Ademuz
Ademuz (Ademús en catalán) ye un municipio d'a provincia de Valencia, situato en o enclau d'o Rincón d'Ademuz, comarca valenciana entre Aragón y Castiella-La Mancha, y en ye a suya capital. A suya población ye de 1.242 habitants (2007), en una superficie de 100,4 km² con una densidat de 12,37 hab/km².
Cheografía
A villa d'Ademuz se troba en a marguin dreita d'o río Guadalaviar, situata en as pronunciatas vesants d'a montanya d'os Zafranares. Ye por ixo que ista villa tien como caracteristica as largas y estreitas carreras estando muitas en cuesta, que se comunican entre ellas por chicotz callizos, y carreras mas estreitas, muitas d'ellas escalonatas, mientres as casas pareixen sobreposar-sen as unas dencima d'as atras, formando a caracteristica anvista d'iste lugar, que manda a bega d'o río Guadalaviar. A villa d'Ademuz ye a capital d'a comarca d'o Rincón d'Ademuz.
Mugas
O termin d'Ademuz muga con Libros, Río Deva, La Puebla de Sant Miguel, Santa Cruz de Moya, Casas Altas, Vallanca y Castiel Fabib.
Espacios naturals
O termin municipal d'Ademuz ye en a suya mayor parte montanyoso, con cautivos tipicament mediterranios como as almendreras. O termin municipal ye trescruzato por o río Guadalaviar y o suyo afluent, o río Bohílgues, con un amplo rete de zaicas que permete os cautivos de regano, mes que mes mazaneras y atros fruitals.
O paisache natural ye muito polito y adequato pa las gambatas y rotas senderistas, en especial en o río Bohílgues, con una intresant fauna y vechetación de ribera, declarato microrreserva natural. Tamién bi ha molins, beluns d'ellos muito antigos como o d'a Villa, d'Efren, y una central hidro-electrica huei en desuso.
Vicín a lo termin d'Ademuz ye o Parque Natural de Puebla de Sant Miguel, declarato parque natural por o gubierno valencián en mayo de 2007. Tien sabinas centenarias, y lo pico més alto d'o País Valenciano: l'Alto d'as Barracas u tamién dito Pico Calderón.
Nuclios de población
Bi ha 3 nuclios de población en o municipio, a mes d'a mesma villa d'Ademuz:
Tamién bi ha a-saber-las pardinas por tot o termin municipal, como as d'Altamira, Guerrero, El Soto, San Juan de las Veguillas y La Balsa, entre atras.
Historia
Enantes que lo reconquerisen se menciona Demuz en 1142 como una d'as mugas d'a Comunidat de Daroca. Por lo que pareix Remón Berenguer IV lis ne atorgaba a los Daroca si lo reconqueriban. Sindembargo a Comunidat de Daroca nunca no plegó a controlar territorios tant a lo sur.
Ademuz fué reconquiesto en 1210, ya pa cutio por Pero II d'Aragón (Daymuz et Castellum Habib et castellum quom dicitur lo Corbo et castellum quom dicitur Serrella) con aduya templera. En 1216 se confirmó que Sancho VII de Navarra teneba bells castiellos en a muga aragonesa con lo reino taifa de Valencia, entre ellos lo de Castiel Fabib y lo d'Ademuz, castiellos que probablement consiguió con empenyos de Pero II. O 20 d'abril de 1229 se firmó un tractato entre Chaime I d'Aragón y Zait Abu Zait. Abu Zait se declaró vasallo de Chaime I, se producioron cesions territorials y Ademuz quedó como lugar d'a Corona con os dreitos d'as diezmas ceditos a lo Temple. Ademuz fue adhibito a lo Reino de Valencia por o fillo y succesor de Pero II, Chaime I o Conqueridor.
O castiello d'Ademuz estió muit important en a Edat Meya, en especial en a guerra con Castiella, setiato dos vegatas por as tropas de Pero I de Castiella. Os ademucers estioron fidels siempre a la Corona d'Aragón.
Esta fidelidat la premioron muitas vegatas los reis d'Aragón, con fueros y libertatz a la municipalidat. Yera Ademuz villa reyal y teneba representación de sendicos en as Cortz de Valencia.
