金文泰
金文泰 | |
---|---|
![]() | |
![]() | |
任期 1925年11月1號-1930年2月1號 | |
前任 | 司徒拔 |
繼任 | 貝璐 |
個人資料 | |
出世 | 英屬印度北方邦坎普爾 |
死 | ![]() |
金文泰爵士,GCMG,KStJ,MA,FRGS,MRAS,JP(粵拼:gam1 man4 taai3;英文:Sir Cecil Clementi,1875年9月1號—1947年4月5號)係英國殖民地官員,同時亦係知名中國通。早年加入香港政府,其後曾經去英屬印度、英屬圭亞那同錫蘭等地做官,一九二五年擔任香港總督,一九三零年擔任海峽殖民地總督。就算在任兩地總督期間,金文泰推行過唔少有爭議嘅改革,但係佢工作效率、處事手法,同埋喺學術上嘅詣藝,外間評價甚高。
出身
[編輯]金文泰一八七五年九月一號出世,生喺印度北方邦嘅坎普爾。佢亞爸孟塔古•金文泰上校(Colonel Montagu Clementi,1839年—1919年),任職當地軍法署長,亞媽伊莎貝拉•科拉爾(Isabel Collard,1850年—1930年)。史密士爵士(Sir Cecil Clementi Smith,1840年—1916年)係佢舅父,而史密士爵士亦係殖民地官員,曾經喺1887年至1893年擔任海峽殖民地總督;另外佢太爺係出名音樂家穆齊奧·金文泰(Muzio Clementi,1752年—1832年),以彈鋼琴技術精湛而出名,亦係第一位真正創作鋼琴奏鳴曲嘅作曲家。雖然喺印度出世,但係金文泰去返英國讀書。金文泰早年喺倫敦嘅聖保祿公學讀書,後來升讀牛津大學莫德林學院。
讀大學嗰陣,金文泰修讀咗古典文學同梵文,表現出眾。一八九五年,佢攞到赫特福德獎學金,第二年首次古典文學考試,攞到一級榮譽,重分別贏到愛爾蘭獎學金同克雷文獎學金。一八九七年,金文泰攞埋博登梵文獎學金,重差啲贏埋蓋斯福德希臘散文獎。一八九八年,佢又喺人文學科入面攞到咗二級榮譽,重同時攞到文學士資格。冇幾耐,一八九九年,金文泰參加校監拉丁文散文比賽,之不過攞唔到第一。一九零一年,金文泰又攞到文學碩士資格。另外,佢又曾經獲授半院士獎學金(demyship),呢個獎學金係莫德林學院獨有,而所有得獎者都係呢個院嘅頂尖學生。
職業
[編輯]殖民地生涯
[編輯]金文泰學術極有成就,然而志不在留喺大學做學者。一八九九年攞咗學士學位之後,佢即刻考公務員試,排第四。咁嘅成績,佢有得揀去邊度。金文泰喺英國本土、印度或者各個大英帝國殖民地之中,佢揀咗去香港。以金文泰呢類咁卓越嘅學生,揀去香港做嘢,極之罕見。當時社會普遍睇法,去殖民地部東方司做嘢,比起其他工作,地位低人一等。
一八九九年,香港殖民地政府聘請金文泰做官學生,無耐嚟到香港。抵港後,金文泰即刻獲安排去大清廣東省城學粵語,但第二年大清爆發庚子事變,響一九零零年七月被迫返香港。雖然返咗香港,但金文泰仍然好快學識粵語,同年過到考試呢關,重喺一九零二年擔任中文考官。憑住佢嘅語言天份,響四年後過埋官話試。
一九零一年,金文泰獲任為助理總登記官。一八九九年,英國接管新界。當時輔政司駱克爵士,派去協助登記人口。一九零二年,佢借調到印度政府,執行特別任務。同年佢獲任太平紳士。一九零三年,金文泰又調去廣西一陣,救濟飢荒。年中冇耐又調返香港,去田土廳出任助理田土註冊處處長兼巡理府,登記土地。一九零七年,佢改任助理輔政司兼立法局執行秘書,一九零九年,佢去咗上海出席國際鴉片會議。一九一零年,當時護督梅含理爵士,任命佢做私人秘書。又無耐,一九一一年到一九一二年,升任署理輔政司,並且同時兼任行政立法兩局嘅議員。
