ఆయిల్ ఇండియా లిమిటెడ్ షేర్లు శుక్రవారం 2.52 శాతం వృద్ది నమోదు చేసి రూ. 702 వద్ద స్థిరపడ్డాయి. ఈ ఏడాది ఇప్పటివరకు చూసుకుంటే షేరు ధర 85 శాతం పెరిగింది. గత ఏడాది కాలంలో అయితే 180 శాతం పెరిగి ఇన్వెస్టర్లకు మల్టీబ్యాగర్ రిటర్నులు అందించింది. అయితే ఈ స్టాక్ ఇంకా పెరిగే అవకాశం ఉందని ప్రముఖ బ్రోకరేజ్ మోతీలాల్ ఓస్వాల్ సూచిస్తోంది. రూ. 775 టార్గెట్ ధరతో కొనుగోలు చేయవచ్చని సూచిస్తూ బై రేటింగ్ కూడా ఇచ్చింది. ఇది 10 శాతం అప్ సైడ్ ను సూచిస్తోంది. 2024 మార్చితో ముగిసిన త్రైమాసికంలో ఆయిల్ ఇండియా నికర లాభం రూ. 2,332.94 కోట్లుగా నమోదైంది. ఇది గతేడాది ఇదే త్రైమాసికంలో నమోదైన రూ. 1,979 కోట్లతో పోల్చితే చాలా ఎక్కువ.

బోనస్ షేర్లు, డివిడెండ్
2023-24 ఆర్థిక సంవత్సరానికి గానూ 1:2 నిష్పత్తిలో బోనస్ షేర్లతో పాటు ప్రతి షేరుకు రూ. 3.75 తుది డివిడెండ్ ను కూడా ప్రకటించింది కంపెనీ. అయితే డివిడెండ్ కు రికార్డు తేదీని ఇంకా ఖరారు చేయలేదు. కానీ బోనస్ షేర్లకు రికార్డు తేదీని జులై 2 గా ఫిక్స్ చేసింది. అంటే ఆ తేదీన మార్కెట్ ముగిసే సమయానికి ఎవరైతే ఈ కంపెనీ షేర్లు కలిగి ఉంటారో వారు మాత్రమే బోనస్ షేర్లు పొందేందుకు అర్హులు. తుది డివిడెండ్ కు త్వరలోనే రికార్డు తేదీని ఖరారు చేసే అవకాశం ఉంది.

1:2 నిష్పత్తిలో బోనస్ షేర్లు అంటే షేర్ హోల్డర్లు కలిగి ఉండే ప్రతి రెండు ఈక్విటీ షేర్లకు ఒక షేరును ఉచితంగా పొందుతారు. 100 షేర్లు కలిగి ఉంటే 50 షేర్లు ఉచితంగా లభిస్తాయి. ఎల్ఐసీ కి ఈ కంపెనీలో 8 శాతం వాటా ఉంది. 87,156,697 షేర్లకు బోనస్ షేర్లు బోనస్ షేర్లు లభించనున్నాయి.

బై రేటింగ్
బ్రోకరేజీ మోతీలాల్ ఓస్వాల్ ఆయిల్ ఇండియా స్టాక్ ఇంకా బుల్లిష్ గా ఉందని తెలిపింది. బై రేటింగ్ కూడా ఇచ్చింది. రూ. 775 టార్గెట్ ధరతో దీనిని కొనుగోలు చేయవచ్చని సూచించింది. అయితే మరో బ్రోకరేజ్ కోటక్ సెక్యూరిటీస్ మాత్రం ఆయిల్ ఇండియా స్టాక్ ను డౌన్ గ్రేడ్ చేసింది. సెల్ రేటింగ్ ఇచ్చింది. ఇన్వెస్టర్లు ఈ స్టాక్ ను విక్రయించుకోవాలని సిఫార్సు చేసింది.

గమనిక: ఈ కథనం బ్రోకరేజీలు, విశ్లేషకుల సొంత అభిప్రాయాన్ని మాత్రమే తెలియజేస్తుంది. స్టాక్స్ ను కొనుగోలు చేయాలని లేదా విక్రయించాలని ఎకనామిక్ టైమ్స్ సూచించదు. స్టాక్ మార్కెట్లో ఇన్వెస్ట్ చేసే ముందు నిపుణుల సలహా తీసుకోవడం మంచిది.