நின்ஜா 650 பைக்குகள் அறிவிக்கப்பட்ட சலுகை:
இந்தியாவில் தாங்கள் விற்பனை செய்து வரும் பைக்குகளுக்கு அவ்வப்போது சலுகைகளை அறிவிப்பது கவாஸாகியின் வழக்கம். கடந்த மார்ச் மாதம் நின்ஜா 400, வெர்சிஸ் 650 மற்றும் வல்கன் S ஆகிய மாடல்களுக்கு ரூ.40,000 முதல் ரூ.60,000 வரையிலான சலுகைகளை அறிவித்திருந்தது அந்நிறுவனம். அதேபோல் இந்த ஜூலை மாதம் நின்ஜா 650 பைக் மாடலுக்கு ரூ.30,000 தள்ளுபடியை அறிவித்திருக்கிறது.
இதற்காக அனைத்து வாடிக்கையாளர்களுக்கு நின்ஜா 650 பைக்கை வாங்கும்போது பயன்படுத்திக் கொள்ளும் வகையிலான குட் டைம் வவுச்சர் ஒன்றை வழங்குகிறது இதனைப் பயன்படுத்தி எக்ஸ்-ஷோரூம் விலையில் ரூ.30,000-த்தைக் குறைத்து பைக்கை வாங்கிக் கொள்ளலாம்.
நின்ஜா 650-யின் விலை:
இந்தியாவில் இந்த நின்ஜா 650 பைக்கை ரூ.7.16 லட்சம் என்ற எக்ஸ்-ஷோரூம் விலையில் விற்பனை செய்து வருகிறது கவாஸாகி. தற்போது இந்த தள்ளுபடி விலையுடன் ரூ.6.86 லட்சம் என்ற எக்ஸ்-ஷோரூம் விலையில் இந்த பைக்கை வாடிக்கையாளர்கள் வாங்க முடியும்.
நின்ஜா 650 இன்ஜின்:
இந்த நின்ஜா 650 பைக்கில், 649சிசி பேரலல் ட்வின், லிக்விட்-கூல்டு இன்ஜினைப் பயன்படுத்தியிருக்கிறது கவாஸாகி. இந்த இன்ஜினானது 67hp பவர் மற்றும் 64Nm டார்க்கை உற்பத்தி செய்யும் திறனைக் கொண்டிருக்கிறது.
இதே இன்ஜினையே மற்ற 650சிசி பைக்குகளிலும் பயன்படுத்தியிருக்கிறது கவாஸாகி. Z650, வெர்சிஸ் 650, Z650 RS மற்றும் வல்கன் S க்ரூஸர் ஆகிய பைக்குகளிலும் இந்த இன்ஜினே பயன்படுத்தப்பட்டிருக்கிறது.
நின்ஜா 650 வசதிகள் மற்றும் போட்டியாளர்கள்:
இந்த நின்ஜா 650 பைக்கில் LED முகப்பு விளக்குகள் மற்றும் TFT இன்ஸ்ட்ரூமென்ட் ஸ்கிரீனுடன் பல்வேறு வசதிகள் கொடுக்கப்பட்டிருக்கின்றன. முக்கியமாக ஸ்மார்ட்போன் கனெக்டிவிட்டி மற்றும் கவாஸாகி ட்ராக்ஷன் கண்ட்ரோல் ஆகிய வசதிகளும் கொடுக்கப்பட்டிருக்கின்றன.
சந்தையில் இந்த பைக்குக்குப் போட்டியாக தற்போது விற்பனையில் இருப்பது ஏப்ரிலியா RS660 மட்டும் தான். இதனைத் தவிர்த்து ட்ரையம்பின் புதிய டேடோனா 660 பைக்கும் இந்த நின்ஜா 650 மாடலுக்குப் போட்டியாக வெளியாகவிருக்கிறது.