香港公職期間,金文泰嘅才華同辦事能力,深得上司賞識。港督卜力爵士形容佢係殖民地部「東方司至有才幹嘅人,身兼思想家同學者,他日必有所成」。另一位港督盧吉爵士亦讚金文泰才華洋溢,富有同情心,而且喺香港大學成立嗰陣,提名佢出任創校校長,但係到最後冇成事。此外,金文泰喺香港嗰陣極力支持成立香港大學。一九一二年大學正式成立,佢親身撰寫拉丁文校歌[1],捐贈大批重要中國典籍,着力為大學嘅中英文化關係研究籌款。大學校方為咗多謝佢,一九一六年時建議向金文泰頒授榮譽博士學位,但係由於當時金文泰身在他方,一等就去一九二五年,即係金文泰返港出任港督之後,大學先頒贈到榮譽學位畀佢。
![](http://upload.wikimedia.org/wikipedia/commons/thumb/8/81/Queen%27s_Pier_in_1925.jpg/220px-Queen%27s_Pier_in_1925.jpg)
一九一三年,金文泰派咗去英屬圭亞那出任輔政司,任內三次署任總督。一九二二年,金文泰又改調錫蘭,出任輔政司,任內署任總督一次。一九二五年,孫文聯俄容共,所轄廣州政府,喺香港同廣州發動省港大罷工,其時港督司徒拔爵士態度強硬,對工人唔肯讓步,結果畀英國政府撤換。英國方面睇中金文泰通曉唐人文化,兼同中國一向友善,於是倫敦政府委任佢做第十七任香港總督,緩和省港局勢。金文泰喺一九二五年十一月一號抵港,正式上任港督,而佢亦係史上第二位本地官學生出身嘅港督,相當於今日政務主任。另外金文泰揀喺皇后碼頭登岸,自此以後,港督履新,以此成慣例。
當時署理港督施勳爵士,得知金文泰出任港督,好唔滿意,好驚訝。施勳爵士出任香港輔政司十五年,就算金文泰好有才華,按理都應該輪到自己擔任。故此,金文泰上任後,施勳爵士亦冇留喺政府[2]。
香港總督
[編輯]緩解工潮
[編輯]一九二五年十一月一號金文泰上任嗰陣,省港大罷工高潮已過。孫文喺廣州成立中華民國國民政府,一般叫佢做廣州政府。政府聯俄容共,同中華民國北洋政府打對臺。而大罷工就係廣州政府策劃。孫文一九二五年三月逝世以後,由容共嘅汪兆銘主理。佢首先派輔政司去廣州傾點樣解決罷工。冇耐,佢邀請國民黨要員宋子文訪港。連串訪問中,雖然金文泰同港府從無讓步,但係就對國民政府態度開放,令到兩者關係逐步修補。金文泰一直認為,「要維繫香港安寧,就有必要同國民政府保持良好關係」,因為咁佢一上任就諗辦法修補關係。得到羅旭龢同周壽臣爵士呢啲本地華人社會領袖支持之下,金文泰努力令政府取得輿論認同。其中,政府向羅旭龢發放津貼,喺香港發行報紙反共,等香港政府同國民黨嘅右翼企喺同一陣線。
一九二六年三月廣州政變,蔣介石掌權,國民黨由佢控制,解除罷工武裝,大罷工亦日見舒緩。因爲蔣氏唔再信任共產黨人士,大罷工就失政府支持。另一方面,佢又籌謀一統中國,計劃北伐,尋求外國支持,省港關係亦有轉機。是年十月十號,國民政府正式解除對香港嘅封鎖,並且解散罷工委員會,結束咗持續咗好耐嘅省港大罷工。一九二八年三月,金文泰又代表英國政府,到廣州訪問,期間正式承認咗國民政府政權,令到兩地外交關係修復返晒。
大罷工結束以後,金文泰大幅改善勞工同工廠法例,而且限制聘用童工。此外,佢重新規劃市區嘅貧民區,改善貧民嘅生活。省港大罷工一度令到香港經濟大受打擊,不過無耐恢復返轉口貿易,香港一九二七年出口船隻嘅總噸位數,直逼一九二四年罷工之前,重不斷上升。政府收入,亦屢創新高,年年收益維持喺二千萬港元以上。
