Benjamin Franklin

Benjamin Franklin

Duine d’Aithreacha Bunaithe na Stát Aontaithe ba ea Benjamin Franklin (17 Eanáir, 1706 [6 Eanáir, 1706 sa tseanstíl] – 17 Aibreán, 1790). Duine nótáilte na seacht mbua a bhí ann: clódóir, údar agus aorthóir, teoiricí polaitiúil, polaiteoir, eolaí, gníomhaire i saol an phobail, státaire agus taidhleoir. Mar eolaí, bhí áit nár bheag dó san Eagnaíocht agus i stair na fisice as a chuid fionnachtana agus teoiricí maidir leis an leictreachas. Cheap sé an tslat thintrí, an lionsa défhócasach, sorn Franklin, odaiméadar le haghaidh carráistí, agus an “armonica” gloine. D’eagraigh sé an chéad leabharlann iasachta phoiblí i Meiriceá chomh maith leis an chéad bhriogáid dóiteáin i bPennsylvania. Bhí sé ar na daoine ba thúisce a mhol aontacht na 13 coilíneacht, agus mar scríbhneoir agus ghníomhaí thaobhaigh sé le coincheap náisiúin Meiriceánaigh. Mar thaidhleoir le linn na Réabhlóide Meiriceánaí, dhaingnigh sé an chomhghuaillíocht leis an bhFrainc, rud a chuidigh go mór le neamhspleáchas na Stát Aontaithe a bhaint amach.