کیسپیئن سمندر

بحیرہ قزوین جس نوں بحیرہ کیسپیئن تے بحیرہ خزر وی کہندے نیں ، رقبے تے حجم دے اعتبار نال جگ دی سب توں وڈی جھیل اے ، جس دا رقبہ 3 لکھ 71 ہزار مربع کلومیٹر اے جدکہ حجم 78 ہزار 2 سو معکب کلومیٹر اے ۔ ایہہ ایشیاء تے یورپ وچکار چارے پاسیئوں زمین نال گذریا ہوئیا خطہ آب اے ۔ اسدی ودھ توں ودھ گہرائی 1025 میٹر اے ۔

بحیرہ قزوین نوں سمندر اس لئی وی آکھیای جاندا اے جدوں پہلی وار رومی اسدے ساحل تے پہنچے تے اوہناں نے اسدا پانی چکھیا جہڑا کہ نمکین سی تے اوہناں نے اسنوں سمندر قرار دے دتا ۔

بحیرہ قزوین دے ساحل روس ، ایران ، آذربائیجان ،ترکمانستان تے قازقستان نال لگدا اے ۔

بحیرہ قزوین منیچ تے ڈون وولگا نہر دے راہیں بحیرہ ازوف نال منسلک اے تے ایتھے ایہہ بحیرہ ازوف دے زریعے ساری دنیا نال جڑیا ہوئیا اے تے اسدے ساحلی ملکاں دی تجارت تے دوجے مال بردار جہاز بحیرہ قزوین توں دریائے وولگا تے فیر ڈون وولگا نہر تھانی ہندے ہوئے دریائے ڈون دے وچوں لنگھدے ہوئے بحیرہ ازوف تے فیر بحیرہ اسود دے زریعے باقی دنیا چ جاندے نیں۔

آذربائیجان دا راجگھر باکو وی اسدے ساحل تے آباد اے ، جہڑا کہ اس علاقے چ تیل دی تنصیبات دا وڈا مرکز اے ۔ بحیرہ قزوین تیل دی دولت نال وی مالامال اے ۔ دنیا چ سب توں پہلا تیل دا کھوہ (کنواں) وی اسدے ساحل تے کھودیا گئیا سی ، جس دا ذکر مشہور سیاح مارکوپولو نے اپنے سفر نامے چ کیتا اے کہ اوہ جدوں باکو دے کولوں لنگھیا تے اسنے ایتھے تیل دے کھوہ دیکھے جتھوں لوک تیل حاصل کردے سن ۔