Asturiense
Esti artículu o seición necesita referencies qu'apaezan nuna publicación acreitada, como revistes especializaes, monografíes, prensa diaria o páxines d'Internet fiables. |
Asturiense | |
---|---|
cultura arqueolóxica | |
![]() |
L'asturiense[1] ye un complexu cultural que, ensin romper col Aziliense, muestra ciertos rasgos carauterísticos que lu diferencien del restu de comunidaes del so entornu. L'Asturiense ye un modelu preneolíticu con almacenamientu que dará pasu al neolíticu cuando les condiciones sociales lo esixan.
Alrodiu a 1914 - 1915 el Conde de la Vega del Sella decidióse a escavar na Cueva del Pericial en Posada (Llanes). Nel vestíbulu alcontró abondos restos de fauna y dalgunos instrumentos, fundamentalmente picos asturienses. Nun primer momentu va da-yos a estos instrumentos una cronoloxía Musteriense. Más alantre daráse cuenta del so error al decatáse que la fauna que los acompañaba yera típicamente del holocenu. En 1923 publicará "El Asturiense" nome col que designa a esti momentu cultural que cataloga como preneolíticu tres estudiar la estratigrafía de la Cueva de La Riera en Bricia (Llanes) (la estratigrafia yera: Magdaleniense -> Aziliense --> Asturiense).
Caracterízase polos utiles toscos n'estremu, instrumentos llíticos primarios ya instrumentos macrollíticos. El picu asturiense ye l'instrumentu más característicu. La tosquedá de los útiles fizo pensar a los prehistoriadores que se trataba de comunidaes atrasaes pero un analís fonderu demostró'l criteriu racional que residia na ellaboración de los útiles macrolíticos (lo que pretendíen yera facer instrumentos práuticos).
Tiense la certeza de que les comunidaes asturienses desendolcaron complexes téuniques de caza y pesca, en dalgunos yacimientos aparecierón especies peláxiques como'l llinguáu, polo qu'esistiríen embarcaciones preparaes pa navegar n'alta mar y tener el conocimientu necesariu pa desenvolvése con soltura a lo llargo de la plataforma continental.
En cueves del oriente d'Asturies, tamién al abertal, apaecen grandes depositos de conches, conservaos gracies a la naturaleza calcárea del suelu. Na fastera central asturiana son pocos los depósitos, non porque nun esistieren, sinón porque al nun dominar los materiales caliares les prebes degradáronse y/o perdiéronse pa siempres. Los "concheros" son grandes amontonamientos de caparazones de moluscos, especialmente Trochus lineatus (llámpara). Xeneralmente asítiense a la entrada de les cueves.
La viesca convirtióse nuna fonte de recursos esencial pa estes comunidaes, con una importancia destacada de los vexetales na dieta.
Referencies
[editar | editar la fonte]- ↑ Esti términu apaez nel Diccionariu de l'Academia de la Llingua Asturiana. Ver: asturiense