Demografía
Dende a decada de 1940 a emigración despobló Ademuz. Os vecins se'n iban pa grans centros industrials como Barcelona, Valencia y o Puerto de Murbiedro. Tamien estió significativa a emigración temporal pa las vendemas de Francia.
1842 | 1877 | 1900 | 1920 | 1940 | 1960 | 1981 | 2001 | 2005 | 2006 | 2007 | 2008 |
---|---|---|---|---|---|---|---|---|---|---|---|
3.033 | 3.339 | 3.415 | 4.092 | 3.866 | 2.827 | 1.545 | 1.115 | 1.157 | 1.183 | 1.242 | 1.269 |
Actualment a tendencia negativa s'invierte por a plegata de emigrants pa Ademuz, provinients d'a Berbería y de Rumanía mes que mes.
Economía
As actividatz economicas principals son agricolas. En o pasato estioron os cerials y a vinya os cautivos principals. Huei son importants os quasi monocautivos como as almendreras y as mazaneras. As mazanas d'Ademuz tienen un reconoixito prestichio en os mercatos exteriors.
As actividatz ganaderas se centran en o bestiar ovín mes que mes.
A industria ye redueita a actividatz alimentarias como turrons u carnicas, y atros productos de consumo basico, venditos en os mercatos exteriors y tamién muito apreciatos por os visitants.
O comercio ye muito desembolicato, se i concentran bells comercios, supermercatos, bancos y caixas, tallers, etz. on acuden tamien os habitants d'as poblacions vecinas.
O dia de mercato semanal ye o miercols, en a Plaza del Rabal.
O turismo rural tien en os zaguers tiempos un desembolique acceptable, cuenta con un hotel y bellas pensions y casas rurals.
Ademuz concentra tamién os principals servicios d'a comarca: o Centro de Salut Comarcal, o Colechio de Primaria, o Instituto d'Amostranza Segundaria y l'helipuerto en construcción.
Administración
Alcaldes
Lechislatura | Nombre | Partito politico |
---|---|---|
1979–1983 | Martirián Sánchez Monterde | Unión de Centro Democrático |
1983–1987 | Martirián Sánchez Monterde | OIV |
1987–1991 | Rafael Edo Pertegaz | Partido Socialista Obrero Español |
1991–1995 | Jesus Férriz Hinojosa | Partido Popular |
1995–1999 | Jesus Férriz Hinojosa | Partido Popular |
1999–2003 | Jesus Blasco Sánchez | Partido Popular |
2003–2007 | Fernando Soriano Antón | Partido Socialista Obrero Español |
2007–2011 | Fernando Soriano Antón | Partido Socialista Obrero Español |
Patrimonio historico-artistico
Arquitectura relichiosa
- Ilesia Arciprestal de San Per y de San Pablo, d'o sieglo XVII.
- Ermita de Santa María de la Güerta, d'o sieglo XIV.
- Ermita de San Chuaquín, d'o sieglo XV.
- Ermita de Santa Barbara, d'o sieglo XVII.
- Ermita de Santa María del Rosel, d'o sieglo XVIII.
- Ermita de San Miguel Arcánchel, en Val de la Sabina, d'o sieglo XVI.
- Ilesia d'a Purisma Concepción, en Sesga, d'o sieglo XVI.
- Ilesia de Santa Barbara, en Mas de l'Olmo, d'o sieglo XVII.
Arquitectura civil
- Castiello d'Ademuz, con gran importancia historica.
- Casa de la Villa, d'o sieglo XVI.
- Fosqueta Monecipal, d'o sieglo XVI.
- Forno meyeval, d'o sieglo XIII.
- Cambra Vieja del Trigo, antigo almudín d'o sieglo XVI, con l'antigo escudo d'armas d'Ademuz.[1]
- Puerta de San Vicente.
- Fuente Vieja u de los siete canyos.
- Molín Reyal.[2] En o río Bohílgues, güei conoxito como Molino de la Villa. Siglo XIII.
- Molino Nuevo.[3] Relacionato con as navatas que i heba en o río Guadalaviar, d'o sieglo XVIII.
Museus y espacios culturals
- Museu p'a Interpretación de l'augua, en o Molín Reyal.
- Museu d'o Pan y forno tradicional. En Mas de l'Olmo.
