வேலூர் மக்களவைத் தேர்தல் முடிவுகள் 2024 (Vellore constituency lok sabha election results 2024)

வேலூர் மக்களவைத் தேர்தல் தகவல்

வேலூர் தொகுதியில் பல்வேறு சமூகத்தினரும் அதிகளவு வசித்து வருகின்றனர். இருப்பினும் இஸ்லாமியர்கள் அதிகம் வசிக்கும் பகுதி என்பதால் முஸ்லிம் லீக் கூட்டணி இந்த தொகுதியில் பலமுறை வெற்றி கண்டுள்ளது. தொகுதி மறுசீரமைப்புக்கு முன் இந்த மக்களவைத் தொகுதியில், காட்பாடி, குடியாத்தம், பேரணாம்பட்டு (தனி), அணைக்கட்டு, வேலூர், ஆரணி ஆகிய சட்டமன்ற தொகுதிகள் இடம் பெற்றிருந்தன.

தொகுதி மறு சீரமைப்புக்கு பின் வேலூர், அணைக்கட்டு, கே. வி. குப்பம் (தனி), குடியாத்தம் (தனி), வாணியம்பாடி, ஆம்பூர் ஆகிய சட்டமன்ற தொகுதிகள் இடம்பெற்றுள்ளன. 17 மக்களவைத் தேர்தல்களை சந்தித்துள்ள இந்த தொகுதியில் இதுவரை திமுக கூட்டணி கட்சிகளே அதிகம் வெற்றி பெற்றுள்ளன. திமுக மற்றும் காங்கிரஸ் கட்சிகள் இதுவரை தலா 6 முறை இந்த தொகுதியில் வென்றுள்ளன. பாமக மற்றும் அதிமுக ஆகிய கட்சிகள் தலா 2 முறை வென்றுள்ளன.

மக்களவைத் தேர்தல் 1951 - ராமச்சந்தர் & எம். முத்துகிருஷ்ணன் - காமன்வீல் கட்சி & காங்கிரசு
மக்களவைத் தேர்தல் 1957 - எம். முத்துகிருஷ்ணன் & என். ஆர். முனியசாமி - காங்கிரஸ்
மக்களவைத் தேர்தல் 1962 - அப்துல் வாகித் - காங்கிரஸ்
மக்களவைத் தேர்தல் 1967 - குசேலர் - திமுக
மக்களவைத் தேர்தல் 1971 - ஆர். பி. உலகநம்பி - திமுக
மக்களவைத் தேர்தல் 1977 - வி. தண்டாயுதபாணி - காங்கிரஸ்
மக்களவைத் தேர்தல் 1980 - ஏ.கே.ஏ. அப்துல் சமது - சுயேட்சை
மக்களவைத் தேர்தல் 1984 - ஏ.சி.சண்முகம் - அதிமுக
மக்களவைத் தேர்தல் 1989 - ஏ.கே.ஏ. அப்துல் சமது - காங்கிரஸ்
மக்களவைத் தேர்தல் 1991 - அக்பர் பாஷா - காங்கிரஸ்
மக்களவைத் தேர்தல் 1996 - பி. சண்முகம் (வேலூர்) - திமுக
மக்களவைத் தேர்தல் 1998 - என். டி. சண்முகம் - பாமக
மக்களவைத் தேர்தல் 1999 - என். டி. சண்முகம் - பாமக
மக்களவைத் தேர்தல் 2004 - கே. எம். காதர் மொகிதீன் - திமுக
மக்களவைத் தேர்தல் 2009 - எம். அப்துல் ரஹ்மான் - திமுக
மக்களவைத் தேர்தல் 2014 - பி. செங்குட்டுவன் - அதிமுக
மக்களவைத் தேர்தல் (ஆகஸ்ட்)2019 - கதிர் ஆனந்த் - திமுக

இந்த தொகுதியில் கடந் 2019 ஆம் ஆண்டு மக்களவைத் தேர்தல், ஏப்ரல் 18 ஆம் தேதி நடைபெறும் என அறிவிக்கப்பட்டது. ஆனால் திமுக வேட்பாளர் அலுவலகத்தில் இருந்து கணக்கிடப்படாத பெரும் தொகை கைப்பற்றப்பட்டது. இதையடுத்து தேர்தல் ஆணையத்தின் பரிந்துரையை ஏற்று இத்தொகுதிக்கான தேர்தலை ரத்து செய்து அப்போதைய குடியரசு தலைவர் ராம்நாத் கோவிந்த் ஆணையிட்டார்.

இதையடுத்து 2019 ஆம் ஆண்டு ஆகஸ்ட் மாதம் வேலூர் தொகுதிக்கு தேர்தல் நடத்தப்பட்டது. இதில் திமுக வேட்பாளர் கதிர் ஆனந்த் வெற்றி பெற்றார். திமுக வேட்பாளரான கதிர் ஆனந்த 4 லட்சத்து 85 ஆயிரத்து 340 வாக்குகள் பெற்று வெற்றி பெற்றார். அதிமுக சார்பில் போட்டியிட்ட ஏசி சண்முகம் 4 லட்சத்து 77 ஆயிரத்து 199 வாக்குகள் பெற்று சொற்ப வித்தியாசத்தில் திமுக வேட்பாளர் கதிர் ஆனந்திடம் வெற்றியை பறிகொடுத்தார்.

அவருக்கு அடுத்தப்படியாக நாம் தமிழர் கட்சியின் சார்பில் போட்டியிட்ட தீபலட்சுமி 26 ஆயிரத்து 995 வாக்குகள் பெற்றார். நோட்டாவுக்கு 9 ஆயிரத்து 417 வாக்குகள் கிடைத்தது. இந்த தொகுதியில் கடந்த 2014 மக்களவைத் தேர்தலின் போது 6 லட்சத்து 47 ஆயிரத்து 299 ஆண் வாக்காளர்களும் 6 லட்சத்து 58 ஆயிரத்து 547 பெண் வாக்காளர்களும், மூன்றாம் பாலினத்தவர்கள் 20 பேரும் என மொத்தம் 13 லட்சத்து 05 ஆயிரத்து 866 வாக்காளர்கள் இருந்தனர்.

கடந்த 2019 ஆம் ஆண்டு நடைபெற்ற மக்களவைத் தேர்தலில் 6 லட்சத்து 90 ஆயிரத்து 154 ஆண் வாக்காளர்களும், பெண் வாக்காளர்கள் 7 லட்சத்து 17 ஆயிரத்து 581 பேரும், மூன்றாம் பாலினத்தைச் சேர்ந்த வாக்காளர்கள் 82 பேர் என மொத்தம் 14 லட்சத்து 07 ஆயிரத்து 817 பேரும் இருந்தனர். இந்த 5 ஆண்டுகள் மொத்த வாக்காளர்களின் எண்ணிக்கை மேலும் அதிகரித்திருக்கும் என எதிர்பார்க்கப்படுகிறது.