നിങ്ങള്‍ ഒരു ശമ്പള വരുമാനക്കാരന്‍ ആണെങ്കില്‍, നികുതി ബാധ്യത ഇല്ലെങ്കില്‍ പോലും റിട്ടേണ്‍ ഫയല്‍ ചെയ്യുന്നത് ഒരു മികച്ച നടപടിയാണ്. വെറുയേ റിട്ടേണ്‍ ഫയല്‍ ചെയ്യേണ്ട കാര്യമുണ്ടോ? അങ്ങനെ ചെയ്യുന്നത് നാളെ തനിക്ക് ഒരു ബാധ്യതയാകുമോ? നികുതി ബാധ്യതയില്ലാത്ത താന്‍ എന്തിന് വെറുതേ സമയം കളയണം എന്നൊക്കെ ചിന്തിക്കുന്നവരാകാം നിങ്ങള്‍. എന്നാല്‍ ഇത്തരം ചിന്തകള്‍ ശരിയല്ലെന്ന് നിങ്ങള്‍ മനസിലാക്കേണ്ടതുണ്ട്.
നികുതി റിട്ടേണ്‍ ഫയല്‍ ചെയ്യുന്നത് എല്ലായ്‌പ്പോഴും ഒരു നല്ല കാര്യം തന്നെയാണ്. നിങ്ങള്‍ പ്രതീക്ഷിക്കാത്ത സമയത്ത് ഇതു നിങ്ങള്‍ക്കു നേട്ടമായേക്കാം. ഇന്നു ഡിജിറ്റല്‍ കാലത്ത് നികുതി റിട്ടേണ്‍ ഫയല്‍ ചെയ്യുകയെന്ന്ത് വളരെ എളുപ്പമാണ്. ആരുടേയും സഹായം കൂടാതെ നിങ്ങള്‍ക്കു തന്നെ ഈ നടപടി പൂര്‍ത്തീകരിക്കാവുന്നതാണ്.
ശമ്പളമുള്ള വ്യക്തികള്‍ക്ക് അവരുടെ ഐടിആര്‍ ഓണ്‍ലൈനില്‍ എങ്ങനെ ഫയല്‍ ചെയ്യാം എന്നതിനെക്കുറിച്ചുള്ള ഒരു ഘട്ടം ഘട്ടമായുള്ള നടപടികള്‍ നോക്കാം. റിട്ടേണ്‍ ഫയല്‍ ചെയ്യാന്‍ ആവശ്യമായ രേഖകള്‍ ഉറപ്പുവരുത്തുകയെന്നതാണ് ആദ്യ നടപടി.
ആവശ്യമായ രേഖകള്‍
- നിങ്ങളുടെ തൊഴിലുടമയില്‍ നിന്നുള്ള ഫോം 16
- പാന്‍ കാര്‍ഡ്
- ബാങ്ക് അക്കൗണ്ട് വിശദാംശങ്ങള്‍
- കിഴിവുകള്‍ക്കുള്ള നിക്ഷേപ തെളിവുകള്‍.
അടുത്തഘട്ടം എന്നത് രജിസ്റ്റര്‍/ ലോഗിന്‍ ചെയ്യുക എന്നതാണ്. ഇതിന് മുമ്പ് റിട്ടേണ്‍ ഫയല്‍ ചെയ്തിട്ടുള്ളവര്‍ക്ക് മുമ്പത്തെ ലോഗിന്‍ ഐഡിയും, പാസ്‌വേഡും ഉപയോഗിച്ച് ലോഗിന്‍ ചെയ്യാവുന്നതാണ്. ആദ്യമായി ചെയ്യുന്നവര്‍ രജിസ്റ്റര്‍ ചെയ്യണം. ഇതിനായി https://www.incometax.gov.in/iec/foportal/ സന്ദര്‍ശിക്കുക.