妹仔問題
[編輯]總督司徒拔爵士留低妹仔問題,等金文泰解決。妹仔問題,曾一度平息。但喺金文泰任內,英國人再關注妹仔問題。當時英國保守黨執政,而英國工黨在野。下議院入便,工黨議員愛倫威爾金森(Ellen Wilkinson),要求殖民地大臣里奧•艾默里,重新審視香港政府嘅妹仔政策。因此,金文泰亦要向英國建議,點解決呢個問題。
同佢前任一樣,金文泰認為妹仔係中國傳統,妹仔往往會淪為妓女嘅講法,難以苟同。因為咁,金文泰向英國提議,將妹仔改稱「養女」就算。但係建議送出冇耐,工黨一九二九年大選勝出,上台掌政,而新任殖民地大臣帕斯菲爾德勳爵(Lord Passfield)重係費邊社成員,結果金文泰嘅建議,不爲大臣所納。大臣促請金文泰,盡早廢除妹仔制度。喺呢種情況下,金文泰唯有立例,規範妹仔嘅工作性質。另外,又唔情願咁叫全港四千名妹仔登記。不過,雖然咁,廢除妹仔都係冇乜進展,金文泰呢任內都未成事。
社會發展
[編輯]金文泰積極發展公共建設。醫療衛生方面,就好似之前咁講,佢除咗落力重建貧民區,改善衛生情況之外,重起咗九龍醫院。另外又計劃瑪麗醫院,設喺薄扶林,以大醫院去應付需求日增嘅醫療服務。此外,金文泰又喺一九二九年成立醫務衛生署,着手消除區入面嘅風土傳染病,連舊日橫行香港嘅鼠疫,都喺佢任內絕跡,而瘧疾呢類常見熱帶傳染病,亦得以控制。
至於食水方面,雖然金文泰任內着手擴建城門水塘,但係香港喺一九二九年大旱。當年四月開始,金文泰實施七級制水,日日只供水兩個鐘。天旱嘅情況,一直到九月先好返少少。嗰陣,港府成立食水供應委員會,諗辦法節制用水,重由內地調食水嚟解決水荒。但係嗰陣時仍然咁缺食水,結果搞到成廿萬名居民,走返中國避旱。事後,金文泰建議用海底水管輸水。一九三零年,全港首條海底水管落成,食水供應緊張,等以解決。
交通方面,金文泰好重視航空交通,認爲有得發展。一九二八年,政府接辦九龍嘅機場,原地係何啟爵士同區德持有嘅啟德濱,因而名爲啟德機場。同時,駐紮喺啟德機場嘅皇家空軍,年年亦得到定額津貼,只要到空軍所屬嘅飛行會,就有得拎。另外,海港局長,亦兼任民航處長,航空交通,亦有政府管理。
金文泰任內最為人津津樂道嘅事,就係中意唐文唐字,亦愛唐人文化,因而極力推動香港唐文教育。一九二七年,香港大學設中文系,重用大清遺老賴際熙同區大典等嘅翰林教授經典。但係,由於嗰陣時新文化運動乃係中國大陸嘅主流思想,結果港大設立中文系,畀魯迅一類反對傳統文化嘅學者抨擊。此外,一九二六年三月一號,金文泰成立唐文爲主嘅官立學校,卽係官立漢文中學,搵咗漢文視學官兼任校長。一九二八年,金文泰頒布《中小學漢文課程標準》,規定香港嘅漢文學校,同國民政府採用相同,都係六三三學制,等漢文學校學生,都夾到中國學校嘅課程。
新界事務
[編輯]金文泰早年長期喺新界做嘢,所以同新界居民嘅關係,好過好多總督。喺佢上任一個月之後,金文泰就即刻訪問新界,當地居民熱烈歡迎。一九二六年,金文泰廢除新界地區唔合理嘅補地價政策,喺同年九月一號,新界鄉紳罕有咁為港督祝壽。佢哋除咗喺大埔舉行盛大壽宴外,鄉議局又特登呈上《金文泰制軍五一賀壽序文》,以作紀念。
另一方面,金文泰任內亦致力將新界改成永久割讓畀英國。一九二六年一月,即係省港大罷工期間,佢向殖民地部話要保住新界。其後一九二七年,金文泰趁國民政府北伐嗰陣,希望將新界轉爲永租地,但係嗰陣時嘅英國駐華大使藍浦生爵士,擔心咁做會激起中國反殖民主義情緒,因而拒絕。到咗一九三零年,英國交還威海衛租借地,金文泰亦即刻向倫敦建議,英方應借機會延長新界,但係建議始終不爲所納。新界租約始終冇法任內延長,金文泰好失望。
