హిండెన్ బర్గ్ - అదానీ గ్రూప్ వివాదంలోకి కొత్తగా కోటక్ పేరు తెరపైకి రావడంతో ఇన్వెస్టర్లు ఆందోళనకు గురయ్యారు. ఫలితంగా కోటక్ మహీంద్రా షేర్లు ఈరోజు అమ్మకాల ఒత్తిడిని ఎదుర్కొన్నాయి. మార్కెట్ ముగిసే సమయానికి 2.5 శాతం నష్టంతో రూ. 1,763 వద్ద స్థిరపడ్డాయి.
కోటక్ మహింద్రా ఇంటర్నేషనల్ లిమిటెడ్ కే-ఇండియా అపార్చునిటీస్ ఫండ్ లిమిటెడ్ (KIOF) పేరుతో విదేశీ ఇన్వెస్టర్ల కోసం ఫండ్ ను ఏర్పాటు చేసింది. ఇది సెబీ వద్ద నమోదైంది. 2013లో ప్రారంభమైంది. ఫైనాన్షియల్ సర్వీసెస్ కమిషన్ ఆఫ్ మారిషస్ దీన్ని నియంత్రిస్తుంది. ఫారెన్ క్లయింట్లు భారత్ లో ఇన్వెస్ట్ చేసేందుకు ఈ ఫండ్ ప్లాట్ పారంగా ఇది ఉపయోగపడుతుంది.
ఈ ఫండ్ తో ఒక పార్ట్ నర్ ఇన్వెస్టర్ ద్వారా తమ నివేదిక తర్వాత అదానీ గ్రూప్ స్టాక్స్ ను కోటక్ బ్యాంక్ షార్ట్ సెల్ చేసినట్లు హిండెన్ బర్గ్ తెలిపింది. అయితే దీని ద్వారా పెద్దగా లాభాలు పొందలేకపోయినట్లు కూడా చెప్పింది.
కాగా ఇదే ఇన్వెస్టర్ తో ఉన్న సంబంధాలతోనే తాము కూడా అదానీ స్టాక్స్ ను షార్ట్ సెల్ చేసినట్లు హిండెన్ బర్గ్ పేర్కొంది. అన్ని ఖర్చులు పోనూ తమకు కూడా లాభాలు ఏమీ రాలేదని చెప్పింది. అదానీ స్టాక్స్ ను షార్ట్ సెల్ చేసినట్లు తాము గతేడాది నివేదికను విడుదల చేసినప్పుడే వెల్లండిచామని, ఇందులో రహస్యమేమీ లేదని చెప్పింది. అయితే అదానీ గ్రూప్ స్టాక్స్ లో నింబధనలకు విరుద్ధంగా తాము పెట్టుబడి పెట్టినట్లు సెబీ తాజాగా నోటీసులు పంపినట్లు చెప్పింది. తాము నిబంధనలకు అనుగుణంగానే వ్యవహరించినట్లు తెలిపింది.
మరోవైపు కోటక్ మహీంద్రా ఇంటర్నేషనల్ హిండెన్ బర్గ్ ఆరోపణలపై స్పందించింది. తమకు హిండెన్ బర్గ్ ఏనాడూ క్లయింట్ గా లేదని వెల్లడించింది. బ్యాంక్ ఫారెన్ ఫోలియో ఇన్వెస్టర్ కింగ్ డమ్ క్యాపిటల్ మేనేజ్మెంట్ కు హిండెన్ బర్గ్ క్లయింట్ కాదని పేర్కొంది.
కింగ్ డన్ క్యాపిటల్ మేనెజ్మెంట్ హిండెన్ బర్గ్ నివేదిక తర్వాత కే-ఇండియా అపార్చునిటీస్ ఫండ్ ద్వారా అదానీ గ్రూప్ స్టాక్స్ ను షార్ట్ సెల్ చేసినట్లు తెలుస్తోంది. అయితే దీనికి హిండెన్ బర్గ్ తో సంబంధాలున్నట్లు తమకు సమాచారం లేదని కోటక్ ఇంటర్నేషనల్ ఎగ్జిక్యూటివ్ ఒకరు చెప్పారు. సెబీ నోటీసు తర్వాతే తమకు దీని గురించి తెలిసినట్లు పేర్కొన్నారు.