ്
വീട് നിർമാണത്തിനായി ബാങ്കുകൾ അല്ലെങ്കിൽ ധനകാര്യ സ്ഥാപനങ്ങളിൽ നിന്നും എടുക്കുന്ന ഭവന വായ്പകളുടെ തിരിച്ചടവിന് ആദായ നികുതി ഇളവിന് അർഹതയുണ്ട്. ആദായ നികുതി നിയമത്തിന്റെ 24(ബി) വകുപ്പ് പ്രകാരം, ഒരു സാമ്പത്തിക വർഷത്തിൽ ഭവന വായ്പയുടെ തിരിച്ചടവിലേക്ക് പലിശ ഇനത്തിൽ ചെലവിടുന്ന രണ്ട് ലക്ഷം രൂപയ്ക്ക് വരെ നികുതി ഇളവിന് അർഹതയുണ്ട്. നിയമത്തിന്റെ 80-സി വകുപ്പ് പ്രകാരം, വായ്പയുടെ മുതൽതുകയിലേക്കുള്ള തിരിച്ചടവിനും ആദായ നികുതി ഇളവ് ലഭിക്കും. പഴയ നികുതി സമ്പ്രദായത്തിന് കീഴിലാണ് ഈ അർഹത ലഭ്യമാകുകയുള്ളു.
5. വിദ്യാഭ്യാസ വായ്പ
ഉന്നത വിദ്യാഭ്യാസം നേടുന്നതിനായി സ്വന്തം നിലയിൽ എടുക്കുന്നതോ അല്ലെങ്കിൽ ബന്ധുക്കൾക്കു വേണ്ടി എടുക്കുന്നതോ ആയ വിദ്യാഭ്യാസ വായ്പകളുടെ പലിശ ഇനത്തിലെ തിരിച്ചടവിന് ആദായ നികുതി നിയമത്തിലെ 80-ഇ വകുപ്പ് പ്രകാരം നികുതി കിഴിവിന് അർഹതയുണ്ട്. ചില നിബന്ധനകൾക്ക് വിധേയമായാണ് ഈ നികുതി ആനുകൂല്യം ലഭ്യമാകുക. അതേസമയം വായ്പ തിരിച്ചടക്കാൻ തുടങ്ങുന്നതു മുതലുള്ള എട്ട് വർഷം വരെ അല്ലെങ്കിൽ വായ്പയുടെ പലിശ പൂർണമായും തിരിച്ചടയ്ക്കുന്നത് വരെയോ മേൽത്തട്ട് പരിധില്ലാതെ പലിശയിലെ തിരിച്ചടവിനുള്ള നികുതി കിഴിവ് ക്ലെയിം ചെയ്യാവുന്നതാണ്.
6. വീട്ടുവാടക
വാടക വീട്ടിൽ താമസിക്കുന്നവർക്ക് ആദായ നികുതിയിൽ കിഴിവ് നേടാൻ അർഹതയുണ്ട്. ആദായനി കുതി നിയമത്തിലെ പത്താം വകുപ്പ് പ്രകാരം, വാടക വീട്ടിൽ താമസിക്കുന്നവർക്ക്, വാടക ഇനത്തിൽ വീട്ടുടമയ്ക്ക് കൈമാറുന്ന പണത്തിന് നികുതി കിഴിവ് ക്ലെയിം ചെയ്യാൻ അനുവദിക്കുന്നു. അതേസമയം വ്യക്തി കൈപ്പറ്റുന്ന ശമ്പളത്തിനും വാടക വീട് സ്ഥിതി ചെയ്യുന്ന നഗരത്തിനേയും അടിസ്ഥാനമാക്കിയാണ് ഇതിന്റെ പരമാവധി നികുതി കിഴിവിനുള്ള പരിധി നിശ്ചയിക്കപ്പെടുന്നത്.
പ്രത്യേകമായോ അധികമായോ നിക്ഷേപങ്ങളൊന്നും തന്നെ നടത്താതെയും എന്നാൽ ജീവിതത്തിൽ നേരിടുന്ന ചെലവുകളെ പ്രയോജനപ്പെടുത്തി ആദായ നികുതി ബാധ്യത കുറയ്ക്കുന്നതിനായി ഉപയോഗപ്പെടുത്താൻ കഴിയുന്ന ചില നിയമ വ്യവസ്ഥകളെ കുറിച്ചുള്ള ഏതാനും ഉദ്ദാഹരണങ്ങൾ മാത്രമാണ് മേൽസൂചിപ്പിച്ചത്. നിങ്ങളുടെ സവിശേഷ സാഹചര്യത്തിന് അനുയോജ്യമായ ആദായ നികുതി വ്യവസ്ഥകൾ മനസ്സിലാക്കുന്നതിന് അംഗീകൃത സാമ്പത്തിക ഉപദേഷ്ടാവിനെയോ നികുതി വിദഗ്ധനെയോ സമീപിക്കുന്നതാകും ഉചിതം.
Tax Payers: പൂർണമായും ഒഴിവാക്കേണ്ട 5 നികുതി ലാഭിക്കൽ തെറ്റുകൾ