政治革新
[編輯]政治改革上,金文泰革新兩局。一九二六年,佢委任立法局非官守議員周壽臣爵士,兼任行政局非官守議員,以補遮打爵士逝世後懸空嘅席位。周壽臣爵士,係香港史上,首位華人行政局議員,但係實際上,建議周壽臣爵士入行政局,英延極力反對。嗰時嘅外務大臣奧斯汀•張伯倫爵士同殖民地大臣里奧•艾默里都認為,如果周壽臣爵士入局,有可能會洩漏機密,但係金文泰就反駁,歐籍議員都可能泄密,而行政局甚少講到機密。最尾,英廷批准建議,但係喺周壽臣爵士入局嗰陣,英廷又同時規定,行政局議員以後都唔可以掂到機密文件。
立法局方面,金文泰任內亦逐步增加唔同代表。一九二七年,金文泰委任布力架做立法局非官守議員,葡籍人士第首次喺立法局有代表議席。一九二九年,金文泰委任華人曹善允為立法局非官守議員,令九龍有首個代表。綜合嚟講,一九二九年嗰陣,立法局嘅官守議員人數加咗兩名,而非官守議員,由六名加到八名,當中三名係華人,分別係周壽臣、羅旭龢同曹善允。雖然人數有所增加,但係總督仍然有定奪之權。
一九二九年,嗰時嘅海峽殖民地總督克里福爵士突然因病提早退休,金文泰就臨時喺同年十一月廿號,獲任接替克里福爵士。金文泰跟住喺一九三零年二月一號,唔情願咁離開香港,結束佢短暫,但係評價唔錯嘅任期。
海峽殖民地總督
[編輯]![](http://upload.wikimedia.org/wikipedia/commons/thumb/a/af/Former_People%27s_Association_headquarters_at_old_Kallang_Airport%2C_Singapore.jpg/220px-Former_People%27s_Association_headquarters_at_old_Kallang_Airport%2C_Singapore.jpg)
做三洲府總督嗰陣,金文泰做咗唔少有遠見嘅改革。有鑑於馬來亞政府權力過份集中,加上海峽殖民地總督又身兼馬來亞高級專員,咁令到金文泰工作非常繁重。因為咁,金文泰盡可能咁下放唔少屬於中央嘅權力畀地方,以助地方施政靈活。另一方面,金文泰又積極咁畀本土人士擔任殖民地政府嘅行政工作,同時又好推廣馬來西亞文化同馬來語,重將呢樣嘢編入當地嘅教育課程入面。但係,金文泰嘅革新就得唔到當地嘅本土人同華人嘅支持,結果促使佢要對改革做出妥協。由於阻力太大,上述嘅改革始終冇法喺任內順利完成。
至於公共建設方面,金文泰任內曾經提出要喺星架坡起一座「世界最大、最好、同最重要嘅機場」,取代唔夠使嘅實里達機場。金文泰嘅建議,促使興建加冷機場,最終喺一九三七年啟用,即係金文泰卸任之後。呢座機場,譽為「大英帝國最好嘅機場」,喺一九五五年巴耶利峇機場落成之前,一直係區入面最重要嘅機場。此外,金文泰又喺一九三三年主持咗新加坡嘅 克里福碼頭(Clifford Pier)開幕儀式,但係由於新碼頭棄用舊名「莊士敦碼頭」,結果開幕禮遭到部份商人杯葛。
晚年
[編輯]星架坡公職期間,金文泰患咗糖尿病,結果促使佢喺一九三四年十月十八號英國休假嗰陣,宣佈提早退休。退休後嘅金文泰定居英國,主力寫作同學術研究。另外一九四零年到一九四一年間,佢出任綢布商人同業公會主席(Master of Mercers' Company)。晚年嘅金文泰住喺白金漢郡海威科姆(High Wycombe)附近嘅霍爾默閣(Holmer Court)。一九四七年四月五號,佢心臟衰竭死喺嗰度,終年七十一歲,遺體火化之後,安葬喺白金漢郡嘅潘街教堂(Penn Street Church)。
