சேலம் மக்களவைத் தேர்தல் முடிவுகள் 2024 (Salem lok sabha election results 2024)

சேலம் மக்களவைத் தேர்தல் தகவல்

தமிழ்நாட்டின் 15வது மக்களவை தொகுதியாக சேலம் அமைந்திருக்கிறது. சேலம் என்றாலே மாம்பழம் தான் பலரது நினைவில் தோன்றும். இரும்பாலை, வெள்ளி கொலுசு பட்டறைகள், ஜவுளி உற்பத்தி நிலையங்கள், வெல்லம், மரவள்ளிக்கிழங்கு மாவு தயாரிப்பு ஆகியவை முக்கியத்துவம் பெற்றுள்ளன. இதுதவிர வேளாண்மையும் முக்கிய பங்கு வகிக்கிறது. மேலும் மக்னீசியம், பாக்சைட் ஆகியவை வெட்டி எடுக்கப்படுகின்றன. சேலம் எஃகு ஆலை தேசிய அளவில் புகழ்பெற்றது. இது இந்திரா காந்தி பிரதமராக இருந்த போது தொடங்கி வைக்கப்பட்டது.

இந்த ஆலையை விரிவுபடுத்தும் திட்டத்திற்கு ஒப்புதல் கிடைத்தும் இதுவரை முழுமை பெறவில்லை. இதுதொடர்பான கோரிக்கை தொடர்ந்து முன்வைக்கப்பட்டு வருகிறது. எடப்பாடி பழனிசாமி ஆட்சியில் சேலம் - சென்னை 8 வழிச் சாலை திட்டம் அறிவிக்கப்பட்டது. ஆனால் இது விவசாய நிலங்களை ஆக்கிரமித்து செல்வதால் விவசாயிகள் பெரிதும் பாதிக்கப்படுவர் என்று குற்றச்சாட்டுகள் எழுந்தன. இந்த திட்டத்தை முன்னெடுக்கும் அரசியலும் சேலத்தை சுற்றி கொண்டிருக்கிறது. சேலம் மக்களவை தொகுதியின் கீழ் ஓமலூர், எடப்பாடி, சேலம் மேற்கு, சேலம் வடக்கு, சேலம் தெற்கு, வீரபாண்டி ஆகிய 6 சட்டமன்ற தொகுதிகள் இடம்பெற்றுள்ளன.

தற்போது 15,80,013 வாக்காளர்கள் இருக்கின்றன. சேலம் திராவிட கழக அரசியலின் மிக முக்கியமான இடமாக பார்க்கப்படுகிறது. மேலும் ராஜாஜி, சென்னை மாகாண முதலமைச்சர் பி.சுப்பராயன், இவரது மகன் மோகன் குமாரமங்கலம், பாஜகவை சேர்ந்த ரங்கராஜன் குமாரமங்கலம், சுதந்திர போராட்ட வீரர் வரதராஜுலு நாயுடு, வாழப்பாடி ராமமூர்த்தி, வீரபாண்டி ஆறுமுகம் உள்ளிட்ட தலைவர்களின் அரசியலுக்கு அச்சாரம் போட்டுள்ளது. முன்னாள் முதலமைச்சரும், அதிமுகவின் பொதுச் செயலாளருமான எடப்பாடி பழனிசாமியின் சொந்த தொகுதி சேலம் ஆகும்.

சேலத்தில் இருந்து பெங்களூரு அருகில் இருக்கிறது. எனவே பெங்களூருவில் உள்ள ஐடி நிறுவனங்கள் பலவும் புதிய முதலீடுகளுக்கு சேலத்தை நோக்கி நகரும் சூழல் ஏற்பட்டுள்ளது. சில நிறுவனங்கள் கால் தடம் பதித்துள்ள நிலையில், இந்த விஷயத்தில் மாநில அரசின் கவனம் சற்று அதிகம் தேவைப்படுவதாக கூறுகின்றனர். சேலம் மக்களவை தொகுதியில் மெட்ரோ ரயில் சேவை, சென்ட் தொழிற்சாலை, ஓமலூர் - பனமரத்துப்பட்டி பூக்கள் சாகுபடி, பதப்படுத்தும் கிடங்குகள் உள்ளிட்டவை பெரும் எதிர்பார்ப்பில் இருக்கின்றன.

1952ஆம் ஆண்டு தொடங்கி தற்போது வரை சேலம் மக்களவை தொகுதிக்கு 17 தேர்தல்கள் நடந்துள்ளன. இதில் அதிகபட்சமாக காங்கிரஸ் கட்சி 7 முறை வெற்றி பெற்றுள்ளது. இதில் குறிப்பிடத்தக்க தலைவர்களாக எஸ்.வி.ராமசாமி, ரங்கராஜன் குமாரமங்கலம், கே.வி.தங்கபாலு ஆகியோரை சொல்லலாம். இதற்கு அடுத்தபடியாக திமுக, அதிமுக ஆகிய கட்சிகள் தலா 4 முறை வெற்றி பெற்றுள்ளன. தமாகா ஒருமுறையும், சுயேட்சையாக நின்று வாழப்பாடி ராமமூர்த்தி ஒருமுறையும் வென்றுள்ளனர். கடைசியாக நடந்த 2019 மக்களவை தேர்தலில் திமுக சார்பில் போட்டியிட்டு எஸ்.ஆர்.பார்த்திபன் வெற்றி பெற்றார்.

சேலம் மாவட்ட திமுக பொறுப்பாளராக கே.என்.நேரு இருக்கிறார். இவரது தலைமையில் மீண்டும் தொகுதியை கைப்பற்ற அக்கட்சி காய் நகர்த்தி வருகிறது. மறுபுறம் எடப்பாடி பழனிசாமியின் சொந்த தொகுதி என்பதால் இழந்த செல்வாக்கை மீட்டு சேலம் மக்களவை தொகுதியை மீண்டும் பெறுவதற்கு திட்டமிட்டு வருகின்றனர். இங்கு திமுக, அதிமுக இடையில் தான் பிரதான மோதல் இருக்கிறது. தற்போதைய திமுக எம்.பி எஸ்.ஆர்.பார்த்திபன் மீது கட்சிக்குள் அதிருப்தி நிலவுவதாக ஒரு பேச்சு உண்டு. இருப்பினும் அவரை ஓவர்டேக் செய்து சீட் பெறுவதற்கு சரியான ஆள் இல்லை என்கின்றனர். அதேசமயம் உதயநிதி ஸ்டாலின் நற்பணி மன்ற மாநில செயலாளர் பி.கே.பாபு ரேஸில் இருப்பதாக சொல்லப்படுகிறது.