സ്ഥിരമായ വരുമാനം നല്‍കുന്ന ഒരു റിട്ടയര്‍മെന്റ് പ്ലാനില്‍ നിക്ഷേപിക്കുന്നതാണ് അഭികാമ്യം. ദേശീയ പെന്‍ഷന്‍ പദ്ധതി (എന്‍പിഎസ്) ഇത്തരത്തില്‍ ഒന്നാണ്. റിട്ടയര്‍മെന്റിനായി രാജ്യത്തെ ഏറ്റവും ഫലപ്രദമായ ഉപകരണങ്ങളിലൊന്നാണ് നാഷണല്‍ പെന്‍ഷന്‍ സ്‌കീം എന്നു പറയുന്നതിലും തെറ്റില്ല. റിട്ടയര്‍മെന്റ് പ്രായത്തില്‍ ഒരു ലംപ്സം തുകയും, തുടര്‍ന്നങ്ങോട്ടുള്ള ജീവിതത്തില്‍ സ്ഥിര പ്രതിമാസ വരുമാനവും നല്‍കാന്‍ ഈ പദ്ധതിക്കു കഴിയും.
കോമ്പൗണ്ടിംഗ് റിട്ടേണുകള്‍ നല്‍കുന്ന പദ്ധതി ആയതിനാല്‍ തന്നെ ദീര്‍ഘ നിക്ഷേപ കാലയളവില്‍ നിങ്ങളുടെ വരുമാനം വേഗത്തില്‍ വര്‍ദ്ധിപ്പിക്കും. ഉദാഹരണത്തിന്, ഒരാള്‍ തന്റെ 20-കളുടെ തുടക്കത്തില്‍ ഈ പദ്ധതിയില്‍ നിക്ഷേപിക്കാന്‍ തുടങ്ങിയെന്നു കരുതുക. ഇവിടെ നിക്ഷേപ കാലാവധി വളരെ വലുതാണ്. അതിനാല്‍, ചെറിയ നിക്ഷേപങ്ങള്‍ പോലും വിരമിക്കല്‍ സമയത്ത് ഒരു വലിയ കോര്‍പ്പസ് സമ്മാനിക്കും.
നിങ്ങള്‍ 21-ാം വയസില്‍ എന്‍പിഎസില്‍ പ്രതിമാസം 3,475 രൂപ നിക്ഷേപിക്കാന്‍ തുടങ്ങുന്നുവെന്നു കരുതുക. 39 വര്‍ഷം ഈ നിക്ഷേപം തുടരുന്നതു വഴി, 60-ാം വയസില്‍ വിരമിക്കല്‍ പ്രായത്തില്‍ പ്രതിമാസം 40,000 രൂപയോളം പെന്‍ഷന്‍ നേടാന്‍ നിങ്ങള്‍ക്കു സാധിക്കുമെന്നു കണക്കുകള്‍ വ്യക്തമാക്കുന്നു.
എന്‍പിഎസ്: കണക്കിലെ കളി
- നിലവിലെ പ്രായം: 21 വയസ്
- വിരമിക്കല്‍ പ്രായം: 60 വയസ്
- പ്രതിമാസ സംഭാവന: 3,475/ മാസം
- പ്രതീക്ഷിക്കുന്ന വരുമാനം: 10%
മുകളില്‍ പറഞ്ഞ രീതിയില്‍ നിക്ഷേപിക്കുന്നതു വഴി വിരമിക്കല്‍ സമയത്ത് വ്യക്തിക്ക് 2,00,19,029 രൂപയുടെ മൊത്തം കോര്‍പ്പസ് ലഭിക്കും. ഈ കോര്‍പ്പസില്‍ നിന്ന് 60 ശതമാനം ലംപ്സം പുറത്തെടുക്കുന്നു (60 ശതമാനം എന്നത് നിങ്ങള്‍ക്ക് റിട്ടയര്‍മെന്റ് പ്രായത്തില്‍ പിന്‍വലിക്കാവുന്ന പരമാവധി പരിധിയാണ്). അങ്ങനെയെങ്കില്‍ തുടര്‍ന്നുള്ള നിക്ഷേപം 40 ശതമാനമാണ് (അന്വിറ്റി നിക്ഷേപം).
ഈ 40 ശതമാനം തുക സര്‍ക്കാര്‍ സ്ഥിരവരുമാനം സൃഷ്ടിക്കുന്ന ഡെബ്റ്റ് ഫണ്ടുകളിലോ, കോര്‍പ്പറേറ്റ് ബോണ്ടുകളിലോ വാര്‍ഷിക നിക്ഷേപം നടത്തുന്നു. ഈ നിക്ഷേപത്തിന് നിങ്ങള്‍ക്ക് ആറ് ശതമാനം വാര്‍ഷിക റിട്ടേണ്‍ ലഭിക്കുകയാണെങ്കില്‍, ആന്വിറ്റിയില്‍ നിക്ഷേപിച്ച തുക 80,07,612 രൂപയായിരിക്കും. പ്രതീക്ഷിക്കുന്ന പ്രതിമാസ പെന്‍ഷന്‍: 40,038 രൂപ.
എന്‍പിഎസില്‍ പ്രായം കഴിഞ്ഞുപോയെന്ന ഒരു ചിന്ത ആവശ്യമില്ല. പ്രായത്തിന് അനുസരിച്ച് പ്രതിമാസ തവണകള്‍ വര്‍ധിപ്പിച്ചും നിക്ഷേപകര്‍ക്ക് നേട്ടമുണ്ടാക്കാം. നിക്ഷേപങ്ങള്‍ക്കു മുമ്പ് ഒരു വിദഗ്ധന്റെ നിര്‍ദേശങ്ങള്‍ സ്വീകരിക്കുന്നത് നല്ലതാണ്.
What is TDS: ആർക്കെല്ലാം TDS ഫയൽ ചെയ്യാം
