Удмурт Республикаысь Дышетӥсьёслэсь тодон-валанзэс будэтонъя но паськытатонъя институт
Удмурт Республикаысь Дышетон удысын ужасьёслэсь тодон-валанзэс будэтонъя но паськытатонъя институт (ИПК и ПРО УР) — дышетӥсьёслы ватсаса тодон-валан сётонъя кун учреждение.
Кылдытэмын 1938-тӥ арын. Та институт бадӟым юрттэт сётэ вылӥ тодон-валан басьтэм специалистъёслы: та дышетсконниын соос дышетонлэн но наукалэн туала амалъёсынызы тодматско, азьвыл басьтэм тодон-валанзэс выльдо. Одӥг но ӝыны ар ӵоже ини Институтын выль амал пыӵа: отын тодон-валан люкаса, чылкак выль квалификация басьтыны но соя дышетонэз радъяны луонлык кылдытэмын. Институтын бадӟым саклык висъяське удмурт кылъя но литературая дышетӥсьёслэсь тодон-валанзэс будэтонлы. Та ласянь улонэ пыӵало пӧртэм программаос. Удмурт Республикаысь Дышетон удысын ужасьёслэсь тодон-валанзэс будэтонъя но паськытатонъя институтын ужзэ радъя одӥг факультет, 9 кафедра, дышетонъя но методикая 32 кабинет, наукая 9 лаборатория. Отын тыршо докторъёс, профессоръёс, пӧртэм наукаосъя кандидатъёс но доцентъёс. Институтлэн вань аслаз книгапоттонниез. Институтлэн кивалтӥсезлэсь ужзэ быдэсъя Людмила Мустаева. Удмурт Республикаысь Дышетон удысын ужасьёслэсь тодон-валанзэс будэтонъя но паськытатонъя институт (ИПК и ПРО УР) интыяськемын Ижысь Ухтомского ульчаын, 25 номеро юртын.
Интернетын сайтэз: www.ipkpro.ru. Электрон гожтэт ыстыны луоз таӵе адресъя: [email protected].