ഘട്ടം 3 എന്നത് ഫോം 26AS ഡൗണ്‍ലോഡ് ചെയ്യുകയാണ്. ഇതൊരു ഏകീകൃത നികുതി പ്രസ്താവനയാണ്. ഇതില്‍ TDS, TCS, അടച്ച മറ്റ് നികുതികള്‍ എന്നിവ വിശദമായി പ്രതിപാദിച്ചിരിക്കും.
നാലാംഘട്ടത്തില്‍ നിങ്ങള്‍ കൃത്യമായ ഫോം തെരഞ്ഞെടുക്കേണ്ടതുണ്ട്. ഇതു വളരെ പ്രധാനമാണ്. ശമ്പളം, വീട്, മറ്റ് വരുമാന സ്രോതസുകള്‍ എന്നിവയില്‍ നിന്ന് 50 ലക്ഷം വരെ വരുമാനമുള്ള ശമ്പളമുള്ള വരുമാനക്കാര്‍ തെരഞ്ഞെടുക്കേണ്ടത് ITR-1 ആണ്.
ഘട്ടം അഞ്ച് എന്നത് ഫോം കൃത്യമായി പൂരിപ്പിക്കുക എന്നതാണ്. ഫോം 16 പ്രകാരമുള്ള വ്യക്തിഗത വിശദാംശങ്ങള്‍, വരുമാനം, കിഴിവുകള്‍, നികുതി വിശദാംശങ്ങള്‍ എന്നിവ പൂരിപ്പിക്കുക. ചില വിവരങ്ങള്‍ ഓട്ടോമാറ്റിക്കായി തന്നെ അവിടെ കാണാനാകും. ഇതിനു കാരണം നിങ്ങളുടെ തൊഴില്‍ദാതാവില്‍ നിന്നുള്ള വിവരങ്ങള്‍ ആണ്. ഇതില്‍ തിരുത്തലും സാധ്യമാണ്. എന്നാല്‍ ഇത്തരം തിരുത്തലുകള്‍ സാധൂകരിക്കുന്ന രേഖകള്‍ കൈയ്യില്‍ ആവശ്യമാണ്.
അടുത്തതായി നല്‍കിയ വിവരങ്ങള്‍ പരിശോധിച്ച് ഉറപ്പുവരുത്തുന്ന ഘട്ടമാണ്. ഇത് സ്‌റ്റേജ് ആറെന്നു പറയാം. ഫോം സാധൂകരിക്കുക, നിങ്ങളുടെ ഇന്‍പുട്ടുകളെ അടിസ്ഥാനമാക്കി പോര്‍ട്ടല്‍ നികുതി ബാധ്യത/ റീഫണ്ട് കണക്കാക്കും.
ഏഴ് എന്നത് അവസാന ഘട്ടമാണ്. ഇവിടെ നിങ്ങള്‍ സമര്‍പ്പിച്ച റിട്ടേണ്‍ ഇ- വേരിഫൈ ചെയ്യേണ്ടതുണ്ട്. ഇതും വളരെ പ്രധാനമാണ്. ഇ- വേരിഫൈ ചെയ്ത റിട്ടേണുകള്‍ മാത്രമേ ആദായ നികുതി വകുപ്പ് പരിശോധിക്കൂ. ആധാര്‍ ഒടിപി, നെറ്റ് ബാങ്കിംഗ്, ഡിഎസ്‌സി അല്ലെങ്കില്‍ ഇവിസി ഉപയോഗിച്ച് ഇ- വെരിഫൈ ചെയ്യാവുന്നതാണ്.
(മുകളില്‍ പറഞ്ഞ കാര്യങ്ങള്‍ നിലവില്‍ ലഭ്യമായ വിവരങ്ങള്‍ അടിസ്ഥാനമാക്കിയാണ്. കൂടുതല്‍ വിവരങ്ങള്‍ക്ക് നികുതി വിദഗ്ധന്റെ സഹായം തേടാവുന്നതാണ്.)
What is TDS: ആർക്കെല്ലാം TDS ഫയൽ ചെയ്യാം
