సెన్సెక్స్ ఈరోజు 78,758 పాయింట్ల వద్ద ప్రారంభమైంది. ఒకానొక దశలో 79,240 పాయింట్లకు చేరింది. అయితే ఆ తర్వాత కాస్త తగ్గింది. ప్రస్తుతం 311 పాయింట్లు పెరిగి 78,993 వద్ద ట్రేడ్ అవుతోంది. అటు నిఫ్టీ ఈరోజు 23,881 పాయింట్ల వద్ద ప్రారంభమైంది. ఇంట్రాడేలో 24,036 స్థాయికి చేరింది. ఆ తర్వాత కాస్త తగ్గింది. ప్రస్తుతం 74 పాయింట్లు పెరిగి 23,937 వద్ద ట్రేడ్ అవుతోంది. నిఫ్టీ 23 సెషన్లలోనే 1000 పాయింట్లు వృద్ధి చెంది 23 వేల మార్క్ నుంచి 24 వేల మార్క్ కు చేరుకుంది. ఇది నిఫ్టీ చరిత్రోలే రెండో అత్యంత వేగవంతమైన పెరుగుదల.
గత రెండు రోజులుగా రిలయన్స్ షేర్లతో పాటు ఐటీ స్టాక్స్ ను కొనుగోలు చేసేందుకు ఇన్వెస్టర్లు ఆసక్తి కనబరుస్తున్నారు. దీంతో సూచీలు సరికొత్త రికార్డులు సృష్టిస్తున్నాయి. రిలయన్స్ షేర్లు ఈరోజు సరికొత్త 52 వారాల గరిష్టం రూ. 3,075 స్థాయికి చేరుకున్నాయి. ప్రస్తుతం 1.1 శాతం పెరిగి రూ. 3,061 వద్ద ట్రేడ్ అవుతున్నాయి. మరోవైవు దిగ్గజ ఐటీ స్టాక్స్ అన్ని పాజిటివ్ గా ట్రేడ్ అవుతున్నాయి. టీసీఎస్, ఇన్ఫోసిస్, విప్రో, టెక్ మహీంద్రా, సొనాతా సాఫ్ట్ వేర్, ఎల్టీఐ మైండ్ ట్రీ, పర్సిస్టెంట్ సిస్టమ్స్, కో ఫోర్జ్, ఒరాకిల్ ఫైనాన్షియల్ సర్వీసెస్ సాఫ్ట్ వేర్, సైయింట్ లిమిటెడ్ షేర్లు 1.5 శాతం నుంచి 3 శాతం వరకు వృద్ధి నమోదు చేశాయి.
అలాగే ఇండియన్ సిమెంట్స్ లో అల్ట్రాటెక్ సిమెంట్ 23 శాతాను వాటాను కొనుగోలు చేయడం రెండు స్టాక్స్ పై సానుకూల ప్రభావం చూపింది. అల్ట్రా టెక్ షేరు ధర 4 శాతం పెరగగా, ఇండియా సిమెంట్స్ షేరు ధర 10 శాతానికిపైగా పెరిగింది. హెచ్డీఎఫ్సీ, ఐసీఐసీఐ బ్యాంకు, రిలయన్స్ స్టాక్స్ నిఫ్టీ 50 వృద్ధిలో కీలకంగా మారాయి. ముఖ్యంగా బ్యాంక్స్, ఎఫ్ఎంసీ, మెటల్స్, ఫార్మా సెక్టార్ కు చెందిన స్టాక్స్ ను కొనుగోలు చేసేందుకు మదుపర్లు ఆసక్తి కనబరుస్తున్నారు.
మరోవైపు ప్రైవేట్ బ్యాంక్ స్టాక్స్ కూడా ఈరోజు లాభాల్లో కొనసాగుతున్నాయి. యాక్సిస్ బ్యాంక్, ఐడీఎఫ్సీ ఫస్ట్ బ్యాంక్, ఫెడరల్ బ్యాంక్, కోటక్ మహీంద్రా, ఐసీఐసీఐ బ్యాంకు షేర్లు 0.5 శాతానికిపైగా వృద్ది నమోదు చేశాయి.
వాల్యూయేషన్స్ పై ఆందోళనలు ఉన్నప్పటికీ మరికొన్ని రోజులు భారత్ స్టాక్ మార్కెట్లు బుల్లిష్ గానే ఉంటాయని జియోజిత్ పైనాన్షియల్ సర్వీసెస్ డా. వీకే విజయ్ కుమార్ పేర్కొన్నారు. సెన్సెక్స్ 80 వేల స్థాయికి కూడా చేరుకునే అవకాశం ఉందన్నారు. ఫండమెంటల్ గా బలంగా ఉన్న లార్జ్ క్యాప్ స్టాక్స్ లో ర్యాలీ వల్లే మార్కెట్లు బుల్లిష్ గా ట్రెండ్ అవుతున్నాయని వివరించారు. ముఖ్యంగా బ్యాంకింగ్, టెలికాం సెక్టార్లు కీలకంగా ఉన్నాయన్నారు.