一九四七年九月九號估值,有遺產三千九百八十三英鎊十九仙令兩便士。
學術成就
[編輯]![](http://upload.wikimedia.org/wikipedia/commons/2/21/SIRCECILCLEMENTIHKU.jpg)
金文泰係皇家亞洲學會會員,鍾愛唐人文化,除咗熟習廣東話同官話之外,又通曉唐文詩詞,而且曾經翻譯《粵謳》(Cantonese Love Songs)等書。此外,金文泰好叻書法,家陣香港青山禪院入面,有個「香海名山」牌坊,就係金文泰兩次訪問青山禪院之後題嘅。另外,金文泰又鍾愛歷史,寫過《華人在英屬圭亞那》同埋《英屬圭亞那憲制歷史》等書,呢啲書到而家都好學術價值。金文泰係少有嘅學者總督,佢嘅學術詣藝備受景仰,當中,知名詩人泰戈爾喺訪問香港嗰陣,甚至讚金文泰係「我喺東方遇過最有修養嘅歐洲人」。
除咗文藝,金文泰夫婦鍾意四圍遊。佢哋去過晒中國咁多個省,又深入過印度等地,重寫咗多本旅遊書。皇家地理學會表彰佢貢獻,一九一二年頒贈卡思伯特皮克獎(Cuthbert Peek Award),以作紀念。至於香港,金文泰夫婦亦遊歷各處郊野,而家新界唔少山徑,最先都係由佢哋開辟返嚟。
屋企
[編輯]金文泰嘅老婆叫佩內洛普•露絲•科博德•艾爾斯,MBE(Penelope Rose Cobbold Eyres,1889年—1970年),係海軍上將C•J•艾爾斯(Admiral C. J. Eyres)個女。金文泰夫人最初因為亞爸派駐香港,而住喺香港,期間識咗金文泰。一九一二年四月十六號,兩人喺香港結婚。
金文泰夫婦關係非常好,金文泰夫人亦一直全力支持金文泰嘅工作。金文泰夫婦有一個仔兩個女,個仔克雷斯韋爾•金文泰(Cresswell Clementi,1918年—1981年)曾經喺皇家空軍做空軍少將。至於克雷斯韋爾個仔、金文泰個孫大衛•金文泰爵士(Sir David Clementi,1949年2月25號—)就係英國保誠保險嘅主席。
部份著作
[編輯]- 金文泰爵士著作:
- Cantonese Love Songs
- Notes on a journey recently undertaken through the interior of China,一九零二年
- Pervigilium Veneris,一九一一年
- Summary of Geographical Observations taken during a journey from Kashgar to Kowloon (1907-8),Hongkong:Noronha,一九一一年
- Bibliographical and Other Studies on the Pervigilium Veneris,Oxford: B. H. Blackwell or London: Humphrey Milford,一九一三年
- The Chinese in British Guiana,Georgetown:Argosy,一九一五年
- Elements in Analysis of Thought,B. Blackwell,一九三三年
- A Constitutional History of British Guiana,London:Macmillan,一九三七年
