九龍塘
閱讀設定
九龍塘(Kowloon Tong,舊譯Kau Lung Tong)係香港新九龍一個地方,九龍市區裏面一個低密度住宅區。一般來講,界限街伸到去煙墩山南面山腰,都可以當係九龍塘。行政上面,九龍塘東西兩面,分別係歸九龍城區同埋深水埗區管。九龍塘原本係一條村名,即係界限街警察遊樂會一帶。今時今日九龍塘,位置、範圍都同原本位置好唔同。九龍塘除咗出名係中上階層聚居之外,亦都出名時鐘酒店。
九龍塘有兩間大學,中間有香港城市大學,東面九龍仔一帶,有香港浸會大學。其中城市大學好近港鐵九龍塘站,同區裏面大商場又一城拍埋。而隔籬又一村都當係九龍塘。
九龍塘近九龍仔嗰邊,除咗有浸會大學,近山一啲係廣播道,以前係香港所有電視台電台集中地,不過因為唔夠地,唔少已經或者就快搬走。
歷史
[編輯]九龍塘原本係一條大村,響界限街今日警察遊樂會一帶。北面有座窩仔山,佢東面山谷有涌有田地。條村西面無幾遠,有塘尾同田寮兩條村。1910年代,九廣鐵路(家下嘅東鐵綫)穿過條村東面,而鐵路東面個山谷另有條村,叫九龍仔,今日禧福道南面一帶。
1920年代,香港政府決定發展九龍塘同九龍仔做住宅區,成個住宅區發展跟英國模式起,裏面差唔所有街都係用英國郡名,而當時住嘅,多數係英國人。因為個計劃係九龍塘住宅區,好多人都當埋九龍仔呢部份係九龍塘,到咗今時今日,亦好多人唔識分原本九龍仔同九龍塘響邊。
敎育
[編輯]響未有普及敎育之前,喺九龍塘住嘅多數受過敎育,好多學校都起響呢度。而且愈來愈多國際學校同直資學校。九龍塘裏面亦有兩間大學,香港城市大學同香港浸會大學。
交通
[編輯]路呢,屬一號幹綫嘅一段窩打老道穿過九龍塘,北面通過獅子山隧道去到新界沙田、大埔、粉嶺、上水。而窩打老道向南,就通去旺角、何文田同油蔴地。
![](http://upload.wikimedia.org/wikipedia/commons/thumb/4/4a/Commons-logo.svg/30px-Commons-logo.svg.png)