- Casa d'a Cultura. Se tracta d'un edificio historico construito en a decada de 1920, o Café-Teatro "La Unión", conoixito popularment como La Sociedad, pus a suya edificación la movioron os vecins d'ideolochía republicana. En a actualidat ye un centro multiusos que aculle, entre atros organismos, l'Instituto Cultural y de Estudios del Rincón de Ademuz, a Biblioteca Monecipal y a Sociedat Musical.
- Sala de Exposiciones Temporales. en o edificio d'a antigua Fosqueta Monecipal de'o sieglo XVI.
Toponimia menor
Se conservan microtoponimos coincidents con l'aragonés, como Val, Cambra (en Cambra vieja del trigo) u a Casa de la Villa, que se clama asinas mes que achuntamiento.
Fiestas
- Feria de San José. Tradicional feria de bestiar.
- Sant Vicente Ferrer. Domingo siguient a Pasqua de Resureccion. Mona y por a noche hoguericas en las calles.
- Asumpción d'a Virchen. Fiestas d'agosto. Bailes, toros en a carrera y o Rabal, penyas, toro embolato, etc.
- Nuestra Senyora del Rosario. Tradicionals Fiestas Patronals d'a villa. Primer domingo d'octubre. Bailes, toro embolato...
- Tambien se celebran Sant Roque, Santa Bárbara y o patron d'a villa, Sant Pero. Atros santos celebrados son Sant Blas y Sant Antón.
- Sant Miguel Arcánchel en Val de la Sabina.
- Santa Barbara en Mas de l'Olmo.
Presonaches
- José Ríos.[4] Escritor y antiquario del siglo XVIII, naixito d'Ademuz, retor de Líria y Cullera.
- Vicente Español. Retor ilustrato de la ilesia arciprestal d'Ademuz d'o sieglo XVIII.
- Eusebio Cañas.[4] Escritor y tradutor chesuita d'o sieglo XVIII, naixito d'Ademuz y muerto en Italia en 1807.
- Elvira Lindo. Escritora y guionista, naxita en 1962 en Cádiz y d'orichen ademucer.
Bibliografía
- Eslava Blasco, Raúl: Ademuz y su patrimonio histórico-artístico. Ademuz, 2007. ISBN 978-84-606-4251-0
- Gargallo Gil, J.E.: Habla y cultura popular en el Rincón de Ademuz. Madrit, 2004.
- Rubio Herrero, Samuel: Historia verdadera de la cruz que chilla y fundación del Hospital de San Joaquín. Ademuz, 2001.
- Rodrigo Alfonso, Carles: El Rincón de Ademuz, análisis comarcal. Valencia, 1998.
- ABABOL. Revista del Instituto Cultural y de Estudios del Rincón de Ademuz (ICERA), dirigida por Ángel Antón Andrés y publicada trimestralmente en Ademuz dende 1995.
Referencias
- ↑ (es) Fuente: Raúl Eslava Blasco, Heráldica de las villas de Ademuz y Castielfabib, en la revista ABABOL, nº 52, año 2007.
- ↑ (es) Fuente: Raúl Eslava Blasco, El Molino de la Villa de Ademuz, en la revista ABABOL, nº 31, año 2002
- ↑ (es) Fuente: Raúl Eslava Blasco, El Molino Nuevo de Ademuz, en la revista ABABOL, nº 35, año 2003.
- ↑ 4,0 4,1 (es) Fuente: Raúl Eslava Blasco, Noticias sobre escritores del Rincón de Ademuz en los siglos XVII y XVIII, según sus contemporáneos, en la revista ABABOL, nº 49, año 2007.
Vinclos externos
- www.ademuz.es Pachina web oficial d'Ademuz
- Pachina del Instituto Cultural y de Estudios del Rincón de Ademuz (ICERA) y d'a suya revista ABABOL
- Arte y patrimonio en el Rincón de Ademuz (es)
- Sociedad Musical de Ademuz
- Mazanas d'Ademuz
- Algunas rutas senderistas por as tierras d'Ademuz
Municipios d'a comarca Rincón d'Ademuz | |
---|---|
Ademuz | Vallanca | Casas Altas | Casas Baixas | Castiel Fabib | La Puebla de Sant Miguel | Torre Chusana |