- 金夫人著作:
- Through British Guiana To The Summit Of Roraima,T. Fischer Unwin,一九二零年
榮譽
[編輯]殊榮
[編輯]- M.A. (一九零一年)
- J.P. (一九零二年)
- C.M.G. (一九一六年)
- K.C.M.G. (一九二六年)
- K.St.J. (一九二六年)
- G.C.M.G. (一九三一年)
- F.R.G.S.
- M.R.A.S.
榮譽學位
[編輯]以佢命名嘅事物
[編輯]香港
[編輯]- 金文泰中學:位於香港島北角,原本係金文泰喺一九二六年創立嘅官立漢文中學。學校喺一九五一年改名金文泰,金夫人得知此事後,一九五八年一月四號,由英國寄贈「金文泰爵士紀念杯」一座,以作紀念。
- 金督馳馬徑:位於香港島東區郊區,聽講係金文泰喺香港嗰陣,成日喺呢度騎馬。
- 金夫人馳馬徑:位於香港仔水塘,用金文泰夫人命名。
新加坡
[編輯]馬來西亞
[編輯]參考
[編輯]攷
[編輯]- ↑ "Sir Cecil Clementi and the University of Hong Kong". Archives & Manuscripts at the Bodleian Library University of Oxford.
{{cite web}}
: CS1 maint: url-status (link) - ↑ Welsh, Frank (1993). A History of Hong Kong. London: HarperCollins Publishers.
- ↑ 〈金文泰 - 檔案 - 名譽博士學位畢業生 - 香港大學名譽博士學位畢業生〉 (繁體中文). 香港大學.
書籍
[編輯]- Who was Who, 1941-1950,A & C Black。
- Excellency : the governors of Hong Kong,Russell Spurr,Hong Kong:FormAsia,1995年。
- Oxford Dictionary of National Biography,Shiona M. Airlie,Oxford University Press,5th edition,2004年。
- A History of Hong Kong,Frank Welsh,HarperCollins。
- Sir Cecil Clementi,SingaporeInfopedia
- Straits Settlements,WorldStatesmen.org
- Hong Kong,WorldStatesmen.org
- 第十七任 金文泰,香港二十八總督,劉大年,1997年。
- 邁步向前 - 穩定嘅食水供應時期,香港水務署
- 金文泰爵士略傳,金文泰中學
- 略談魯迅之《略談香港》
睇埋
[編輯]官銜 | ||
---|---|---|
上一任 譚臣 |
署理香港輔政司 1911年 |
下一任 巴恩斯 |
上一任 蒲魯賢 |
署理香港輔政司 1911年–1912年 |
下一任 施勳 |
上一任 曼寧爵士 |
署理錫蘭總督 1925年 |
下一任 愛德華•亞歷山大(署理) |
上一任 施勳爵士(署理) |
第17任香港總督 1925年–1930年 |
下一任 修頓爵士(署理) |
上一任 克里福爵士 |
海峽殖民地總督 1930年–1934年 |
下一任 珊頓爵士 |