நீலகிரி மக்களவைத் தேர்தல் முடிவுகள் 2024 (Nilgiris Lok sabha election results 2024)

நீலகிரி மக்களவைத் தேர்தல் தகவல்

தமிழ்நாட்டில் உள்ள 39 நாடாளுமன்றத் தொகுதிகளுள் 19-வது தொகுதியாக நீலகிரி விளங்குகிறது. இது ஒரு தனித் தொகுதி ஆகும். இந்த தொகுதியில் உதகமண்டலம், குன்னூர் (தனி), கூடலூர் ஆகிய 3 சட்டமன்றத் தொகுதிகளும், அவிநாசி (தனி), மேட்டுப்பாளையம், பவானிசாகர் (தனி) ஆகிய 6 சட்டமன்றத் தொகுதிகளை கொண்டிருக்கிறது. இதில் அவிநாசி (தனி) திருப்பூர் மாவட்டத்திலும், பவானிசாகர் (தனி) ஈரோடு மாவட்டத்திலும், மேட்டுப்பாளையம் கோவை மாவட்டத்திலும் உள்ளது என்பது மிக முக்கியமாக கவனிக்க வேண்டியது ஆகும். இதை ஏன் முக்கியமாக கவனிக்க வேண்டிய விஷயம் என்றால், நீலகிரி நாடாளுமன்றத் தொகுதியின் வெற்றியை தீர்மானிப்பதே இந்த மூன்று வெளிமாவட்ட தொகுதிகள் தான். அதனால்தான் எப்பொழுதும் உள்ளூர்காரர்களை விட வெளியூர்காரர்களே இந்த தொகுதியில் அதிகம் வெற்றி பெற காரணம்.

நீலகிரி மக்களவை தொகுதியில் மொத்தம் 12,49,740 வாக்காளர்கள் உள்ளனர். இவர்களில் 6,57,991 ஆண்களும், 6,91,684 பெண்களும், 65 மூன்றாம் பாலினத்தவர்களும் இருக்கிறார்கள். நீலகிரி மக்களவை தொகுதி ஒருகாலத்தில் காங்கிரஸின் கோட்டையாக விளங்கியது. இங்கு 7 முறை காங்கிரஸ் வெற்றி பெற்று நாடாளுமன்றதுக்கு சென்றிருக்கிறது. பாஜக 2 முறை வெற்றி பெற்றிருக்கிறது. பின்னர் மெல்ல மெல்லமாக இங்கு திராவிடக் கட்சிகள் தங்கள் கொடியை நாட்டி விட்டன.

நீலகிரியை பொறுத்தவரை அங்கு தேயிலை தோட்டங்கள் அதிகம். எனவே பிரதான தொழில் தேயிலை விவசாயமாகவே உள்ளது. மலைக் காய்கறி விவசாயமும் இருக்கிறது. நீலகிரிக்கு வரும் வருவாயில் சுற்றுலா துறைக்கே முதலிடம் உள்ளது. ஆனால் வருடத்துக்கு 3 மாதங்கள் மட்டுமே சுற்றுலா மூலம் வருவாய் கிடைக்கிறது. அதே சமயத்தில், சுற்றுலா துறை ஒருபுறம் வளர்ந்தாலும் மறுபுறம் அதுவே விவசாயத் துறையின் வீழ்ச்சிக்கு காரணமாகி வருகிறது. சுற்றுலாத் துறைக்காக மேற்கொள்ளப்படும் கட்டுமானத் திட்டங்கள் தேயிலை தோட்டங்கள் மீதே செய்யப்படுவதால் தேயிலை விவசாயம் அடி வாங்கி வருகிறது. இதனால் தேயிலை விவசாயத்தில் இருந்து பலர் தற்போது வெளியேறி வருகின்றனர். உள்ளூர்வாசிகள் பலரும் வெளி மாவட்டங்களில் தான் பணிபுரிந்து வருகின்றனர். இது இங்கு முக்கிய பிரச்சினையாக உள்ளது.

2009 மக்களவைத் தேர்தலில் திமுக வேட்பாளர் ஆ. ராசா, மதிமுக வேட்பாளரை பெருவாரியான வாக்குகள் வித்தியாசத்தில் தோற்கடித்து வெற்றி வாகை சூடினார். அவர் அந்த தேர்தலில் 3,16,802 வாக்குகளை பெற்றிருந்தார். ஆனால், 2014 மக்களவைத் தேர்தலில் நிலைமை தலைகீழாக மாறியது. திமுக வேட்பாளர் ஆ. ராசா அதிமுக வேட்பாளரிடம் தோல்வி அடைந்தார். கிட்டத்தட்ட 1 லட்சத்துக்கும் மேலான வாக்கு வித்தியாசத்தில் அவர் தோல்வி அடைந்தார். அந்த சமயத்தில் 2 ஜி முறைகேடு வழக்கில் ஆ. ராசா குற்றம்சாட்டப்பட்டிருந்ததே இந்த தோல்விக்கு காரணமாக கருதப்படுகிறது. ஆனால், அதற்கு அடுத்த தேர்தலான 2019 மக்களவைத் தேர்தலில் ஆ. ராசா அமோக வெற்றி பெற்றார். அவர் 5,47,832 வாக்குகளை பெற்ற நிலையில், அவரை எதிர்த்து போட்டியிட்ட அதிமுக வேட்பாளர் வெறும் 3,42,009 வாக்குகளையே பெற்றிருந்தார்.

2009 மக்களவைத் தேர்தலுக்கு முந்தைய 1957 முதல் 2004 வரை நடந்த மக்களவைத் தேர்தல்களில் 7 முறை காங்கிரஸும், 2 முறை பாஜகவும் வெற்றி பெற்றிருக்கிறது. தலா ஒரு முறை மட்டுமே திமுகவும், அதிமுகவும் வெற்றி பெற்றிருக்கின்றன.