陳光榮
陳光榮 | |
---|---|
![]() | |
製作人 | |
英文名 | Punk Chan Kwong-wing |
國籍 | ![]() |
出世 | ![]() | 1967年6月15號
職業 | 作曲家、音樂家 |
語言 | 粵語、英語、國語 |
教育程度 | 中學 |
母校 | 天主教伍華小學 天主教伍華書院 |
配偶 | 圈外人(2011年結婚) |
仔女 | 1仔 |
音樂類 | 電影音樂 電子音樂 伴奏 |
活躍年代 | 1987年至今 |
網路電影資料庫(IMDb)資訊 |
陳光榮(英文:Punk Chan Kwong-wing,1967年6月15號—)係香港作曲人、前樂隊Fundamental成員。佢亦係香港歌手周柏豪、馮曦妤、鄭伊健嘅歌曲監製。周柏豪同馮曦妤亦做過陳光榮錄音室嘅工作人員。馮曦妤主要做和音。佢為多套電影做過配樂,主要合作導演係劉偉強。佢憑《風雲之雄霸天下》、《十月圍城》同《武俠》攞過三次香港電影金像獎最佳原創音樂獎。
背景
[編輯]陳光榮早年喺九龍城出世同成長[註 1],分別住過喺嘉林邊道同城南道,讀過天主教伍華小學同天主教伍華書院[註 1],同Fundamental其餘成員(除胡玉儀之外)都係同校同學[註 1]。讀書期間活躍校內歌唱比賽,主要為比賽伴奏[註 1]。又參與過校際音樂節活動[註 1]。佢10歲開始學彈結他[註 1],自1987年起為唔同歌手作曲。喺1990年代期間,佢大部份作品都係同鄭伊健合作,因為幫鄭伊健創作嘅歌曲走紅,令陳光榮嘅知名度大大提升。最輝煌時期就係喺1997年嘅鄭伊健演唱會做音樂總監,代表作就係古惑仔或其它電影主題曲或插曲,《友情歲月》更成為金曲作品。1990年代後期更跨過電影界,創作電影配樂。喺2000年代期間,佢就轉為同周柏豪合作。而家擁有自己成立嘅Click Music公司,負責音樂創作同統籌。佢入室弟子有周柏豪等人。
其他資料
[編輯]陳光榮自中二開始用「Comfort」呢個英文名[註 2],靈感來自當年買嘅一對「Adidas」運動鞋嘅型號[註 2]。由於朋友同其他學校嘅學生睇見佢着「Comfort」鞋[註 2],於是叫佢做「Comfort佬」[註 2],慢慢用咗佢做洋名。而「Punk」呢個英文名亦來自中學年代[註 2]。陳光榮喺高中時係學校游泳校隊成員[註 2];成日練習游泳嘅佢被池水嘅消毒劑等化學物染成為睇似金髮嘅學生[註 2]。同學知道佢參與樂隊活動[註 2],認為佢嘅形象似玩搖滾樂(Punk)嘅人[註 2],所以稱呼佢做「Punk」[註 2]。嗰個名一直用到而家。
個人生活
[編輯]喺2000年左右,陳光榮曾經同藝人林嘉欣拍拖大約一年,但已經分手。陳光榮喺2011年同圈外女性結婚,而家有一個仔。