專欄│期望西荷會師決賽

更新時間：07:00 2024-07-08
發佈時間：07:00 2024-07-08

歐國盃4強組合已經出爐喇！西班牙惡鬥法國、荷蘭大戰英格蘭，唔知大家估中咗幾多隊呢？

老實講，呢兩晚嘅8強賽事都認真幾惡頂㗎！4場比賽，有三場都要踢足120分鐘，兩場「全餐」射埋12碼，只得一場係可以喺90分鐘內分出勝負，對球迷嘅精神同體力都係一大考驗。

而響呢4隊入面，你又認為邊個會係冠軍呢？我就梗係繼續支持愛隊西班牙啦！西班牙係分組賽唯一一支3戰全勝嘅球隊，淘汰格魯吉亞以及德國都有展現出應有嘅實力。唯一擔心就真係幾位球員嘅傷停問題啦。不過只要拉明耶馬同尼高拉斯威廉斯依然在陣中，狂牛仍可保持兩邊快放嘅節奏，面對90分鐘內唔識用生波取得入球嘅法國，依然佔有一定優勢。

至於另一場4強，睇完英格蘭點樣悶贏瑞士之後，個人真係唔希望再睇多英格蘭多1分鐘。寄望荷蘭可以喺法定時間內搞掂英格蘭，殺入決賽。同西班牙合演2010年世界盃決賽翻版啦。Vicki 趙小姐