பாஜாஜின் புதிய CNG பைக் (ஜூலை 5):
உலகின் முதல் CNG பைக்கை ஜூன் 17ம் தேதி வெளியிடவிருப்பதாக மே மாதம் அறிவித்திருந்தது பஜாஜ் நிறுவனம். ஆனால், பல்வேறு காரணங்களால் அந்த வெளியீடு ஜூலை 17ம் தேதிக்கு தள்ளி வைக்கப்பட்டு, பின்னர் மீண்டும் ஜூன் 5ம் தேதிக்கு மாற்றப்பட்டது.
பெட்ரோல் பைக்குகளை விட குறைவான பயன்பாட்டுச் செலவுடன் புதிய CNG பைக்கை வெளியிடவிருப்பதாகக் கூறியிருக்கிறது பஜாஜ் நிறுவனம். இதுவரை கார்களில் மட்டுமே CNG மாடல்களை பார்த்து வந்த இந்திய வாடிக்கையாளர்கள், பைக்கில் CNG என்பதால் இந்தப் புதிய பைக்கைப் பார்க்க ஆர்வமுடன் காத்திருக்கின்றனர். ரூ.80,000 அல்லது அதற்கு மேற்பட்ட விலையில் புதிய CNG பைக் வெளியாகலாம் என எதிர்பார்க்கப்படுகிறது.
மெர்சிடீஸ் பென்ஸ் EQA (ஜூலை 8):
தங்களது தொடக்க நிலை சொகுசு எலெக்ட்ரிக் காரான EQA மாடலை வரும் ஜூலை 8ம் தேதி இந்தியாவில் வெளியிடவிருப்பதாக அறிவித்திருக்கிறது மெர்சிடீஸ் பென்ஸ் நிறுவனம். EQS, EQE மற்றும் EQB ஆகிய எலெக்ட்ரிக் கார்களைத் தொடர்ந்து புதிதாக இந்த EQA மாடலை வெளியிடவிருக்கிறது மெர்சிடீஸ்.
66.5kWh மற்றும் 70.5kWh என இரண்டு பேட்டரி பேக்குகளுடன் புதிய EQA எலெக்ட்ரிக் காரை வெளியிடவிருக்கிறது அந்நிறுவனம். மேலும், இரண்டு 10.25 இன்ச் டிஸ்பிளேக்கள், டர்பைன் வடிவ AC வென்ட்கள் ஆகிய வசதிகள் இந்தக் காரில் இடம்பெறும் எனத் தெரிகிறது. ரூ.70 லட்சம் விலையில் இந்த தொடக்க நிலை எலெக்ட்ரிக் காரை மெர்சிடீஸ் வெளியிடலாம் என எதிர்பார்க்கப்படுகிறது.
ராயல் என்ஃபீல்டு கொரில்லா 450 (ஜூலை 17):
ராயல் என்ஃபீல்டு ரசிகர்கள் நீண்ட காலமாகக் காத்திருக்கும் கொரில்லா 450 பைக் மாடலை இந்த ஜூலை 17ம் தேதி வெளியிடவிருப்பதாக அறிவித்திருக்கிறது ராயல் என்ஃபீல்டு. ஹிமாலயன் 450 மாடலின் இன்ஜினுடன், அதனை விட எடை குறைவாக, கூடுதல் செயல்திறனுடன் புதிய பைக்கை அந்நிறுவனம் வெளியவிடருக்கிறது.
ஒரு ரோட்ஸ்டர் பைக்காக ரைடு-பை-வயர் உள்ளிட்ட மேம்பட்ட வசதிகளுடன் இந்த கொரில்லா 450 பைக்கை ராயல் என்ஃபீல்டு வெளியிடலாம் எனத் தெரிகிறது. ரூ.2.3 லட்சம் முதல் ரூ.2.5 லட்சத்திற்குள்ளான விலையில் இந்தப் புதிய பைக் வெளியாகும் என எதிர்பார்க்கப்படுகிறது.
BMW 5 சீரிஸ் LWB (ஜூலை 24):
இந்தியாவில் 5 சீரிஸின் நீளமான வீல் பேஸ் கொண்ட மாடலை முதல் முறையாக வெளியிடவிருக்கிறது BMW. மேலும், இந்த சொகுசு காருக்கான முன்பதிவை அந்நிறுவனம் ஏற்கனவே தொடங்கிவிட்டது.
