ఒక్కో కుటంబానికి మొత్తంగా రూ. 2 లక్షల వరకు రుణమాఫీ ఉంటుందని సీఎం స్పష్టం చేశారు. పంట రుణాలకు మాత్రమే రుణమాఫీ వర్తిస్తుందని చెప్పారు. గోల్డ్ లోన్ ఈ పరిధిలోకి రాదని పేర్కొన్నారు. కేవలం బ్యాంకర్ల కమిటీ, ఎస్ఎల్ బీసీ మార్గదర్శకాల ప్రకారం పంట రుణాలు తీసుకున్న రైతు కుటంబాలకు రూ. 2 లక్షల వరకు రుణమాఫీ ఉంటుందన్నారు. ఆగస్టు 15 లోగా రుణమాఫీ చేసి తీరుతామని రేవంత్ ఇది వరకే తేల్చిచెప్పారు.
అలాగే కేంద్ర బడ్జెట్ ప్రవేశపెట్టిన రెండు లేదా మూడు రోజుల తర్వాత రాష్ట్ర బడ్జెట్ ను ప్రవేశపెట్టనున్నట్లు రేవంత్ రెడ్డి పేర్కొన్నారు. కేంద్రం నుంచి రాష్ట్రానికి రావాల్సిన నిధులపై దృష్టి కేంద్రీకరించనున్నట్లు తెలిపారు.
దుర్వినియోగం
గత బీఆర్ఎస్ ప్రభత్వంలో రైతుబంధు నిధులు దుర్వినియోగం అయినట్లు వ్యవసాయ శాఖ రాష్ట్ర కేబినెనెట్ కు నోట్ అందజేసింది. 2018 లో ఈ స్కీమ్ ప్రారంభమైనప్పటి నుంచి గత వానాకాలం సీజన్ ప్రభుత్వం రూ. 73 వేల కోట్లు రైతుల ఖాతాల్లో జమ చేసింది. అయితే ఇందులో వ్యవసాయేతర భూములు కూడా ఉన్నట్లు వ్యవసాయ శాఖ గుర్తించింది. సాగుకు యోగ్యం కాని కొండలు, గుట్టులు, రియల్ ఎస్టేట్ వెంచర్లు, హైవేలు, రోడ్లకు కూడా రైతు బంధు సాయాన్ని గత ప్రభుత్వం అందజేసినట్లు వెల్లడించింది. ఇలా మొత్తం 26,500 కోట్లు అనర్హులకు చెల్లించినట్లు వివరించింది. సగటున సంవత్సరానికి రూ. 4,416 కోట్లు దుర్వినియోగం అయినట్లు స్పష్టం చేసింది.
అయితే ప్రస్తుత ప్రభుత్వం సాగు భూములకే రైతుబంధు ఇవ్వాలని నిర్ణయించింది. వ్యవసాయేతర భూములకు రైతుభరోసా సాయం అందకుండా కఠినమైన చర్యలు చేపట్టనుంది. గ్రామస్థాయిలో వ్యవసాయ భూములను గుర్తించి వాటికి మాత్రమే పంట పెట్టుబడి సాయం అందేలా మార్గదర్శకాలు రూపొందించాలని భావిస్తోంది. అలాగే సంపనున్నలు, భూస్వాములకు ఈ సాయం నిలిపి వేయాలనే యోచనలో ఉంది. 5 లేదా 10 ఎకరాల వరకు మాత్రమే పెట్టుబడి సాయాన్ని అందించే ఆలోచన కూడా చేస్తోంది. వీటిపై మరో మూడు రోజుల్లో స్పష్టత రానుంది. తెలంగాణలో 69 లక్షల మంది రైతులు ఉన్నట్లు ప్రభుత్వ గణాంకాలు వెల్లడిస్తున్నాయి. వీరిలో 80 శాతం వరకు ఐదు ఎకరాల లోపు భూమి ఉన్న రైతులే ఉన్నారు.