1. பஜாஜ் பல்சர்:
இந்தப் பட்டியலில் முதலிடத்தைப் பிடித்திருப்பது பஜாஜ் பல்சர். கடந்த மே மாதம் மட்டும் 47,301 பல்சர் பைக்குகள் விற்பனையாகியிருக்கின்றன. இது கடந்தாண்டு மே மாதத்தை விட 12,112 பைக்குகள் அதிகம். இது பல்சர் பைக் மீது இளைஞர்களுக்கு இன்னும் குறையாத மோகத்தையே காட்டுகிறது. மேலும், இளைஞர்களுக்கு ஏற்ற வகையில் புதிய பல்சர் பைக்குகளை பஜாஜ் அப்டேட் செய்து வருவதும் ஒரு காரணம்.
2. டிவிஎஸ் அப்பாச்சி:
இந்தியாவில் பல்சருக்கு போட்டி என்றால் அது அப்பாச்சி தானே. பல்சரை விட குறைவாக கடந்த மே மாதம் 37,906 அப்பாச்சி பைக்குகளை விற்பனை செய்திருக்கிறது டிவிஎஸ். ஆனால், இது கடந்தாண்டுடன் ஒப்பிடும் போது 9.45% குறைவு. ஆம், கடந்தாண்டு மே மாதம் இதனை விட அதிகமாக 41,955 பைக்குகளை விற்பனை செய்திருந்தது டிவிஎஸ். பல்சர் பைக்குகளை பஜாஜ் அப்டேட் செய்வது போல, அப்பாச்சி பைக்குகளை டிவிஎஸ் அப்டேட் செய்வது குறைவு என்பது குறிப்பிடத்தக்கது.
3. ஹோண்டா யூனிகார்ன்:
கம்யூட்டர் பைக் தான் வேண்டும் ஆனால் கொஞ்சம் பெரிய இன்ஜினுடன் வேண்டும் என்பவர்களுக்கான சிறந்த தேர்வாக இருக்கிறது ஹோண்டா யூனிகார்ன். கடந்த மே மாதம் 24,740 யூனிட்டுகள் விற்பனையாகி இந்தப் பட்டியலில் மூன்றாவது இடத்தைப் பிடித்திருக்கிறது யூனிகார்ன்.
4. யமஹா MT 15:
இந்திய இளைஞர்கள் மத்தியில் கொஞ்சம் கொஞ்சமாக பிரபலமாகி வருகிறது MT 15. ஸ்போர்ட்டியான டிசைன், பிற பைக்குகளை விட சற்று மேம்பட்ட இன்ஜின் என இந்த MT 15 பைக்கை இளைஞர்கள் வாங்குவதற்கு பல்வேறு காரணங்கள் இருக்கின்றன. கடந்தாண்டு மே மாதம் 7,156 MT 15 பைக்குகள் விற்பனையாகியிருந்த நிலையில், இந்தாண்டோ அது இரு மடங்கு அதிகரித்து 14,612 யூனிட்டுகளாகியிருக்கிறது.
5. யமஹா FZ:
பல்சர் மற்றும் அப்பாச்சி மாடல்களுடன் போட்டியில் இருக்கும் FZ பைக்குகளுக்கு, MT வடிவில் புதிய போட்டியாளரும் வந்திருக்கிறார். எனவே கடந்தாண்டை விட இந்தாண்டு FZ-யின் விற்பனை குறைந்திருக்கிறது. கடந்தாண்டு மே மாதம் 16,919 FZ பைக்குகள் விற்பனையாகியிருந்த நிலையில், கடந்த மே மாதம் 14,359 பைக்குகளே விற்பனையாகியிருக்கின்றன. ஒரு நிறுவனத்தைச் சேர்ந்த FZ மற்றும் MT பைக்குகள் இரண்டும் சரிசமமாகப் போட்டியிட்டு வருகின்றன.
6. யமஹா R15:
இந்தப் பட்டியலில் வரிசையாக மூன்று இடங்களை யமஹா நிறுவனமே பிடித்திருக்கிறது. கடந்த மே மாதம் 10,435 R15 பைக்குகளை விற்பனை செய்திருக்கிறது யமஹா. இது கடந்தாண்டுடன் ஒப்பிடும் போது 7.49% குறைவு. இந்த R15-க்கும் போட்டி MT 15 தான். இரண்டு பைக்குகளிலும் ஒரே இன்ஜினே பயன்படுத்தப்பட்டிருக்கிறது. ஆனால், R15 பைக்கை பிராக்டிகாலிட்டி காரணமாக வாங்க முடியாதவர்கள் சட்டென MT-யை வாங்கி விடுகிறார்கள்.
7. டாப் 10 இடங்களுக்குள்:
இந்த டாப் 10 பட்டியலில் கடைசி நான்கு இடங்களை ஹோண்டா SP 160, ஹீரோ எக்ஸ்பல்ஸ் 200, கேடிஎம்ஸ 200 மற்றும் ஹோண்டா ஹார்னெட் 2.0 ஆகிய நான்கு பைக்குகளும் பிடித்திருக்கின்றன. இவற்றில் ஹோண்டா நிறுவனமானது 9,939 SP 160 பைக்குகளையும், 2,505 ஹார்னெட் 2.0 பைக்குகளையும் விற்பனை செய்திருக்கிறது. ஹீரோ நிறுவனமானது 3,433 எக்ஸ்பல்ஸ் 200 பைக்குகளை விற்பனை செய்திருக்கிறது. அதேபோல் கேடிஎம் நிறுவனமானது 2,645 200சிசி பைக்குகளை விற்பனை செய்திருக்கிறது.