தென் சென்னை மக்களவைத் தேர்தல் முடிவுகள் 2024 (South Chennai Lok sabha election results 2024)

சென்னை தெற்கு மக்களவைத் தேர்தல் தகவல்

சென்னையில் உள்ள மூன்று மக்களவைத் தொகுதிகளில் ஒன்று சென்னை தெற்கு மக்களவைத் தொகுதி. தமிழகத்தில் உள்ள 39 தொகுதிகளில் 3ஆவது தொகுதி இதுவாகும்.

1957இல் இந்த தொகுதி உருவாக்கப்படும் போது மெட்ராஸ் தெற்கு என்று அழைக்கப்பட்டது. பல முக்கிய அரசியல் பிரபலங்கள் இங்கிருந்து நாடாளுமன்றத்துக்கு சென்றுள்ளதால் எப்போது நட்சத்திர தொகுதியாகவே உள்ளது.

மத்தியில் நிதியமைச்சராக பணியாற்றிய டிடி கிருஷ்ணமாச்சாரி, நாஞ்சில் மனோகரன், அறிஞர் அண்ணாதுரை, முரசொலி மாறன், ஆர்.வெங்கட்ராமன், வைஜெயந்தி மாலா, டிஆர்.பாலு உள்ளிட்டவர்கள் இந்த சென்னை தெற்கு தொகுதியில் நின்று வெற்றி பெற்றுள்ளனர்.

2008ஆம் ஆண்டில் நடைபெற்ற தொகுதி மறுசீரமைப்புக்கு முன்னர் இத்தொகுதியில், தியாகராய நகர், திருவல்லிக்கேணி, மயிலாப்பூர், சைதாப்பேட்டை, ஆலந்தூர், தாம்பரம் ஆகிய சட்டசபைத் தொகுதிகள் இடம் பெற்றன.

தொகுதி மறு சீரமைப்புக்குப் பின்னர் இந்த மக்களவைத் தொகுதிக்குள் விருகம்பாக்கம், சைதாபேட்டை, தியாகராய நகர், மயிலாப்பூர், வேளச்சேரி, சோழிங்கநல்லூர் ஆகிய சட்டமன்ற தொகுதிகள் வருகின்றன.

தென் சென்னை மக்களவைத் தொகுதியில் காங்கிரஸ் கட்சி 4 முறையும், திமுக 9 முறையும், அதிமுக 3 முறையும் இந்த தொகுதியில் வெற்றி பெற்றுள்ளன.

1957 டி.டி.கிருஷ்ணமாச்சாரி காங்கிரஸ்
1962 நாஞ்சில் மனோகரன் திமுக
1967 அறிஞர் அண்ணா திமுக
1967 (இ/தே) முரசொலி மாறன் திமுக
1971 முரசொலி மாறன் திமுக
1977 ஆர்.வெங்கட்ராமன் காங்கிரஸ்
1980 ஆர்.வெங்கட்ராமன் காங்கிரஸ்
1984 வைஜெயந்திமாலா காங்கிரஸ்
1989 வைஜெயந்திமாலா காங்கிரஸ்
1991 ஆர்.ஸ்ரீதரன் அதிமுக
1996 டி.ஆர்.பாலு திமுக
1998 டி.ஆர்.பாலு திமுக
1999 டி.ஆர்.பாலு திமுக
2004 டி.ஆர்.பாலு திமுக
2009 சி.ராஜேந்திரன் அதிமுக
2014 ஜெ.ஜெயவர்தன் அதிமுக
2019 தமிழச்சி தங்க பாண்டியன் திமுக

2019 வெற்றி விவரம்

2019ஆம் ஆண்டு நடைபெற்ற மக்களவைத் தேர்தலில் திமுக வேட்பாளர் தமிழச்சி தங்கபாண்டியன் 5 லட்சத்து 64 ஆயிரத்து 872 வாக்குகள் (50.28 %) பெற்று வெற்றி பெற்றார்.

வேட்பாளர்களின் வாக்கு சதவீதம்!

தமிழச்சி தங்கபாண்டியனை எதிர்த்து போட்டியிட்ட அதிமுக வேட்பாளர் ஜெ.ஜெயவர்தன் 3 லட்சத்து 2 ஆயிரத்து 649 வாக்குகள் (26.94%) பெற்றார்.

கவனம் ஈர்த்த மக்கள் நீதி மய்யம்

கமல்ஹாசன் தலைமையில் மக்கள் நீதி மய்யம் கட்சி 2018ஆம் ஆண்டு தொடங்கப்பட்ட நிலையில் அதற்கு அடுத்த ஆண்டு நடைபெற்ற மக்களவைத் தேர்தலில் அக்கட்சி போட்டியிட்டது. குறிப்பாக சென்னை தெற்கு தொகுதியில் அக்கட்சி வேட்பாளர் ஆர்.ரங்கராஜன் 1 லட்சத்து 35 ஆயிரத்து 465 வாக்குகள் பெற்றார். அதாவது 12.06 சதவீத வாக்குகளைப் பெற்றார். போட்டியிட்ட முதல் தேர்தலிலேயே கணிசமான வாக்குகளை கமல்ஹாசனின் கட்சி பெற்றது கவனம் பெற்றது. சென்னை, கோவை ஆகிய நகர்ப்புறங்களில் அக்கட்சிக்கு சற்று அதிக வாக்குகள் கிடைத்தன.

நாம் தமிழர் கட்சி வேட்பாளர் ஏ.ஜே.ஷெரின் 50ஆயிரத்து 222 வாக்குகள் பெற்றார்.

சுயேச்சையாக களமிறங்கிய அமமுக

2019 மக்களவைத் தேர்தலின் போது டிடிவி தினகரன் தொடங்கிய அம்மா மக்கள் முன்னேற்றக் கட்சி பதிவு செய்யப்படாமல் இருந்தது. நீதிமன்ற அனுமதி பெற்று அக்கட்சி வேட்பாளர்கள் சுயேச்சையாக வேட்பு மனு தாக்கல் செய்திருந்த போதும் ஒரே சின்னம் வழங்க உத்தரவிடப்பட்டிருந்தது. தென் சென்னை தொகுதியில் அமமுக சார்பில் முன்னாள் அமைச்சர் இசக்கி சுப்பையா போட்டியிட்டார். 29 ஆயிரத்து 522 வாக்குகள் (2.63 %) பெற்றார்.