سل

الباكتريا اللي بتسبب مرض السل

السـُل (تي بي / تيوبر كولۏسيس) هو مرض منتشر و ممكن يسبب الموت لو ماتعالجش ،بييجي نتيجة اصابة الواحد بباكتيريا اسمها مايكوباكتيريوم تيوبركيولوسيس. السل غالبا بيهاجم الرئه ( السل الرئوي) بس ممكن كمان يهاجم حتت تانية فى جسم الانسان زى الجهاز العصبي المركزي و الجهاز الليمفاوي و الجهاز الدوري و العضم و المفاصل و حتى الجلد.الاعراض بتاعة السل غالبا بتبقى الكحة الجامدة المزمنة و البلغم اللي فيه دم و السخونية و العرق بالليل والخسسان.

العدوى

باكتريا السل مايكوباكتيريوم تيوبركيولوسيس بتنتقل بالهوا من شخص للتانى( لما بعطس او يكح او يتف), و شخص واحد مريض بالسل ممكن يصيب من 10 – 15 واحد في السنة.و موجود في العالم دلوقتي 16 مليون شخص مصابين بالسل (الدرن) النشط . و تلت سكان العالم معرضين للعدوى . فيه شخص كل ثانية بيتصاب بالسل فى العالم حسب تقديرات منظمة الصحة العالمية. وكل سنة بيموت من المرض 2 مليون منهم,90% فى الدول الفقيرة والنامية .

أسامي السل

كان الدرن بيسمى بالسل {الاستهلاك} ، لانه يبدو انه بيستهلك الناس من جوه ، الكحة بالدم، الحمى ، الشحوب ،هزال طويل ؛ سل الغدد الليمفاويه (في البالغين) ، اللى بتأثر على الجهاز اللمفاوي وغدد الرقبة ، درن البطن ، درن الجلد ؛ الهزال والمرض السل كان بيتسمى كمان بالطاعون الابيض ، لأنه يبدو أن المصابين بالدرن كانو بيعانو بشكل ملحوظ من الشحوب.

التشخيص

اختبار التيوبركولين في الجلد

مرض السل بيتشخص بواحدة او اكتر من الطرق دي:

1. اشعة اكس على الصدر
2. اختبار التيوبركولين في الجلد
3. تحليل الدم
4. فحص بالميكروسكوب لعينة من سوايل جسم المريض ( البلغم مثلاً)

العلاج

علاج السل مش سهل و بيعوز مضادات حيوية كتير و لمدد طويلة و دلوقتي زادت المشكلة بتاعة السل لما بدأت تظهر انواع جديدة من الباكتريا اللي بتقاوم العلاج. العلاج بيتقسم لادوية الخط الاولاني و ادوية الخط التاني، بالنسبة للخط الاولاني فدي لستة الادوية:

• ايتامبيوتول
• ايزونيازايد
• بايرازينامايد
• ريفامبيسين
• ستريبتومايسين

اما بالنسبة للخط التاني فدي اهم الادوية بتاعته:

• سيبروفلوكساسين
• موكسيفلوكساسين
• بارا-امينوساليسيبيك اسيد

الوقاية

الوقاية من المرض دا بتكون عن طريق التطعيم اللي اسمه البي سي جي و كمان عن طريق برامج الفحص للناس المعرضة للمرض.

لينكات

• منظمة الصحة العالمية

فيه فايلات فى تصانيف ويكيميديا كومونز عن:

سل