இந்த புதிய சொகுசு காரில் 258hp பவர் மற்றும் 400Nm டார்க்கை வெளிப்படுத்தக்கூடிய 2.0 லிட்டர் டர்போ பெட்ரோல் இன்ஜினை அந்நிறுவனம் பயன்படுத்தலாம் என எதிர்பார்க்கப்படுகிறது. மேலும், 12.3 இன்ச் டிஜிட்டல் இன்ஸ்ட்ரூமென்ட் கிளஸ்டர், 14.9 இன்ச் டச்ஸ்கிரீன் இன்ஃபோடெயின்மென்ட் சிஸ்டம், பனோரமிக் சன்ரூஃப் மற்றும் வில்கின்ஸ் சவுண்டு சிஸ்டம் ஆகிய வசதிகள் இந்தக் காரில் கொடுக்கப்பட்டிருக்கும் எனவும் எதிர்பார்க்கப்படுகிறது.
BMW CE 04 எலெக்ட்ரிக் ஸ்கூட்டர் (ஜூலை 24):
மேற்கூறிய சொகுசு காருடன் இந்தியாவில் தங்களுடைய புதிய எலெர்ட்ரிக் ஸ்கூட்டரான CE 04-யும் ஜூலை 24ம் தேதியன்று வெளியிடத் திட்டமிட்டிருக்கிறது BMW. 10.2 இன்ச் TFT டிஸ்பிளே, ஸ்மார்ட்போன் கனெக்டிவிட்டி, USB-C சார்ஜிங் போர்ட் ஆகிய வசதிகள் இந்தப் புதிய எலெக்ட்ரிக் ஸ்கூட்டரில் கொடுக்கப்படவிருக்கின்றன. ரூ.10 லட்சம் முதல் 14 லட்சத்திற்குள்ளான விலையில் இந்த எலெக்ட்ரிக் ஸ்கூட்டரை BMW வெளியிடலாம் என எதிர்பார்க்கப்படுகிறது.
மினி கூப்பர் S மற்றும் கன்ட்ரிமேன் எலெக்ட்ரிக் கார்:
கடந்தாண்டு உலகளவில் வெளியிடப்பட்ட புதிய தலைமுறை கூப்பர் S மற்றும் கன்ட்ரிமேன் எலெக்ட்ரிக் கார் மாடல்களை இந்த ஜூலை மாதம் இந்தியாவில் வெளியிடவிருக்கிறது மினி. கூப்பர் S மாடலில் 2.0 லிட்டர் டர்போ பெட்ரோல் இன்ஜின் பயன்படுத்தப்பட்டிருக்கும் நிலையில் 3 டோர்கள் கொண்ட மாடலாக இந்தியாவில் வெளியாகவிருக்கிறது அந்தக் கார்.
கன்ட்ரிமேன் எலெக்ட்ரிக் காரில் 201hp பவர் மற்றும் 250Nm டார்க்கை உற்பத்தி செய்யக்கூடிய எலெக்ட்ரிக் மோட்டாரை மினி பயன்படுத்தியிருக்கிறது. எந்த நாளில் வெளியீடு எனக் குறிப்பிடப்படவில்லை என்றாலும், இந்த ஜூலை மாதம் கண்டிப்பாக வெளியாகும் எனத் தெரிகிறது.
நிஸான் X-ட்ரெயில்:
தற்போது இந்தியாவில் மேக்னைட் என்ற ஒரேயொரு கார் மாடலை மட்டுமே விற்பனை செய்து வருகிறது நிஸான். இந்தியாவில் அடுத்தடுத்து புதிய கார்களை வெளியிடத் திட்டம் வைத்திருக்கிறது நிஸான். அந்த வரிசையில் முதல் காராக இந்த நான்காம் தலைமுறை X-ட்ரெயில் மாடலை வெளியிடவிருக்கிறது அந்நிறுவனம்.
இந்த X-ட்ரெயில் மாடலின் தயாரிப்பை உள்நாட்டில் மேற்கொள்ளாமல் இறக்குமதி செய்தே அந்நிறுவனம் விற்பனை செய்யவிருக்கிறது. எனவே, குறைந்த அளவு கார்களையே இறக்குமதி செய்து விற்பனை செய்யவிருக்கிறது நிஸான்.
10 ஸ்பீக்கர்கள் கொண்ட போஸ் சரவுண்டு சிஸ்டம், 3 ஸோன் ஆட்டேமேட்டிக் கிளைமேட் கண்ட்ரோல், பவர்டு டெயில்கேட், ஹீட்டட் முன்பக்க சீட்கள், பனோரமிக் சன்ரூஃப், 12.3 இன்ச் டச்ஸ்கிரீன் இன்ஃபோடெயின்மென்ட் சிஸ்டம், டிஜிட்டல் டிரைவர்ஸ் டிஸ்பிளே, 10.8 இன்ச் ஹெட்ஸ் அப் டிஸ்பிளே ஆகிய வசதிகளுடன் ரூ.40 லட்சம் விலையில் இந்தியாவில் இந்தக் கார் வெளியாகலாம் என எதிர்பார்க்கப்படுகிறது.