Darnell Jackson

Darnell Jackson

(2009)
Biografía
Nacemento	7 de novembro de 1985 (38 anos) Oklahoma City, Estados Unidos de América
Datos persoais
País de nacionalidade	Estados Unidos de América
Grupo étnico	Afroamericano
Educación	Universidade de Kansas Midwest City High School (en) Northwest Classen High School (en)
Altura	206 cm
Peso	115 kg
Actividade
Ocupación	baloncestista , xornalista
Período de actividade	2008 -
Nacionalidade deportiva	Estados Unidos de América
Deporte	baloncesto
Liga	NBA G League, Baloncesto masculino da División I da NCAA e National Basketball Association
Posición de xogo	Ala-pivote
Convocado por	Miami Heat, 52º (2008)
Traxectoria   Equipo - Stockton Kings - Erie BayHawks (pt) - Sacramento Kings - BC Donetsk - Milwaukee Bucks - Xinjiang Flying Tigers (pt) - Cleveland Cavaliers 2004-2008 Kansas Jayhawks

Darnell Edred Jackson, nado o 7 de novembro de 1985 en Oklahoma City, Oklahoma, é un xogador profesional de baloncesto estadounidense que xoga no PAOK BC grego. Mide 2,06 metros de altura e xoga nas posicións de ala-pivote e pivote.

Traxectoria deportiva

Universidade

Non foi até o noveno grao cando comezou a xogar a baloncesto. Tralo seu paso polo instituto xogou durante catro tempadas cos Jayhawks da Universidade de Kansas, aínda que até o último ano non se fixo cun oco no cinco titular. Na súa primeira tempada tan só fixo 2 puntos e 1,7 rebotes por partido. No seu segundo ano en Kansas subiu a súa achega, xogando algo máis de quince minutos por partido, pero mediada a tempada foi suspendido pola NCAA por nove partidos, tras aceptar diñeiro de Don Davis, un afeccionado dos Jayhawks e amigo da familia, algo completamente prohibido na liga universitaria. Este feito foi só unha parte do mal ano que pasou Jackson, xa que a súa avoa morreu atropelada por un condutor bébedo a principios de 2005. Dende entón, cando anota unha canastra golpéase tres veces no peito simbolicamente, unha pola súa avoa, outra pola súa nai e outra por Don Davis. Unha vez regresou ás canchas, fixo o seu mellor partido ante Iowa State, ao conseguir 13 puntos e 8 rebotes.

Na súa tempada júnior foi o terceiro mellor reboteador do equipo, tras ter unha media de 5,1 por partido. Conseguiu o primeiro dobre-dobre da súa carreira tras lograr 10 puntos e 10 rebotes ante Oral Roberts no segundo partido da tempada,

Xa na súa tempada sénior foi elixido no terceiro mellor quinteto da Big 12 Conference e no mellor quinteto de xogadores máis mellorados. Foi titular nos últimos 35 partidos, sendo o máximo reboteador do equipo con 267 rexeitamentos. Bateu o seu récord anotador ante Boston College, ao conseguir 25 puntos, aos que engadiu 9 rebotes e 2 roubos de balón. Acabou a tempada cunha media de 11,2 puntos e 6,7 rebotes por partido. No total da súa andaina como universitario fixo 6,8 puntos e 4,9 rebotes de media.

Profesional

Foi elixido na quincuaxésimo segunda posición do Draft da NBA de 2008 por Miami Heat, mais os seus dereitos foron case inmediatamente traspasados a Cleveland Cavaliers, equipo polo que asinou contrato en setembro de 2008. Previamente disputara a liga de Verán que se celebrou en Las Vegas, onde en 5 partidos fixo 5,8 puntos e 5,4 rebotes en 24,6 minutos de xogo. O 23 de marzo de 2010 foi cortado polos Cavaliers para facer sitio no equipo a Zydrunas Ilgauskas, e logo contratado por Milwaukee Bucks, aínda que permaneceu inactivo. Co comezo da tempada 2010-11 asinou con Sacramento Kings.

Véxase tamén

Ligazóns externas

• Perfil en NBA.com (en inglés)
• Estatísticas en BasketballReference.com Arquivado 18 de abril de 2010 en Wayback Machine. (en inglés)