விருதுநகர் மக்களவைத் தேர்தல் முடிவுகள் 2024 (Virudhunagar constituency lok sabha election 2024)

விருதுநகர் மக்களவைத் தேர்தல் தகவல்

விருதுநகர் மாவட்டம் முந்தைய ராமநாதபுரம் மாவட்டத்திலிருந்து பிரிக்கப்பட்டு புதிய மாவட்டமாக தனியாக பிரிந்தது. விருதுநகர் மாவட்டம் முன்பு மக்களால் கர்மவீரர் காமராஜர் மாவட்டம் என்றே அழைக்கப்பட்டது.

விருதுகளை கைப்பற்றிய வீரன்
விருதுநகர் என்ற பெயர் வருவதற்கு காரணம் பல ராஜ்ஜியங்களை கைப்பற்றி, பல விருதுகளை பெற்ற ஒரு போர்வீரன், இந்த ஊருக்கு வந்து குடியிருப்பாளர்களுக்கு சவால் விடுக்கும் வகையில் ஒரு அறிவிப்பை வெளியிட்டான். அதன்படி அந்த ஊரில் வசித்து வரும் ஒருவர் அவன் சவாலை ஏற்றுக்கொண்டு, அந்த வீரனோடு போரிட்டு, அவனை கொன்று, அவன் வைத்திருந்த விருதுகள் அனைத்தையும் கைப்பற்றினார்.

விருதுநகர்
இவ்வாறு அவன் பெற்ற விருதுகள் அனைத்தையும் விருதுநகரை சார்ந்த வீரனால் வெற்றி பெற்றதால் இந்த ஊருக்கு விருதுகள் வெட்டி என்ற பெயர் பெற்றது. பின்னர் 1875-ம் ஆண்டு விருதுப்பட்டி என மாறியது. இதனைத்தொடர்ந்து 1923-ம் ஆண்டு ஏப்ரல் 6-ந் தேதி விருதுநகர் என்று அப்போதைய நகர சபையானது பெயர் மாற்றியது.

மாவட்டத்தின் எல்லைகள்
பிரிட்டிஷ் ஆட்சியின் போது விருதுநகர் மாவட்டம் ஒரு முக்கியமான வர்த்தக மையமாக இருந்தது, இந்த மாவட்டம் தமிழ்நாட்டில் தென்பகுதியில் அமைந்திருக்கிறது. இந்த விருதுநகர் மாவட்டத்தின் வடக்கு பகுதியில் மதுரை மற்றும் சிவகங்கை மாவட்டங்களும், தெற்கு பகுதியில் திருநெல்வேலி மற்றும் தூத்துக்குடி மாவட்டங்களும், கிழக்கு பகுதியில் ராமநாதபுரம் மாவட்டமும், மேற்கு பகுதியில் கேரள மாநிலமும் மற்றும் வடமேற்கில் தேனி மாவட்டமும் விருதுநகர் மாவட்டத்தின் எல்லைகளாக தற்போது இருக்கின்றன.

விவசாயம்
இந்த விருதுநகர் மாவட்டம் 3 வருவாய் கோட்டங்களையும், 9 வட்டங்களையும், 39 குறுவட்டங்கள், 600 கிராமங்களையும் உள்ளடக்கியது. இந்த மாவட்டத்தில் 37 சதவீத நிலத்தில் மக்கள் அனைவரும் விவசாயம் செய்து வருகின்றனர். இங்கு கரிசல் மண்ணே அதிகம் என்பதால் பருத்தி, பருப்பு வகைகள், எண்ணெய் வித்துக்கள், தினை போன்ற தானியங்கள் போன்றவை நன்றாக விளைகின்றன. கிணறு இருக்கும் இடங்களில் நெல், கரும்பு போன்ற விவசாயம் செய்யப்படுகிறது.

சந்தை நகரம்
விருதுநகர், எண்ணெய், காபி, மிளகாய் மற்றும் பருப்பு வகைகளுக்கு முக்கிய சந்தை நகரமாக தற்போது விளங்குகிறது. ராஜபாளையம், பருத்தி ஆலைகள், நூற்பாலைகள், விசைத்தறி ஆலைகளைக்கொண்டுள்ளது. இது கோயம்புத்தூருக்கு அடுத்த இரண்டாவது பெரிய நெசவு நகரமாக திகழ்கிறது. மேலும் விருதுநகர் மாவட்டத்தில் ஆலங்குளம் மற்றும் ஆர் ஆர் நகரிலும் 2 பெரிய சிமெண்ட் தொழிற்சாலைகள் உள்ளன. இதேபோல் ஸ்ரீவில்லிபுத்தூர் பால்கோவா மிகவும் பிரபலமாக உள்ளது.

சிவகாசி பட்டாசு
இங்குள்ள சிவகாசி நகரம் பட்டாசு தொழிலுக்கு புகழ்பெற்ற ஊராக விளங்கி வருகிறது. இது குட்டி ஜப்பான் என்றும் மக்களால் அழைக்கப்படுகிறது. இந்தியாவின் தீப்பெட்டி உற்பத்தியில் 80 சதவீதம் தீப்பெட்டிகள் சிவகாசியில் தான் தயார் செய்யப்பட்டு வருகின்றன. மேலும் இந்தியாவில் தயாராகும் பட்டாசுகளில் 90 சதவீதம் சிவகாசியில் தான் தயாராகின்றன.
மேலும் இந்தியாவின் அச்சுத்துறையில் 60 சதவீதம் இங்கு உற்பத்தி செய்யப்படுகின்றன.

அரசியல்
2019-ம் ஆண்டு நடந்த மக்களவைத் தேர்தலில், விருதுநகர் மக்களவைத் தொகுதியில் இந்திய தேசிய காங்கிரஸ் கட்சியை சேர்ந்த மாணிக்கம் தாகூர் வெற்றி பெற்றார். இதேபோல் 2021-ம் ஆண்டு நடந்த சட்டமன்றத் தேர்தலில், திமுக சேர்ந்த ஏ. ஆர். ஆர். சீனிவாசன் வெற்றி பெற்றார்.

மாணிக்கம் தாகூர்
விருதுநகர் மாவட்டத்தை பொறுத்தவரை திருப்பரங்குன்றம், திருமங்கலம், சாத்தூர், சிவகாசி, விருதுநகர், அருப்புக்கோட்டை போன்ற 6 சட்டமன்ற தொகுதிகள் உள்ளன. கடந்த 2019-ம் ஆண்டு தேர்தலில் காங்கிரஸ் கட்சியை சேர்ந்த மாணிக்கம் தாகூர் 4 லட்சத்து 70 ஆயிரம் 883 வாக்குகள் வித்தியாசத்தில் வெற்றி பெற்றார். அவரை எதிர்த்து போட்டியிட்ட தேமுதிக உறுப்பினர் அழகர்சாமி 3 லட்சத்து 16 ஆயிரத்து 329 வாக்குகள் பெற்று தோல்வியை தழுவினார்.

நோட்டா
இதேபோல் அமமுக சார்பில் போட்டியிட்ட பரமசிவ ஐயப்பன் 1 லட்சத்து 7 ஆயிரத்து 615 வாக்குகளும், மக்கள் நீதி மய்யம் கட்சியை சேர்ந்த முனியசாமி என்பவர் 57 ஆயிரத்து 129 வாக்குகளும், நாம் தமிழர் கட்சியை சேர்ந்த அருள் மொழி தேவன் என்பவர் 53 ஆயிரத்து 40 வாக்குகளும் பெற்று தோல்வி அடைந்தனர். நோட்டாவுக்கு 17 ஆயிரத்து 292 வாக்குகள் கிடைத்தன.

அதிமுக
வருகின்ற நாடாளுமன்ற தேர்தலில் திமுக, அதிமுக-இபிஎஸ் அணி மற்றும் பாஜக சார்பில் போட்டி இருக்கும் என எதிர்பார்க்கப்படுகிறது. இதில் அதிமுக இபிஎஸ் அணி சார்பில் கிழக்கு மாவட்டம் மற்றும் மேற்கு மாவட்டமாக பிரிக்கப்பட்டுள்ளது. மேற்கு மாவட்ட செயலாளராக முன்னாள் பால்வளத்துறை அமைச்சர் கே.டி. ராஜேந்திரபாலாஜி உள்ளார். இதேபோல் கிழக்கு மாவட்டத்திற்கு ரவிச்சந்திரன் ஆகியோர் உள்ளனர்.

திமுக
இதேபோல் திமுக சார்பில் வடக்கு மாவட்ட செயலாளராக தங்கம் தென்னரசு உள்ளார். இவர் திருச்சுழி, விருதுநகர் , சிவகாசி போன்ற இடங்களில் கட்சியை பணியை தீவிரமாக மேற்கொண்டு வருகிறார். இதேபோல் தெற்கு மாவட்டத்தில் அருப்புக் கோட்டை , சாத்தூர் , ஸ்ரீவில்லிபுத்தூர், ராஜபாளையம் பகுதிகளில் வருவாய்துறை அமைச்சர் கே.கே. எஸ்.ஆர். ஆர். ராமச்சந்திரன் அரசியல் பணிகளை மேற்கொண்டு வருகிறார்.

நாடாளுமன்ற தேர்தல் களம்
இதேபோல் மற்ற கட்சிகளான பாஜக, நாம்தமிழர் கட்சி போன்ற கட்சிகள் தீவிரமாக அரசியல் பணிகள் செய்து வருகின்றனர். வருகின்ற நாடாளுமன்ற தேர்தல் களம் விரைவில் சூடுபிடிக்கும் என எதிர்ப்பார்க்கப்படுகிறது.